ದೇಸೀಯ ಸಂಸ್ಕೃತಿ ಬಿಂಬಿಸಲು ಗೀತಾಮಂದಿರ ಮತ್ತೊಂದು ಹೆಜ್ಜೆ

ಸುಗುಣೇಂದ್ರ ತೀರ್ಥ ಶ್ರೀಪಾದರಿಂದ ಮಾಹಿತಿ

ಭಾರತ ಮೇಳ ಕಾರ್ಯಕ್ರಮ ಉದ್ಘಾಟನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಎಲ್ಲ ಗ್ರಂಥಗಳಲ್ಲಿ ಮಹಾಭಾರತ ಸರ್ವಶ್ರೇಷ್ಠ ಗ್ರಂಥವಾಗಿದ್ದು, ಅದರಲ್ಲಿ ಭಗವದ್ಗೀತೆ ಶ್ರೇಷ್ಠವಾದುದೆಂದು ಅನೇಕ ಋಷಿ-ಮುನಿಗಳು ಉಲ್ಲೇಖಿಸಿದ್ದಾರೆ. ಗೀತಾಚಾರ್ಯನಾದ ಶ್ರೀಕೃಷ್ಣನಿಂದ ಬೋಧಿಸಲ್ಪಟ್ಟ ಗೀತೆಯ ಪ್ರಚಾರ, ಪ್ರಸಾರಕ್ಕಾಗಿ ವಿಶ್ವದ ಏಕೈಕ ಕೇಂದ್ರವಾದ ಗೀತಾ ಮಂದಿರವು 30 ವರ್ಷದಿಂದ ತೊಡಗಿಕೊಂಡಿದೆ. ಇದೀಗ ಭಾರತೀಯ ಧಾರ್ಮಿಕ-ಸಾಂಸ್ಕೃತಿಕ ವೈಭವ ಹಾಗೂ ವೈಶಿಷ್ಟ್ಯಗಳನ್ನು ಜನಮಾನಸಕ್ಕೆ ತಲುಪಿಸಲು ಗೀತಾ ಮಂದಿರ ಇನ್ನೊಂದು ಹೆಜ್ಜೆ ಇಟ್ಟಿದೆ ಎಂದು ಪರ್ಯಾಯ ಸುಗುಣೇಂದ್ರ ತೀರ್ಥ ಶ್ರೀಪಾದರು ನುಡಿದರು.

ಭಂಡಾರಕೇರಿ ಮಠದ ವಿದ್ಯೇಶ ತೀರ್ಥ ಶ್ರೀಪಾದರು ಕಾರ್ಯಕ್ರಮ ಉದ್ಘಾಟಿಸಿ ಶುಭ ಹಾರೈಸಿದರು.

ಮೇಳದ ಸಂಚಾಲಕ ಕೆ.ವಿ. ರಮಣ ಆಚಾರ್ಯ ಕಾರ್ಯಕ್ರಮ ನಿರ್ವಹಿಸಿದರು.

ಹತ್ತಾರು ಬಗೆಯ ಮಳಿಗೆಗಳು

ಗೀತಾ ಮಂದಿರದಲ್ಲಿ ಸಂಪೂರ್ಣ ಭಗವದ್ಗೀತಾ ದರ್ಶನ, ಉದಯಾಸ್ತಮಾನ ಗೀತಾ ಪಾರಾಯಣ, ಪಾರಂಪರಿಕ ವಸ್ತು ಪ್ರದರ್ಶನ, ಧಾರ್ಮಿಕ, ಸಾಂಸ್ಕೃತಿಕ ಚಲನಚಿತ್ರ, ಕೃತಕ ಆಭರಣ, ಅನುಭವ ಮಂಟಪ, ಖಾದಿ ಭಂಡಾರ, ಕೈಮಗ್ಗದ ಸೀರೆ, ಕರಕುಶಲ ವಸ್ತುಗಳು, ಗವ್ಯ ಉತ್ಪನ್ನ, ಛಾಯಾಚಿತ್ರ-ಪುಸ್ತಕ ಪ್ರದರ್ಶನ, ಜ್ಯೋತಿಷ, ಖಗೋಳ, ಕೃಷಿ ಉತ್ಪನ್ನ, ಮಣ್ಣಿನ ಮಡಕೆ, ಆಕಾಶ ಕಾಯಗಳ ವೀಕ್ಷಣೆ, ಯಕ್ಷಗಾನ, ಜಾನಪದ, ಗಂಜೀಫಾ ಕಲೆಯ ವೈಭವ ಹೀಗೆ ಅನೇಕ ಬಗೆಯ ಮಳಿಗೆ ತೆರೆಯಲಾಗಿದೆ.