ಅಳಿವಿನಂಚಿಗೆ ಶತಮಾನದ ಶಾಲೆಗಳ ದಾಖಲೆಗಳು

ಅಳಿವಿನಂಚಿಗೆ ಶತಮಾನದ ಶಾಲೆಗಳ ದಾಖಲೆಗಳು

ಸರ್ಕಾರದ ಉದಾಸೀನ ಹಾಗೂ ಶಿಕ್ಷಣ ಇಲಾಖೆಯ ರ್ನಿಲಕ್ಷ್ಯ ಮುಂದುವರಿದರೆ ಹಲವು ತಲೆಮಾರುಗಳ ಇತಿಹಾಸವಿರುವ ದಾಖಲೆಗಳು ಶಾಶ್ವತವಾಗಿ ಕಣ್ಮರೆಯಾಗಲಿವೆ ಎಂದು ಶಾಲೆಯ ಹಿರಿಯ ವಿದ್ಯಾರ್ಥಿಗಳ ಸಂಘ ಎಚ್ಚರಿಸಿದ್ದು, ಅಧಿಕಾರಿಗಳು ಶ್ರೀವೇ ದಾಖಲಾತಿಗಳನ್ನು ಗಣಕೀಕೃತಗೊಳಿಸಬೇಕು ಎಂದು ಆಗ್ರಹಿಸಿದೆ.

ದಾಖಲೆಗಳು ಪುಡಿಪುಡಿ, ಕಣ್ಣೀರ ಕಥೆ!: ಪಟ್ಟಣದ ಸರ್ಕಾರಿ ಪದವಿ ಪೂರ್ವ ಕಾಲೇಜಿನ ಪ್ರೌಢಶಾಲಾ ವಿಭಾಗವು ಪ್ರಾರಂಭಗೊಂಡು ಸುಮಾರು 80 ವರ್ಷಗಳಾಗಿವೆ. ಇಲ್ಲಿನ ಹಳೆಯ ದಾಖಲಾತಿ ಪುಸ್ತಕಗಳನ್ನು ಎಷ್ಟೇ ಮುತುವರ್ಜಿ ವಹಿಸಿ ರಕ್ಷಿಸಿಕೊಂಡು ಬಂದಿದ್ದರೂ, ಕಾಲದ ಹೊಡೆತಕ್ಕೆ ಸಿಲುಕಿ ಬುಕ್​ನಲ್ಲಿನ ಹಾಳೆಗಳು ವರ್ಣ ಬದಲಿಸಿಕೊಂಡಿದ್ದು, ಮುಟ್ಟಿದರೆ ಪುಡಿಪುಡಿಯಾಗುತ್ತಿವೆ. ಪ್ರಸ್ತುತ ಶಾಲಾ ಸಿಬ್ಬಂದಿ ಅಂತಹ ಪುಡಿ ಪೇಪರ್​ಗಳನ್ನು ಮತ್ತೊಂದು ಹಾಳೆಗೆ ಅಂಟಿಸಿ ಭದ್ರಪಡಿಸುವ ಸಾಹಸ ಮಾಡುತ್ತಿದ್ದಾರೆಯೇ ಹೊರತು, ಇದಕ್ಕೆ ಶಾಶ್ವತ ಪರಿಹಾರ ಕಂಡುಕೊಂಡಿಲ್ಲ.

ಇಲಾಖೆಗೆ ಎಚ್ಚರಿಕೆ

ಪ್ರತಿ ನಾಗರಿಕನ ಅಸ್ತಿತ್ವಕ್ಕೆ ಮತ್ತು ಆತನ ಶೈಕ್ಷಣಿಕ, ಸಾಮಾಜಿಕ ಬದುಕಿಗೆ ಶಾಲಾ ದಾಖಲಾತಿಗಳೇ ಮೂಲ ಆಧಾರ. ಪ್ರಸ್ತುತ ನಡೆಯುತ್ತಿರುವ ಎಸ್​ಐಆರ್​ ಪರಿಷ್ಕರಣೆ ಕಾರ್ಯಕ್ರಮದಲ್ಲಿ ಹೆಸರನ್ನು ಸೇರಿಸಲು, ಜಾತಿ ಮತ್ತು ಆದಾಯ ಪ್ರಮಾಣ ಪತ್ರಗಳನ್ನು ಪಡೆಯಲು ಶಾಲಾ ದಾಖಲೆಗಳೇ ಅತ್ಯಂತ ಪ್ರಮುಖ ಸಾಕ್ಷಿಯಾಗಿವೆ. ಇಂತಹ ದಶಕಗಳ ಇತಿಹಾಸವಿರುವ ಶಾಲೆಗಳ ದಾಖಲೆಗಳು ನಾಶವಾದರೆ, ಭವಿಷ್ಯದಲ್ಲಿ ಸಾರ್ವಜನಿಕರು ತಮ್ಮ ಅಸ್ತಿತ್ವ ನಿರೂಪಿಸಲು ಕಚೇರಿಗಳಿಗೆ ಅಲೆಯಬೇಕಾಗುತ್ತದೆ ಎಂದು ಎಚ್ಚರಿಸಿದ್ದಾರೆ.