ಹೊಸಹಳ್ಳಿ ಪೊಲೀಸ್ ಠಾಣೆ ಮಾದರಿ

ದೊಡ್ಡಬಳ್ಳಾಪುರ ತಾಲೂಕು ಹೊಸಹಳ್ಳಿ ಪೊಲೀಸ್ ಠಾಣೆ ಸಾರ್ವಜನಿಕ ವಲಯದಲ್ಲಿ ಮಾದರಿ ಠಾಣೆಯಾಗಿ ಹೆಸರುಗಳಿಸಿದೆ. ಇಲ್ಲಿನ ಇನ್‌ಸ್ೆಕ್ಟರ್ ರಾವ್‌ಗಣೇಶ್ ಜನಾರ್ಧನ್ ಅವರ ಇಚ್ಛಾಶಕ್ತಿ ಲವಾಗಿ ತಾಲೂಕಿನಲ್ಲೇ ಪೊಲೀಸ್ ಠಾಣೆ ವಿಶೇಷ ಎನಿಸಿದೆ.

ಪೊಲೀಸರೆಂದರೆ ಭಯಬೇಡ ಎಂಬುದು ಪೊಲೀಸ್ ಸಿಬ್ಬಂದಿ ಕಾಲರ್‌ಟ್ಯೂನ್‌ನಲ್ಲಿ ಆರಂಭದಲ್ಲೇ ಕೇಳಿಬರುವ ಧ್ವನಿಯಾಗಿದೆ ಇದಕ್ಕೆ ಪೂರಕವೆಂಬಂತೆ ಹೊಸಹೊಳ್ಳಿ ಠಾಣೆ ಜನಸ್ನೇಹಿಯಾಗಿದೆ. ಕೇವಲ ಪ್ರಕರಣಗಳ ಇತ್ಯರ್ಥ, ದೂರು ಪಡೆಯುವುದು, ಕಳ್ಳಕಾರರನ್ನು ಹಿಡಿಯುವುದೇ ಅಲ್ಲದೆ ಇಲ್ಲಿನ ಸಿಬ್ಬಂದಿ ಜನಪರ ಕೆಲಸಗಳ ಮೂಲಕ ಗಮನ ಸೆಳೆದಿದ್ದಾರೆ.

ಠಾಣೆಯಲ್ಲಿ ಮುಕ್ತ ಗ್ರಂಥಾಲಯ:

ಪೊಲೀಸ್ ಸಿಬ್ಬಂದಿ, ಸಾರ್ವಜನಿಕರು ಹಾಗೂ ವಿದ್ಯಾರ್ಥಿಗಳು ಮುಕ್ತವಾಗಿ ಬಳಸಬಹುದಾದ ವಿಶೇಷ ಗ್ರಂಥಾಲಯ ಈ ಠಾಣೆಯಲ್ಲಿ ಸ್ಥಾಪಿತವಾಗಿರುವುದು ವಿಶೇಷಗಳಲ್ಲೊಂದಾಗಿದೆ. ವಿವಿಧ ಸಾಹಿತ್ಯ, ಸಂಸ್ಕೃತಿ,ಕಲೆ, ವೈದ್ಯಕೀಯ, ರಾಜಕೀಯ ಮೇರುವ್ಯಕ್ತಿಗಳ ಜೀವನ ಚರಿತ್ರೆ ಸೇರಿ ವಿವಿಧ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಅನುಕೂಲವಾಗುವಂತ 100ಕ್ಕೂ ಹೆಚ್ಚು ಪುಸ್ತಕ ಭಂಡಾರವಿದೆ. ಕುಳಿತು ಓದಲು ಸೂಕ್ತ ಆಸನದ ವ್ಯವಸ್ತೆ, ರಾತ್ರಿ ವೇಳೆ ಬೆಳಕಿನ ವ್ಯವಸ್ಥೆ ಇದ್ದು, ಓದುಗರಲ್ಲಿ ಸಾಹಿತ್ಯದ ಅಭಿರುಚಿ ಬೆಳೆಸುವಲ್ಲಿ ಖಾಕಿ ಪಡೆ ಇಚ್ಛಾಶಕ್ತಿ ಪ್ರದರ್ಶಿಸಿದೆ.

8 ಅಡಿಯ ಭುವನೇಶ್ವರಿ ಪ್ರತಿಮೆ:

ಠಾಣೆ ಆವರಣದಲ್ಲಿ ವರ್ಣರಂಜಿತ ಕಾರಂಜಿ ಮೇಲೆ 8 ಅಡಿಯ ಭುವನೇಶ್ವರಿ ದೇವಿ ಪ್ರತಿಮೆಯನ್ನು ಸ್ಥಾಪಿಸಿರುವುದು ಕನ್ನಡಪರ ಕಾಳಜಿಯನ್ನು ತೋರಿಸುತ್ತದೆ. ಕನ್ನಡ ರಾಜ್ಯೋತ್ಸವದಂದು ವಿಶೇಷವಾಗಿ ಆಚರಣೆ ಮಾಡಿಕೊಂಡು ಬರುವ ಸಂಪ್ರದಾಯಕ್ಕೆ ನಾಂದಿ ಹಾಡಲಾಗಿದೆ. ಪ್ರತಿನಿತ್ಯ ಸಿಬ್ಬಂದಿ ಕನ್ನಡತಾಯಿಗೆ ನಮಿಸಿ ಕರ್ತವ್ಯಕ್ಕೆ ಹಾಜರಾಗುತ್ತಾರೆ. ಹಾಗೆಯೇ ಠಾಣೆಗೆ ಬರುವ ಪ್ರತಿ ಸಾರ್ವಜನಿಕರನ್ನು ಕನ್ನಡ ತಾಯಿ ಭುವನೇಶ್ವರಿ ಎದುರುಗೊಳ್ಳುತ್ತಾರೆ.

ಠಾಣೆ ಆವರಣ ಕಾನನ:

ರಾವ್‌ಗಣೇಶ್ ಅವರು ಹೊಸಹಳ್ಳಿ ಠಾಣೆಗೆ ನಿಯುಕ್ತಿ ಆದ ಬಳಿಕ ಠಾಣೆಗೆ ಹೊಸರೂಪ ನೀಡಲು ಅವಿತರ ಶ್ರಮಿಸಿದ್ದಾರೆ. ಇದಕ್ಕೂ ಮೊದಲು ಠಾಣೆ ಆವರಣದ ಸುತ್ತ ಗಿಡಗಂಟಿಗಳು ಬೆಳೆದು ಹಾವು ಮತ್ತಿತರ ಸರೀಸೃಪಗಳ ಆವಾಸಸ್ಥಾನವಾಗಿತ್ತು. ಗಣೇಶ್ ನೇತೃತ್ವದಲ್ಲಿ ಇವುಗಳನ್ನು ಸ್ವಚ್ಛಗೊಳಿಸಿ ಹೂ,ಹಣ್ಣುಗಳ ಸಸಿಗಳನ್ನು ನೆಡಿಸಿ ಕಾನನವನ್ನಾಗಿ ಮಾರ್ಪಾಡಿಸಿದರು. ಸಸಿಗಳಿಗೆ ನಿತ್ಯ ನೀರಿನ ಪೂರೈಕೆಗಾಗಿ ಹನಿನೀರಾವರಿ ಅಳವಡಿಸುವ ಮೂಲಕ ಪರಿಸರಪ್ರಜ್ಞೆ ಪ್ರದರ್ಶಿಸಿದ್ದಾರೆ.

ಬುದ್ಧನ ಸಂದೇಶ:

ಪೊಲೀಸ್ ಠಾಣೆ ಎಂದರೆ ಸದಾ ಬಿಜಿಯ ತಾಣ, ಅಪರಾಧಿಗಳು, ಆರೋಪಿಗಳು ಇರುವ ಸ್ಥಳ, ಸದಾ ಗದ್ದಲದ ವಾತಾವರಣ ಸಹಜ ಈ ಹಿನ್ನೆಲೆಯಲ್ಲಿ ಠಾಣೆ ಎಂದರೆ ಇದಷ್ಟೇ ಅಲ್ಲ ಶಾಂತಿ ಸೌಹಾರ್ದತೆಯೂ ಅಡಕವಾಗಿರಬೇಕು ಎಂಬ ಸಂದೇಶ ಸಾರಲು ಬುದ್ದನ ಪ್ರತಿಮೆ ಸ್ಥಾಪಿಸಲಾಗಿದೆ. ಠಾಣೆಗೆ ಬಂದವರಿಗೆ ಶಾಂತಿ, ನ್ಯಾಯ ದೊರಕಿಸಿಕೊಡುವ ಪ್ರಯತ್ನ ಮಾಡಲಾಗುವುದು ಎಂಬುದರ ಸಂಕೇತದಂತಿದೆ.

ಸೋಲಾರ್ ಆಧಾರಿತ ಸಿಸಿ ಕ್ಯಾಮರಾ:

ಠಾಣಾ ವ್ಯಾಪ್ತಿಯಲ್ಲಿ ಅಪರಾಧ ಪ್ರಕರಣಗಳನ್ನು ಕಟ್ಟುನಿಟ್ಟಾಗಿ ನಿಯಂತ್ರಿಸಬೇಕು ಎಂಬ ಉದ್ದೇಶದಿಂದ ಮೊದಲ ಬಾರಿಗೆ ಠಾಣಾ ವ್ಯಾಪ್ತಿಯಲ್ಲಿ 23ಕ್ಕೂ ಹೆಚ್ಚು ಸೋಲಾರ್ ಸಿಸಿ ಕ್ಯಾಮರಾಗಳನ್ನು ಅಳವಡಿಸಿದ್ದು ಇನ್‌ಸ್ೆಕ್ಟರ್ ಹೆಗ್ಗಳಿಕೆಯಾಗಿದೆ. ಹೊಸಹಳ್ಳಿ, ಅರೂಪಿ ಪಂಚಾಯಿತಿ ಹಾಗೂ ದಾನಿಗಳ ಸಹಾಯ ಪಡೆಯಲಾಗಿದೆ. ಠಾಣಾ ವ್ಯಾಪ್ತಿಯ ಕೆಲವು ಕಡೆಗಳಲ್ಲಿನ ರಸ್ತೆಗಳಲ್ಲಿ ದೊಡ್ಡ ಹಳ್ಳಗಳಿಂದ ಆಗುತ್ತಿದ್ದ ಅಪಘಾತಗಳನ್ನು ತಪ್ಪಿಸಲು ಸಾರ್ವಜನಿಕರ ಸಹಕಾರ ಪಡೆದು ಗುಂಡಿಗಳನ್ನು ಮುಚ್ಚುವ ಕೆಲಸ ಮಾಡಲಾಗಿದೆ.

ರಿಪ್ಲೆಕ್ಟರ್ ಅಳವಡಿಕೆ:

ಹೊಸಹಳ್ಳಿ-ದೊಡ್ಡಬಳ್ಳಾಪುರ ಘಾಟ್ ರಸ್ತೆಯ ತಿರುವುಗಳಲ್ಲಿ ಅಪಘಾತಗಳು ಹೆಚ್ಚುತ್ತಿದ್ದರಿಂದ ರಾತ್ರಿ ವೇಳೆ ಸಂಚರಿಸುವ ವಾಹನ ಸವಾರಿಗೆ ಗೋಚರಿಸುವಂತೆ ತಡೆಗೋಡೆಗಳಿಗೆ ರಿಪ್ಲೆಕ್ಟರ್ ಅಳವಡಿಸುವ ಕಾರ್ಯದ ಮೂಲಕ ಜನಮೆಚ್ಚುಗೆ ಪಡೆದಿದ್ದಾರೆ. ಬಸ್‌ತಂಗುದಾಣಗಳಲ್ಲಿ ಸೌರದೀಪದ ಕೊಡುಗೆ ನೀಡಿದ್ದಾರೆ. ಠಾಣೆಯ ತಡೆಗೋಡೆಗಳ ಮೇಲೆ ಪೊಲೀಸ್ ವ್ಯವಸ್ಥೆಯ ಬರಹಗಳು ಜನಸ್ನೇಹಿಯಾಗಿವೆ.

ವರ್ಗಾವಣೆ:

ಬೆಂಗಳೂರಿನ ಜಯನಗರದಲ್ಲಿನ ಬೆಸ್ಕಾಂ ಜಾಗೃತದಳಕ್ಕೆ ರಾವ್ ಗಣೇಶ್ ಅವರು ಇದೀಗ ವರ್ಗಾವಣೆಯಾಗಿದ್ದಾರೆ. ಜನಸ್ನೇಹಿ ಮಾದರಿ ಠಾಣೆಯ ರೂಪ ನೀಡಿದ ಗಣೇಶ್ ಅವರನ್ನು ಬೇಡದ ಮನಸ್ಸಿನಿಂದಲೇ ಸ್ಥಳೀಯರು ಬೀಳ್ಕೊಟ್ಟಿದ್ದಾರೆ.