ಗ್ರಾಮೀಣ ಮಕ್ಕಳಿಗಿಲ್ಲ ಕ್ರೀಡಾಂಗಣ ಭಾಗ್ಯ

ನೆಲಮಂಗಲ ತಾಲೂಕಿನಲ್ಲಿ ದೊಡ್ಡ ಹೋಬಳಿ ಎನಿಸಿರುವ ತ್ಯಾಮಗೊಂಡ್ಲು ಹೋಬಳಿಯಲ್ಲಿ ಸುಸಜ್ಜಿತ ಕ್ರೀಡಾಂಗಣವಿಲ್ಲ, ಸಮರ್ಪಕ ಆಟದ ಮೈದಾನವೂ ಇಲ್ಲ. ಇದರಿಂದ ಹೋಬಳಿಯ ಗ್ರಾಮೀಣ ಮಕ್ಕಳಿಗೆ ಕೆರೆ ಬಯಲು, ಗದ್ದೆ ಬಯಲುಗಳೇ ಆಟದ ಮೈದಾನವಾಗಿ ಬಳಕೆಯಾಗುತ್ತಿವೆ. ಇದರಿಂದ ಗ್ರಾಮೀಣ ಕ್ರೀಡಾ ಪ್ರತಿಭೆಗಳಿಗೆ ಸೂಕ್ತ ವೇದಿಕೆ ದೊರೆಯುತ್ತಿಲ್ಲ ಎಂಬ ಅಳಲು ಕೇಳಿಬರುತ್ತಿದೆ.

ಹೋಬಳಿ ವ್ಯಾಪ್ತಿಯಲ್ಲಿ 25 ಹೆಚ್ಚು ಪ್ರಾಥಮಿಕ ಹಾಗೂ ಪ್ರೌಢಶಾಲೆಗಳಿದ್ದು ಎರಡು ಕಾಲೇಜುಗಳಿವೆ, ಸಾವಿರಾರು ವಿದ್ಯಾರ್ಥಿಗಳಿದ್ದಾರೆ. ಆದರೆ ಕೆಲವು ಶಾಲೆಗಳಲ್ಲಿ ಆಟದ ಮೈದಾನವೇ ಇಲ್ಲ. ಕೆಲವು ಶಾಲೆಗಳಲ್ಲಿ ಮೈದಾನವಿದ್ದರೂ ಶಾಲಾ ಮಕ್ಕಳಿಗೆ ಹೊರತು ಪಡಿಸಿ ಬೇರೆ ಯಾರಿಗೂ ಅವಕಾಶವಿಲ್ಲ. ಅಲ್ಲದೆ ಸಂಜೆ ಬಳಿಕ ಮೈದಾನಕ್ಕೆ ಪ್ರವೇಶ ನಿಷೇಧವಿರುತ್ತದೆ. ಇನ್ನು ದಸರಾ, ಬೇಸಿಗೆ ರಜೆ ವೇಳೆಯಲ್ಲಿ ಎಲ್ಲ ಶಾಲೆಗಳ ಆವರಣಕ್ಕೆ ಪ್ರವೇಶ ನಿಷೇಧಿಸುವುದರಿಂದ ಮಕ್ಕಳು ಆಟವಾಡಲು ಬಯಲನ್ನೇ ಅವಲಂಬಿಸಬೇಕಾಗಿದೆ.

ಗ್ರಾಮೀಣ ಪ್ರದೇಶಗಳಲ್ಲಿ ಆಡಲು ಜಾಗವೇ ಇಲ್ಲದಂತಾಗಿ ಮಕ್ಕಳು ಮೊಬೈಲ್‌ನತ್ತ ಮುಖ ಮಾಡುತ್ತಿದ್ದಾರೆ, ಸರ್ಕಾರವೇನೋ ಮಕ್ಕಳನ್ನು ಮೊಬೈಲ್ ಬಳಸದಂತೆ ಆದೇಶ ಹೊರಡಿಸಲು ಸಿದ್ದವಾಗುತ್ತಿದ್ದಾರೆ ಆದರೆ ಮಕ್ಕಳಿಗೆ ಬೇಕಾದ ಮೂಲ ಸೌಕರ್ಯ ಒದಗಿಸಲು ಉದಾಸೀನ ಮಾಡುತ್ತಿದೆ. ಇದು ಮಕ್ಕಳ ದೈಹಿಕ ಮತ್ತು ಮಾನಸಿಕ ಬೆಳವಣಿಗೆಯ ಮೇಲೆ ಪರಿಣಾಮ ಬೀರುತ್ತಿದೆ. ಜನಸಂಖ್ಯಾ ಸ್ಫೋಟ, ಕೃಷಿ ಭೂಮಿಯ ಬಳಕೆ, ನಿರ್ವಹಣೆಯ ಕೊರತೆ ಮತ್ತು ಕಂದಾಯ ಇಲಾಖೆ-ಪಂಚಾಯತ್ ನಡುವಿನ ಜಟಾಪಟಿಯಿಂದಾಗಿ ಹಳ್ಳಿಗಳಲ್ಲಿ ಆಟದ ಸ್ಥಳಗಳು ಕಡಿಮೆಯಾಗುತ್ತಿವೆ, ಇದರಿಂದಾಗಿ ಮಕ್ಕಳು ರಸ್ತೆ ಅಥವಾ ಅಸುರಕ್ಷಿತ ಸ್ಥಳಗಳಲ್ಲಿ ಆಡುವಂತಾಗಿದೆ. ಒಲಂಪಿಕ್, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಚ್ಚಿನ ಪದಕ ನಿರೀಕ್ಷಿಸುವ ಜನನಾಯಕರು, ಆಡಳಿತಗಾರರು ಮೂಲ ಸೌಕರ್ಯವಾದ ಆಟದ ಮೈದಾನ, ಉಪಕರಣಗಳನ್ನು ಪೂರೈಸುವಲ್ಲಿ ನಿರ್ಲಕ್ಷ್ಯವಹಿಸುತ್ತಿದ್ದಾರೆ ಎಂಬುದು ಗ್ರಾಮೀಣ ಭಾಗದ ಕ್ರೀಡಾಪಟುಗಳ ಆರೋಪವಾಗಿದೆ.

ಶಿಕ್ಷಣ ಹಕ್ಕು ಕಾಯ್ದೆಯಡಿ ಕಡ್ಡಾಯವಿದ್ದರೂ, ಶಾಲೆಗಳಲ್ಲಿ ಆಟದ ಮೈದಾನಗಳಿಲ್ಲ. ಗ್ರಾಮೀಣ ಭಾಗದಲ್ಲಿ ಆಟದ ಮೈದಾನಗಳ ನಿರ್ಮಾಣ ಮತ್ತು ನಿರ್ವಹಣೆಯು ಸ್ಥಳೀಯ ಸಂಸ್ಥೆಗಳ ಆದ್ಯತೆಯಾಗಬೇಕಿದೆ. ಆದರೆ ಯಾರು ಈ ಹೊಣೆ ಹೊರಲು ಮುಂದೆ ಬರುತ್ತಿಲ್ಲ. ಯುವ ಜನರ ಮೆಚ್ಚಿನ ಕ್ರೀಡೆಯಾದ ಕ್ರಿಕೆಟ್‌ಗೆ ಹೆಚ್ಚಿನ ಜಾಗ ಬೇಕು, ಇದಕ್ಕೆ ಹೋಬಳಿ ಮಟ್ಟದಲ್ಲಿ ಹತ್ತಾರು ಗ್ರಾಮಗಳಿಗೆ ಒಂದರಂತೆ ಕೇಂದ್ರೀಕೃತ ಕ್ರೀಡಾಂಗಣ ನಿರ್ಮಿಸಿದರೆ ಯುವ ಕ್ರೀಡಾಪಟುಗಳಿಗೆ ಆಸರೆಯಾಗಲಿದೆ ಎಂಬ ಒತ್ತಾಯ ಕೇಳಿಬರುತ್ತಿದೆ.

ಹೋಬಳಿ ವ್ಯಾಪ್ತಿಯಲ್ಲಿ ಸಾಕಷ್ಟು ಸರ್ಕಾರಿ ಗೋಮಾಳ ಹಾಗೂ ಸರ್ಕಾರಿ ಕಂದಾಯ ಭೂಮಿ ಇದ್ದರೂ ಕೆಲವು ಖಾಸಗಿ ಒತ್ತುವರಿಯಿಂದಾಗಿ ಕಣ್ಮರೆಯಾಗುತ್ತಿವೆ, ಕೆಲವು ಕಡೆಗಳಲ್ಲಿ ಮೈದಾನಗಳಿದ್ದರೂ, ಅವುಗಳಲ್ಲಿ ಕಸ, ಮಣ್ಣಿನ ರಾಶಿ, ಅಥವಾ ಮುಳ್ಳುಗಿಡಗಳು ತುಂಬಿ ಆಡಲು ಯೋಗ್ಯವಾಗಿರುವುದಿಲ್ಲ. ಮುಕ್ತ ಜಾಗಗಳನ್ನು ಕೃಷಿ ಚಟುವಟಿಕೆ ಅಥವಾ ಮನೆ ನಿರ್ಮಾಣಕ್ಕೆ ಬಳಸಿಕೊಳ್ಳುತ್ತಿರುವುದರಿಂದ ಮಕ್ಕಳ ಕ್ರೀಡಾಚಟುವಟಿಕೆಗಳಿಗೆ ಅವಕಾಶವಿಲ್ಲದಂತಾಗಿದೆ. ಮೈದಾನದ ಕೊರತೆಯಿಂದಾಗಿ ಮಕ್ಕಳು ರಸ್ತೆಗಳು, ಕೆರೆ ದಂಡೆ ಅಥವಾ ಕೃಷಿಭೂಮಿಯಲ್ಲಿ ಆಟವಾಡುವಂತ ಸನ್ನಿವೇಶಗಳು ಕಂಡುಬರುತ್ತಿವೆ.

ಯುವಜನತೆಗೆ ಕ್ರೀಡಾಂಗಣ ಅತಿ ಅವಶ್ಯವಾಗಿದೆ. ವಿದ್ಯಾರ್ಥಿಗಳು, ಉದ್ಯೋಗಿ ಯುವ ಜನರು ಕನಿಷ್ಠ ವಾರಾಂತ್ಯದಲ್ಲಿ ಮೈದಾನದ ಕಡೆ ಮುಖ ಮಾಡಿ ಆಟದಲ್ಲಿ ತೊಡಗಿಸಿಕೊಂಡರೆ ದೈನಂದಿನ ಯಾಂತ್ರಿಕ ಜೀವನಕ್ಕೆ ಟಾನಿಕ್ ಸಿಕ್ಕಂತೆ ಆಗುತ್ತದೆ. ಆದರೆ ಕ್ರೀಡಾ ಮೈದಾನದ ಕೊರತೆಯಿಂದಾಗಿ ಮಕ್ಕಳು ಮೊಬೈಲ್ ಗೀಳಿಗೆ ತುತ್ತಾಗುತ್ತಾ ಬೊಜ್ಜಿನ ಪ್ರಮಾಣ ಹೆಚ್ಚಾಗಿ ಸಣ್ಣ ವಯಸ್ಸಿನಲ್ಲೆ ವಿಚಿತ್ರ ರೋಗಗಳಿಗೆ ಈಡಾಗುತ್ತಿದ್ದಾರೆ. ಸರ್ಕಾರ ಗಮನ ಹರಿಸಿ ಕ್ರೀಡಾಂಗಣದ ವ್ಯವಸ್ಥೆ ಮಾಡಬೇಕಾಗಿದೆ.

ಇಡೀ ನೆಲಮಂಗಲ ತಾಲೂಕಿನಲ್ಲಿ ಒಂದೇ ಕ್ರೀಡಾಂಗಣವಿದ್ದು ಹೋಬಳಿಯ ಕ್ರೀಡಾಪಟುಗಳು ನೆಲಮಂಗಲಕ್ಕೆ ಹೋಗಿ ಅಭ್ಯಾಸ ಮಾಡಲು ಕಷ್ಟಸಾಧ್ಯ, ಹೋಬಳಿ ಮಟ್ಟದಲ್ಲೇ ಕನಿಷ್ಟ ಸೌಲಭ್ಯದ ಕ್ರೀಡಾಂಗಣದ ವ್ಯವಸ್ಥೆ ಮಾಡಿದರೆ ಸುತ್ತಮುತ್ತಲ ಗ್ರಾಮಗಳ ಕ್ರೀಡಾಪಟುಗಳು ಅಭ್ಯಾಸ ಮಾಡಲು ಅನುಕೂಲವಾಗುತ್ತದೆ.