ಜಿಲ್ಲೆಯಲ್ಲಿ ಬೆಟ್ಟಿಂಗ್​ ದಂಧೆ ಜೋರು

ಎನ್​.ಮುನಿವೆಂಕಟೇಗೌಡ ಕೋಲಾರ

ಜಿಲ್ಲೆಯಲ್ಲಿ ಪ್ರಸ್ತುತ ಐಪಿಎಲ್​ ಬೆಟ್ಟಿಂಗ್​ ದಂಧೆ ಜೋರಾಗಿದ್ದು, ಜಿಲ್ಲೆಯ ಇಬ್ಬರು ಶಾಸಕರು ಸಾರ್ವಜನಿಕವಾಗಿಯೇ ಈ ಬಗ್ಗೆ ಧ್ವನಿ ಎತ್ತುತ್ತಿದ್ದರೂ ಪೊಲೀಸ್​ ಇಲಾಖೆ ಮಾತ್ರ ದಂಧೆಗೆ ಕಡಿವಾಣ ಹಾಕುವಲ್ಲಿ ಎಡವಿರುವುದು ಸಾರ್ವಜನಿಕರ ಅಸಮಾಧಾನಕ್ಕೆ ಕಾರಣವಾಗಿದೆ.

ಕೋಲಾರ ಶಾಸಕ ಕೊತ್ತೂರು ಮಂಜುನಾಥ್​ ಮತ್ತು ಮುಳಬಾಗಿಲು ಶಾಸಕ ಸಮೃದ್ಧಿ ಮಂಜುನಾಥ್​ ಜಿಲ್ಲೆಯ ಯಾವುದೇ ಕಾರ್ಯಕ್ರಮ ಅಥವಾ ಇಲಾಖೆಗಳ ಸಭೆಯಲ್ಲಿ ಈ ವಿಚಾರವನ್ನು ಪದೇಪದೆ ಪ್ರಸ್ತಾಪ ಮಾಡುತ್ತಲೇ ಇದ್ದಾರೆ. ದಂಧೆಯಿಂದ ಸಾವು&ನೋವು ಆಗದಂತೆ ಎಚ್ಚರ ವಹಿಸುವಂತೆ ಹಿರಿಯ ಪೊಲೀಸ್​ ಅಧಿಕಾರಿಗಳಿಂದ ಹಿಡಿದು ಎಲ್ಲರಿಗೂ ಸೂಚನೆ ನೀಡಿದರೂ ಕಡಿವಾಣ ಬಿದ್ದಿಲ್ಲ.

ಅನೇಕ ಬಾರಿ ಬೆಟ್ಟಿಂಗ್​ ದಂಧೆಗೆ ಸಿಲುಕಿದವರು ಹಣ ಕಳೆದುಕೊಂಡದ್ದಲ್ಲದೇ ಮನೆಯಲ್ಲಿ ತಂದೆ&ತಾಯಿ ಕೂಡಿಟ್ಟ ಹಣ, ಬಂಗಾರ ಕಳವು ಮಾಡಿ ಬೆಟ್ಟಿಂಗ್​ ಆಡುತ್ತಿದ್ದು, ಅದು ಸಾಲದೇ ಸಾಲ ಮಾಡಿಯೋ, ಬಡ್ಡಿಗೆ ಹಣ ಪಡೆದೋ ಬೆಟ್ಟಿಂಗ್​ನಲ್ಲಿ ಹಾಕುತ್ತಿದ್ದಾರೆ. ಕೊನೆಗೆ ಮಾಡಿದ ಸಾಲ ತೀರಿಸಲಾಗದೆ, ಮನೆಯಲ್ಲಿ ಕದ್ದ ವಿಚಾರವನ್ನೂ ತಿಳಿಸಲಾಗದೆ ಜೀವನಕ್ಕೇ ವಿದಾಯ ಹೇಳುವ ಹಂತಕ್ಕೆ ತಲುಪಿದ್ದಾರೆ.

ಅದೆಷ್ಟೋ ಬಾರಿ ಶಾಸಕರೇ ನೇರವಾಗಿ ಪೊಲೀಸರ ಮೇಲೆ ಆರೋಪ ಮಾಡಿದ್ದಾರೆ. ಆಡಳಿತ ಮತ್ತು ವಿರೋಧ ಪಕ್ಷದ ಇಬ್ಬರು ಶಾಸಕರು ಬೆಟ್ಟಿಂಗ್​ ವಿರುದ್ಧ ಸಮರ ಸಾರುತ್ತಿದ್ದರೆ, ಇದಕ್ಕೂ ನಮಗೂ ಸಂಬಂಧವೇ ಇಲ್ಲ ಎನ್ನುವ ರೀತಿಯಲ್ಲಿ ತಲೆಕೆಡಿಸಿಕೊಳ್ಳದೆ ಓಡಾಡುತ್ತಿರುವುದನ್ನು ನೋಡಿದರೆ ಪರೋಕ್ಷವಾಗಿ ಪೊಲೀಸರೇ ದಂಧೆಗೆ ಸಹಕಾರ ನೀಡುತ್ತಿದ್ದಾರೆ ಎಂಬ ಆರೋಪ ಸಾರ್ವಜನಿಕ ವಲಯದಲ್ಲಿ ಕೇಳಿಬರುತ್ತಿದೆ. ಇತ್ತೀಚೆಗೆ ಶಾಸಕರ ಗರ್ಜನೆಗೆ ಸ್ವಲ್ಪ ಮೈ ಕೊಡವಿದ ನಂಗಲಿ ಪೊಲೀಸರು 4&5 ಪಡ್ಡೆ ಹುಡುಗರನ್ನು ಠಾಣೆಗೆ ಕರೆಸಿ ಸಂಜೆಯವರೆಗೂ ಕೂರಿಸಿ ನಂತರ ಠಾಣೆ ಜಾಮೀನು ಮೇಲೆ ಬಿಟ್ಟು ಕಳುಹಿಸಿದ್ದು ಹೊರೆತುಪಡಿಸಿದರೆ ಯಾವುದೇ ಕಾನೂನು ಕ್ರಮವಾಗಿಲ್ಲ ಎನ್ನಲಾಗಿದೆ.

ಇದರಲ್ಲಿ ಕೆಲ ಪೊಲೀಸರೇ ಬೇನಾಮಿಗಳ ಮೂಲಕ ಆ್ಯಪ್​ ಡೌನ್​ಲೋಡ್​ ಮಾಡಿಸಿ ಅವರ ಮೂಲಕ ಹಣ ಮಾಡಲು ಹೊರಟಿದ್ದಾರೆ. ಕಳೆದ ವರ್ಷ ಮುಳಬಾಗಿಲು ಪೊಲೀಸ್​ ಠಾಣೆಯ ಪೇದೆಯೊಬ್ಬರ ಬೆಟ್ಟಿಂಗ್​ ದಂಧೆಯ ಬಗ್ಗೆ ಮಾಹಿತಿ ಪಡೆದು ಆಗಿನ ಎಸ್​ಪಿ ತನಿಖೆಗೆ ಆದೇಶಿಸಿದರೆ ಆ ಪೇದೆ ಆತ್ಮಹತ್ಯೆಯ ಹೈಡ್ರಾಮ ಮಾಡಿ ತನಿಖೆಯಿಂದ ತಪ್ಪಿಸಿಕೊಂಡ ಪ್ರಸಂಗ ನಡೆದಿತ್ತು. ಕಾಲ ಕಾಲಕ್ಕೆ ತಪ್ಪಿತಸ್ಥರ ವಿರುದ್ಧ ಕ್ರಮ ಕೈಗೊಳ್ಳಲಾಗುತ್ತಿದೆ. ಆದರೆ ಇದನ್ನು ಕೆಲವರು ಅಲ್ಲಗಳೆಯುತ್ತಿದ್ದು, ಇಲಾಖೆ ಬಳಿ ಅಂಕಿ ಅಂಶ ಇವೆ ಎಂದು ಪೊಲೀಸ್​ ಮೂಲಗಳು ತಿಳಿಸಿವೆ.

ಫಾರಿನ್​ನಲ್ಲಿ ಕುಳಿತು ಸಂದೇಶ : ಐಪಿಎಲ್​ ಪ್ರಾರಂಭವಾಗುತ್ತಿದ್ದಂತೆ ಹೊರರಾಜ್ಯಗಳಿಗೆ ಮತ್ತು ವಿದೇಶಕ್ಕೆ ಹಾರುವ ಬೆಟ್ಟಿಂಗ್​ನ ಕಿಂಗ್​ ಪಿನ್​ಗಳು ವಿದೇಶದಲ್ಲಿ ಕುಳಿತು ತಮ್ಮದೇ ಆ್ಯಪ್​ಗಳ ಮೂಲಕ ಬೆಟ್ಟಿಂಗ್​ ದಂಧೆ ಶುರು ಹಚ್ಚಿಕೊಂಡು ಸ್ಥಳಿಯ ಯುವಕರನ್ನು ಬೆಟ್ಟಿಂಗ್​ ದಂಧೆಗೆ ಬಳಸಿಕೊಳ್ಳುತ್ತಿದ್ದಾರೆ. ೇಮವಾಗಿ ವಿದೇಶದಲ್ಲಿ ಕುಳಿತು ಆಡಲು ಸಹಕರಿಸುತ್ತಿರುವ ಪೊಲೀಸರ ಹೊಟ್ಟೆ ತುಂಬಿಸಲು ಕಿಂಗ್​ಪಿನ್​ಗಳು ಸ್ಥಳಿಯವಾಗಿ ಯಾವ ವ್ಯಕ್ತಿ ಎಷ್ಟು ಲಾಭ ಗಳಿಸಿದ ಎಂಬುದರ ಬಗ್ಗೆ ವಾಟ್ಸಾಪ್​ ಮೂಲಕ ಪೊಲೀಸರಿಗೆ ಸಂದೇಶ ರವಾನಿಸುತ್ತಾರೆ. ಈ ಮಾಹಿತಿ ಮೇರೆಗೆ ಮಾರನೇ ದಿನ ಪೊಲೀಸರು ಬೆಟ್ಟಿಂಗ್​ನಲ್ಲಿ ಹೆಚ್ಚು ಲಾಭ ಗಳಿಸಿದವನ ಮನೆಯ ಬಾಗಿಲು ತಟ್ಟಿ, ಪ್ರಕರಣ ದಾಖಲಿಸಿ ಜೈಲಿಗೆ ಕಳುಹಿಸುತ್ತೇವೆ ಎಂದು ಬೆದರಿಸುತ್ತಾರೆ. ಪೊಲೀಸರ ಬೆದರಿಕೆಗೆ ಹೆದರಿದವರು ಗೆದ್ದ ಹಣದಲ್ಲಿ ಒಂದಿಷ್ಟು ಹಣವನ್ನು ಪೊಲೀಸರ ಜೇಬು ತುಂಬಿಸಿ ಕಳುಹಿಸಿಕೊಡುತ್ತಾರೆ ಎಂಬ ಆರೋಪ ಸಾರ್ವಜನಿಕರಲ್ಲಿ ಕೇಳಿಬರುತ್ತಿದೆ.