ಲೋನ್ ಪಡೆಯಲು ಕನಿಷ್ಟ ಮಾಹಿತಿ ಬೇಕು

ಮನೆ, ಪ್ಲಾಟ್ ಅಥವಾ ಮನೆ ನಿರ್ಮಾಣಕ್ಕೆ ನಿವೇಶನ ಖರೀದಿಸುವ ಕನಸು ಕಂಡರೆ ಸಾಕೆ..ಕನಸಿನ ಸಾಕಾರಕ್ಕೆ ಆರ್ಥಿಕ ಶಕ್ತಿ ಬೇಡವೇ? ಅರ್ಥಾತ್ ಸಾಲ.... ಇದಕ್ಕಾಗಿ ಏನು ಮಾಡಬೇಕು. ಸಾಲ ಪಡೆಯುವುದು ಹೇಗೆ? ಎಲ್ಲಿಂದ ಯಾರಿಂದ ಲೋನ್ ಸಿಗಬಹುದು ಎಂಬ ಲೆಕ್ಕಾಚಾರ ತಲೆಯಲ್ಲಿ ಕೊರೆಯುತ್ತಿದೆಯೇ.. ನೀವು ಮಾಡಬೇಕಾಗಿದ್ದಿಷ್ಟೇ... ಆಸ್ತಿ ಖರೀದಿಗೆ ಇದೀಗ ಅನೇಕ ಬ್ಯಾಂಕ್‌ಗಳು ಸುಲಭವಾಗಿ ಲೋನ್ ಸೌಲಭ್ಯ ನೀಡುತ್ತಿವೆ. ಇದಕ್ಕೆ ಕೆಲವು ನಿಯಮಗಳನ್ನು ಪಾಲಿಸಬೇಕು. ಜತೆಗೆ ಲೋನ್ ಪಡೆಯಲು ಬೇಕಾದ ಕನಿಷ್ಟ ಮಾಹಿತಿ ಇರಬೇಕು.

ಮೊದಲಿಗೆ ನಾವು ಎಷ್ಟು ಸಾಲ ಪಡೆಯಲು ಅರ್ಹರಾಗಿದ್ದೇವೆ ಎಂಬುದು ನಿರ್ಧಾರವಾಗಬೇಕು. ಸಾಲ ಪಡೆಯುವುದಷ್ಟೇ ಮುಖ್ಯ ಸಾಲ ಮರುಪಾವತಿ ಮಾಡುವುದು. ಇಲ್ಲವಾದರೆ ಸಾಲ ಮಾಡಿ ಹಾಲೋರಗ ಕುಡಿದಂತಾಗುತ್ತದೆ. ಮುಖ್ಯವಾಗಿ ಮಾಸಿಕ ವರಮಾನ, ಖರ್ಚು, ಹೆಚ್ಚಿನ ಆದಾಯ, ಇನ್ನಿತರ ಆಸ್ತಿ, ಸಂಗಾತಿ ಇದ್ದರೆ ಆಕೆ/ಆತನ ಆರ್ಥಿಕ ನೆರವಿನ ಮೇಲೆ ನಿರ್ಧರಿತವಾಗುತ್ತದೆ. ಬ್ಯಾಂಕ್‌ನಿಂದ ಸಾಲ ಪಡೆದಷ್ಟೆ ಮುಖ್ಯವಾಗಿ ಸಕಾಲಕ್ಕೆ ಮರುಪಾವತಿ ಮಾಡುವ ಸಾಮರ್ಥ್ಯವಿರಬೇಕು. ಸಾಮಾನ್ಯವಾಗಿ ಬ್ಯಾಂಕ್ ಅಧಿಕಾರಿಗಳು ನಿಮ್ಮ ಆದಾಯದ ಶೇ50 ರಷ್ಟು ಸಾಲ ನೀಡುವ ಬಗ್ಗೆ ಚಿಂತಿಸುತ್ತಾರೆ. ನಿಮ್ಮ ಆದಾಯ ಸಾಲಕ್ಕೆ ಕಟ್ಟಬೇಕಾದ ಬಡ್ಡಿದರದ ಮೇಲೆ ಅವಲಂಬಿತವಾಗಿರುತ್ತದೆ. ಜತೆಗೆ ಬ್ಯಾಂಕ್‌ಗಳು ಕೊಡಮಾಡುವ ಗೃಹ ಸಾಲ ವ್ಯಕ್ತಿಗಳ ವಯಸ್ಸನ್ನು ಮಾನದಂಡವಾಗಿ ಬಳಸುತ್ತವೆ. ಜತೆಗೆ ಸಾಲ ಪಡೆಯುವ ಗರಿಷ್ಟ ಮೊತ್ತ ನಿರ್ಧರಿತವಾಗುತ್ತದೆ. ಸಾಲ ಪಡೆಯುವ ಒಟ್ಟು ಮೊತ್ತ ನೋಂದಣಿ, ವರ್ಗಾವಣೆ ಹಾಗೂ ಸ್ಟಾಂಪ್ ಸುಂಕವನ್ನು ಒಳಗೊಂಡಿರುತ್ತದೆ.

ಮನೆ ಸಾಲ ಪಡೆಯಲು ಮುಖ್ಯವಾಗಿ ಅಗತ್ಯ ದಾಖಲೆಗಳನ್ನು ಒದಗಿಸಬೇಕು. ಛಾಯಾಚಿತ್ರದೊಂದಿಗೆ ಆಸ್ತಿ ಖರೀದಿಗೆ ಬೇಕಾದ ಎಲ್ಲಾ ಕಾನೂನು ರೀತಿಯ ದಾಖಲೆಗಳನ್ನು ನೀಡಬೇಕು. ನಿಮ್ಮ ಗುರುತು ಹಾಗೂ ಪ್ರಸ್ತುತ ನಿವಾಸದ ವಿಳಾಸ, ನೌಕರರಾಗಿದ್ದರೆ ಇತ್ತೀಚಿನ ಸಂಬಳದ ಚೀಟಿ, ಉದ್ಯೋಗದಾತರಿಂದ ಪಾಮಾಣಿಸಲ್ಪಟ್ಟ ದಾಖಲೆ, ಸ್ವಯಂ ಉದ್ಯೋಗಿಗಳಾಗಿದ್ದರೆ ಬ್ಯಾಲೆನ್ಸ್ ಶೀಟ್‌ಗೆ ತಾಳೆಯಾಗುವಂತೆ ಕಳೆದ 6 ತಿಂಗಳ ಬ್ಯಾಂಕ್ ಸ್ಟೇಟ್‌ಮೆಂಟ್ ಅಗತ್ಯ. ಜೀವ ವಿಮಾ ಪಾಲಿಸಿ, ಶೇರು, ಮ್ಯೂಚುವಲ್ ಫಂಡ್, ಬ್ಯಾಂಕ್ ಠೇವಣಿ ಮತ್ತಿತರ ಪೂರಕ ದಾಖಲೆಗಳಿದ್ದರೆ ಸಾಲ ಪಡೆಯುವುದು ಮತ್ತಷ್ಟು ಸುಲಭವಾಗುತ್ತದೆ. ಇವುಗಳನ್ನು ಭದ್ರತೆಯ ಆಧಾರದ ಮೇಲೆ ಬ್ಯಾಂಕ್‌ಗಳು ಸಾಲ ನೀಡಲು ಮುಂದೆ ಬರುತ್ತವೆ.

ಸಾಲವನ್ನು ಕಂತುಗಳಲ್ಲಿ ಅಥವಾ ಒಂದೇ ಬಾರಿ ಪಾವತಿಸುವ ಅವಕಾಶವಿರುತ್ತದೆ. ಕಟ್ಟಡ ನಿರ್ಮಾಣವಾಗಿದ್ದರೆ ನಿರ್ಮಾಣ ಹಂತದ ಪ್ರಗತಿ ಆಧಾರದ ಮೇಲೆ ಸಾಲದ ಹಣ ಬಿಡುಗಡೆಯಾಗುತ್ತದೆ. ಕಟ್ಟಡ ಮುಕ್ತಾಯ ಹಂತಕ್ಕೆ ಬರುತ್ತಿದ್ದಂತೆ ಸಾಲದ ಪೂರ್ಣ ಪ್ರಮಾಣದ ಹಣ ಕೈಸೇರುತ್ತದೆ.

ಏ.1 2016ರ ಬಳಿಕ ಗೃಹ ಸಾಲ ಸೇರಿ ಎಲ್ಲಾ ಆಸ್ತಿ ಸಾಲಗಳಿಗೆ ನಿಧಿ ಆಧಾರಿತ ಸಾಲದ ದರ ನಿಗಧಿಪಡಿಸಲಾಗಿದೆ. ಕನಿಷ್ಟ ವೆಚ್ಚ ಎಂದು ಕರೆಯಲ್ಪಡುವ ಬ್ಯಾಂಕ್ ಸಾಲಕ್ಕೆ ಹೊಸ ವಿಧಾನ ಅಳವಡಿಸಲಾಗಿದೆ. 2016 ರ ಬಳಿಕ ಪಡೆಯುವ ಸಾಲಕ್ಕೆ ಎಂಸಿಎಲ್‌ಆರ್ ಲಿಂಕ್ಡ್ ಸಾಲ ಪಡೆಯಲು ಮಾತ್ರ ಅವಕಾಶ ಕಲ್ಪಿಸಲಾಗಿದೆ. ತಿಂಗಳು, 3 ತಿಂಗಳು, 1 ವರ್ಷ ಅಥವಾ 3 ವರ್ಷ ಹೀಗೆ ಸಾಲದ ದರವನ್ನು ಪ್ರತಿ ತಿಂಗಳು ಎಂಸಿಎಲ್‌ಆರ್ ಸೇರಿಸುವ ಮೂಲಕ ಸಾಲದ ದರ ನಿರ್ಧರಿಸಲ್ಪಡುತ್ತದೆ. ಹಾಗಾಗಿ 1 ವರ್ಷದ ದರವನ್ನು ಎಂಸಿಎಲ್‌ಆರ್ ಶೇ 8.5ರಷ್ಟು ವಿಸ್ತರಿಸುವ ಅವಕಾಶವಿರುತ್ತದೆ. ಬಹುತೇಕ ಎಂಸಿಎಲ್‌ಆರ್ ಲಿಂಕ್ಡ್ ಸಾಲ ಒಪ್ಪಂದಗಳಿಗೆ ಬ್ಯಾಂಕ್‌ಗಳು 12 ತಿಂಗಳ ನಂತರ ಮರುಹೊಂದಿಸುತ್ತವೆ. ರಿಸರ್ವ್ ಬ್ಯಾಂಕ್ ಅಥವಾ ಬ್ಯಾಂಕ್‌ಗಳ ಯಾವುದೇ ಪರಿಷ್ಕರಣೆಯೂ ಮಾಸಿನ ಕಂತುಗಳನ್ನು (ಇಎಂಐ)ಅವಲಂಬಿಸುತ್ತವೆ. ತ್ರೈಮಾಸಿಕ ಅಥವಾ ಅರ್ಧ ವಾರ್ಷಿಕ ಸಾಲ ಮರುಪಾವತಿ ಸಾಲಗಾರರಿಗೆ ಅನುಕೂಲ ಎಂಬುದು ಬ್ಯಾಂಕ್ ಅಧಿಕಾರಿಗಳ ಸಲಹೆ. ಏಕೆಂದರೆ ಆರ್‌ಬಿಐ ರೆಪೋ ದರ ಹೆಚ್ಚಿಸಿದರೆ ಎಂಸಿಎಲ್‌ಆರ್ ಕೂಡ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ.

ಗೃಹ ಮತ್ತಿತರ ಆಸ್ತಿ ಖರೀದಿಗೆ ಬ್ಯಾಂಕ್‌ಗಳು ನೀಡುವ ಸಾಲವನ್ನು ಕಂತುಗಳ ಆಧಾರದ ಮೇಲೆ ಮರುಪಾವತಿ ಮಾಡಲು ಅವಕಾಶ ನೀಡುತ್ತವೆ. ಇದಕ್ಕೆ ಇಎಂಐ ಸೌಲಭ್ಯ ಎಂದು ಕರೆಯಲಾಗುತ್ತದೆ. ಪಡೆಯುವ ಸಾಲದ ಮೊತ್ತ, ಅದನ್ನು ಮರುಪಾವತಿಸುವ ಕಾಲಾವಧಿಯ ಮೇಲೆ ಬಡ್ಡಿದರ ನಿಗಧಿಯಾಗುತ್ತದೆ. ಸಾಲ ಮರುಪಾವತಿಗೆ ಕೆಲವೊಂದು ವಿಧಾನಗಳಿವೆ. ಮೊದಲನೆಯದಾದಿ ಇಸಿಎಸ್ (ಎಲೆಕ್ಟ್ರಾನಿಕ್ ಕ್ಲಿಯರಿಂಗ್ ಸಿಸ್ಟಂ) ಅಥವಾ ಸಂಬಳದ ಖಾತೆಯಿಂದ ಪೋಸ್ಟ್ ಡೇಟ್ ಚೆಕ್‌ಗಳ ಮೂಲಕ ಸಾಲ ಮರುಪಾವತಿ ಮಾಡಬಹುದಾಗಿದೆ. ಪ್ರತಿ ತಿಂಗಳು ಸಾಲ ಮರುಪಾವತಿಯಾಗುತ್ತಿದ್ದಂತೆ, ಪಡೆದ ಸಾಲದ ಮೊತ್ತದ ಪ್ರಮಾಣವೂ ಕಡಿಮೆಯಾಗುತ್ತದೆ. ಕಡಿಮೆಯಾದ ಮೊತ್ತದ ಆಧಾರದ ಮೇಲೆ ಬಡ್ಡಿದರವೂ ಕಡಿಮೆಯಾಗುತ್ತದೆ.

ಗೃಹ ಸಾಲದ ಹೊಣೆಗಾರಿಕೆಗೆ ವಿಮೆ ಸೌಲಭ್ಯ ಪಡೆಯುವ ಅವಕಾಶವಿದೆ. ನಿರ್ಧಿಷ್ಟ ಅವಧಿಗೆ ಸಾಲದ ಮೊತ್ತಕ್ಕೆ ಸಮನಾದ ಮೊತ್ತಕ್ಕೆ ಶುದ್ಧ ಟರ್ಮ್ ಇನ್ಸ್‌ರೆನ್ಸ್ ಯೋಜನೆ ಅಥವಾ ಅಡಮಾನ ವಿಮಾ ಯೋಜನೆ ಪಡೆಯಬಹುದು. ಇಂಥ ಯೋಜನೆ ಪಡೆಯಲು ಒಂದೇ ಪ್ರೀಮಿಯಂ ಅಥವಾ ನಿಯಮಿತ ಪ್ರೀಮಿಯಂಗಳನ್ನು ಪಡೆಯಲು ಅವಕಾಶವಿದೆ.

ಗೃಹ ಸಾಲ ಪಡೆಯುವುದರಿಂದ ಕೆಲವು ತೆರಿಗೆ ಪ್ರಯೋಜನಗಳನ್ನು ಪಡೆಯಬಹುದು. ಒಟ್ಟು ವಾರ್ಷಿಕ ಇಎಂಐಗಳಲ್ಲಿ ತೆರಿಗೆ ಕಾಯ್ದೆ ಸೆಕ್ಷನ್ 80 ಸಿ ಅಡಿಯಲ್ಲಿ ತೆರಿಗೆ ಪ್ರಯೋಜನಕ್ಕೆ ಅವಕಾಶವಿದೆ. 1.5 ಲಕ್ಷ ರೂಪಾಯಿಯಿಂದ 2 ಲಕ್ಷರೂ ವರೆಗೆ ತೆರಿಗೆ ಪ್ರಯೋಜನಕ್ಕೆ ಅವಕಾಶವಿದೆ.

ಬ್ಯಾಂಕ್ ಸೌಲಸೌಲಭ್ಯ ಸೇರಿ ಬ್ಯಾಂಕ್ ವ್ಯವಹಾರದ ಬಗ್ಗೆ ಯಾವುದೇ ದೂರುಗಳಿದ್ದರೂ ಅದನ್ನು ನೇರವಾಗಿ ಸಂಬಂಧಪಟ್ಟ ಅಧಿಕಾರಿಗಳ ಗಮನಕ್ಕೆ ತರಬಹುದು. ಬಹುತೇಕ ಬ್ಯಾಂಕ್‌ಗಳಲ್ಲಿ ಲಿಖಿತ ದೂರು ದಾಖಲಿಸಿ ಸ್ವೀಕೃತಿ ಪಡೆಯುವ ಅವಕಾಶ ಕಲ್ಪಿಸಲಾಗಿದೆ. ದೂರ ಸ್ವೀಕರಿಸುವ ಅಧಿಕೃತ ದಾಖಲೆ ಪಡೆಯಬಹುದು. 30 ದಿನಗಳಲ್ಲಿ ಯಾವುದೇ ಪ್ರತಿಕ್ರಿಯೆ ಬರದಿದ್ದರೆ ನೇರವಾಗಿ ಬ್ಯಾಂಕ್ ಸಾರ್ವಜನಿಕ ತನಿಖಾಧಿಕಾರಿಯನ್ನು ಸಂಪರ್ಕಿಸಬಹುದು.