ಎರಡು ವಾರದ ಹಿಂದೆ ಶೇ.20 ರಾಗಿ ಬಿತ್ತನೆ ಆಗಿತ್ತು. ಆದರೆ ಕಳೆದ 10 ದಿನಗಳ ಅವಧಿಯಲ್ಲಿ ಮಳೆ ಕೊಂಚ ಚುರುಕಾದ ಹಿನ್ನೆಲೆಯಲ್ಲಿ ಬಿತ್ತನೆಯೂ ಚುರುಕುಗೊಂಡಿದೆ. ಒಟ್ಟಾರೆ ಕೃಷಿ ಇಲಾಖೆಯ ಬಿತ್ತನೆ ಪ್ರಮಾಣದ ಮಾಹಿತಿ ಗಮನಿಸಿದರೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಲ್ಲಿ 62,700 ಹೆಕ್ಟೇರ್ ರಾಗಿ ಬಿತ್ತನೆ ಗುರಿಯಿತ್ತು, ಇದರಲ್ಲಿ ಅಂದಾಜು 60,847 ಹೆಕ್ಟೇರ್(ಶೇ.97), ಮೆಕ್ಕೆಜೋಳ 7320 ಹೆಕ್ಟೇರ್ ಗುರಿಯಲ್ಲಿ 2566(ಶೇ.35) ಹೆಕ್ಟೇರ್ ಮಾತ್ರ ಬಿತ್ತನೆಯಾಗಿದೆ. ದೊಡ್ಡಬಳ್ಳಾಪುರ ತಾಲೂಕಿನಲ್ಲಿ 19,220 ಹೆಕ್ಟೇರ್ ರಾಗಿ ಬಿತ್ತನೆ ಗುರಿಯಲ್ಲಿ 18,650 ಹೆಕ್ಟೇರ್ ಬಿತ್ತನೆ ಆಗಿದೆ. ಇದು ಅಂದಾಜು ಮಾಹಿತಿಯಾಗಿದ್ದು, ಕೆಲವೆಡೆ ಬಿತ್ತನೆ ಮಾಡಿದ್ದರೂ ಸರಿಯಾದ ಸಮಯಕ್ಕೆ ಮಳೆಯಾಗದ ಹಿನ್ನೆಲೆಯಲ್ಲಿ ಬೀಜಗಳಿಗೆ ಹಾನಿಯಾಗಿದೆ. ಇನ್ನೂ ನಾನಾ ರೀತಿಯ ಸಮಸ್ಯೆಗಳಿದ್ದು, ಬೆಳೆ ಸಮೀಕ್ಷೆಯ ನಂತರ ಸಂಪೂರ್ಣ ಸ್ಥಿತಿಗಳ ಬಗ್ಗೆ ಮಾಹಿತಿ ಸಿಗಲಿದೆ ಎಂದು ಅಧಿಕಾರಿಗಳೇ ಹೇಳುತ್ತಿದ್ದಾರೆ.
