ಭಜನೆಯಿಂದ ಮನಸ್ಸಿನ ದೋಷ ಮಾಯ

ಶಿರಸಿ: ಭಜನೆಯಿಂದ ಮನಸ್ಸಿನ ದೋಷ ಹೋಗುತ್ತವೆ ಎಂದು ಸೋಂದಾ ಸ್ವರ್ಣವಲ್ಲೀ ಮಹಾಸಂಸ್ಥಾನದ ಮಠಾಧೀಶ ಶ್ರೀಮಜ್ಜಗದ್ಗುರು ಶಂಕರಾಚಾರ್ಯ ಶ್ರೀ ಗಂಗಾಧರೇಂದ್ರ ಸರಸ್ವತೀ ಮಹಾ ಸ್ವಾಮೀಜಿ ನುಡಿದರು.

ಸ್ವರ್ಣವಲ್ಲೀ ಮಠದಲ್ಲಿ ಸಂಕಲ್ಪಿತ ಚಾತುರ್ಮಾಸ್ಯ ವ್ರತಾಚರಣೆಯಲ್ಲಿ ಗುರು ಸೇವೆ ಸಲ್ಲಿಸಿದ ಮರಾಠಿ ಸಮಾಜದ ಶಿಷ್ಯರನ್ನು ಉದ್ದೇಶಿಸಿ ಗುರುವಾರ ಆಶೀರ್ವಚನ ನೀಡಿದರು.

ಭಜನೆ ಮಾಡಿದರೆ ಅದೃಷ್ಟ ಹಾಗೂ ದೃಷ್ಟ ಎರಡೂ ಪ್ರಯೋಜನ ಇದೆ. ಭಜನೆ ಮಾಡುವ ವ್ಯಕ್ತಿಗೆ ಒಳ್ಳೆಯ ಆರೋಗ್ಯ ಪಡೆಯಲು ಕಾರಣವಾಗುತ್ತದೆ. ಆನಂದ, ನೆಮ್ಮದಿಗಾಗಿ ಭಜನೆ ಮಾಡಬೇಕು. ಸಾಂಸಾರಿಕ ಚಿಂತನೆ ಇದ್ದರೂ ಕೂಡ ದೂರವಾಗುತ್ತದೆ ಎಂದು ಶ್ರೀಗಳು ಹೇಳಿದರು.

ತೀರ್ಥ ಕ್ಷೇತ್ರಗಳಿಗೆ, ಮಠಗಳಿಗೆ ವರ್ಷಕ್ಕೊಮ್ಮೆಯಾದರೂ ಹೋಗಬೇಕು. ಇಂಥ ಕ್ಷೇತ್ರಗಳಿಗೆ ತೆರಳಿದಾಗ ಮನಸ್ಸಿನಲ್ಲಿ ಶ್ರದ್ಧಾ ಭಾವನೆ ಬರುತ್ತದೆ. ಪವಿತ್ರ ಕ್ಷೇತ್ರದಲ್ಲಿ ಶ್ರದ್ಧಾ ಭಾವದಿಂದ ಇದ್ದರೆ ಪ್ರಧಾನವಾಗಿ ಮೂರು ಪ್ರಯೋಜನ ಆಗುತ್ತದೆ. ತೀರ್ಥ ಕ್ಷೇತ್ರ, ಮಠಗಳಿಗೆ ಶಕ್ತಿ ಇರುತ್ತವೆ. ಮಠಗಳಲ್ಲಿ ತಪಸ್ವಿಗಳು ತಪಸ್ಸು ಮಾಡುತ್ತಾರೆ. ಧಾರ್ಮಿಕ ಕಾರ್ಯಕ್ರಮಗಳು, ಯಜ್ಞಗಳು ಆಗಾಗ ನಡೆಯುತ್ತಿರುತ್ತವೆ. ಆ ಪ್ರಭಾವ ನಮ್ಮ ಮೇಲೆ ಪರಿಣಾಮ ಬೀರುತ್ತವೆ ಎಂದು ಶ್ರೀಗಳು ತಿಳಿಸಿದರು.

ಸಮಾಜದ ಪ್ರಮುಖ ಸೋಮು ಮರಾಠಿ, ಎಲ್ಲ ಊರಿನಿಂದಲೂ ಮಠಕ್ಕೆ ಚಾತುರ್ಮಾಸ್ಯದ ಅವಧಿಯಲ್ಲಿ ಬರಬೇಕು. ಸಮಸ್ಯೆಗಳಿದ್ದರೂ ಮಾತನಾಡಿ ಸರಿ ಮಾಡಿಕೊಳ್ಳಬೇಕು ಎಂದರು.

ನಾರಾಯಣ ಮರಾಠಿ, ಸಂತೋಷ ಮರಾಠಿ ಯಲ್ಲಾಪುರ, ಮಂಜುನಾಥ ಮರಾಠಿ ಮಂಜುಗುಣಿ, ಗೋಪಾಲ ಮರಾಠಿ ಮಾನಿಮನೆ, ಯಶವಂತ ಪಾಟೀಲ ತಾಟವಾಳ, ಉದಯ ಮರಾಠಿ ದೇವನಳ್ಳಿ, ಶಿರಸಿ, ಹೊನ್ನಾವರ, ಯಲ್ಲಾಪುರ, ಕುಮಟಾ ಮತ್ತಿತರೆಡೆಯಿಂದ ಮರಾಠಿ ಸಮಾಜದ ಶಿಷ್ಯರು ಆಗಮಿಸಿದ್ದರು.