ಕಾಶಿ ದರ್ಶನದ ಕನವರಿಕೆಯಲ್ಲೇ ಹೊಯ್ತು ಪ್ರಾಣ

ತಿಪಟೂರಿನ ವಿದ್ಯಾನಗರ ಜಯಮ್ಮ (65), ಯಶೋದಮ್ಮ (60) ಮತ್ತು ಗಂಗಾ (38) ಮೃತರು.

ತಿಪಟೂರಿನ ವಿದ್ಯಾನಗರದಿಂದ ಟೆಂಪೋ ಟ್ರಾವಲ್ಸ್​ನಲ್ಲಿ ಹೊರಟು ದೇವನಹಳ್ಳಿ ಕೆಂಪೇಗೌಡ ವಿಮಾನ ನಿಲ್ದಾಣದಿಂದ ಮಾ.22ರ ಮುಂಜಾನೆ 6.30ರ ವಿಮಾನದಲ್ಲಿ ವಾರಾಣಸಿಗೆ ಹೋಗಿ ಅಯೋಧ್ಯೆ ಕಣ್ತುಂಬಿಕೊಂಡು ಬರಲು ಸ್ತ್ರೀಶಕ್ತಿ ಸಂದ 12 ಮಹಿಳೆಯರು ಪ್ರವಾಸ ಹೊರಟಿದ್ದರು.

ಈ ವೇಳೆ ಏರ್​ ಪೋರ್ಟ್​ಗೆ ಬಿಟ್ಟುಬರಲು ಗಂಗಾ ಪತಿ ಶ್ರೀಕಾಂತ್​, ಬಾಲಕಿ ವೃಷ್ಣವಿ ವಾಹನದಲ್ಲಿದ್ದರು. ದೇವನಹಳ್ಳಿಯ ರಾಣಿ ವೃತ್ತದ ಬಳಿ ಸಾಗುವಾಗ ಸಂದ ಸದಸ್ಯರಿಂದ ಟಿಟಿ ವಾಹನಕ್ಕೆ ಲಾರಿ ಡಿಕ್ಕಿಯಾಗಿದೆ. ಅಪಘಾತದ ತೀವ್ರತೆಗೆ ಮೂವರು ಸ್ಥಳದಲ್ಲೇ ಮೃತಪಟ್ಟರೆ, ಗಂಭೀರವಾಗಿ ಗಾಯಗೊಂಡ ಕೆಂಪಮ್ಮ, ಶ್ರೀಕಾಂತ್​, ವೈಷ್ಣವಿ, ಚಂದ್ರಮ್ಮ ಅವರನ್ನು ದೇವನಹಳ್ಳಿಯ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಸಾವು ಬದುಕಿನ ನಡುವೆ ಹೋರಾಡುತ್ತಿದ್ದಾರೆ.

ಪುಷ್ಪಾರಾಣಿ, ಚಂದ್ರಮ್ಮ, ಕಳ್ಳು ಜಯಮ್ಮ, ಪದ್ಮಮ್ಮ, ಉಮಾ, ಸುಶೀಲಮ್ಮ, ಪ್ರಿಯಾಂಕಾ, ಚಂದ್ರಕಲಾ ಮತ್ತು ಟಿ.ಟಿ. ವಾಹನ ಚಾಲಕ ರವಿತೇಜಗೆ ಸಣ್ಣಪುಟ್ಟ ಗಾಯವಾಗಿದ್ದು, ಎಲ್ಲರೂ ಬೇರೆ ಬೇರೆ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆದಿದ್ದಾರೆ.ಅಪಘಾತದ ರಭಸಕ್ಕೆ ಟಿಟಿ ವಾಹನದ ಎಡಭಾಗ ಸಂಪೂರ್ಣ ಕಿತ್ತುಬಂದಿದೆ.

ಮೂವರ ಶವಗಳನ್ನು ಆಕಾಶ್​ ಆಸ್ಪತ್ರೆಯ ಶವಾಗಾರದಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಿ ಕುಟುಂಬಸ್ಥರಿಗೆ ಹಸ್ತಾಂತರಿಸಿರುವ ದೇವನಹಳ್ಳಿ ಸಂಚಾರ ಠಾಣೆ ಇನ್​ಸ್ಪೆಕ್ಟರ್​ ಮುರಳೀಧರ್​ ತಂಡ, ತಮಿಳುನಾಡು ಮೂಲದ ಲಾರಿಯನ್ನು ವಶಕ್ಕೆ ಪಡೆದು ಪ್ರಕರಣ ದಾಖಲಿಸಿಕೊಂಡಿದೆ. ಲಾರಿ ಚಾಲಕ ಪರಾರಿಯಾಗಿದ್ದಾನೆ.