ಮಾರುಕಟ್ಟೆಯಲ್ಲಿ ಗುಣಮಟ್ಟದ ತೊಗರಿಗೆ ಬೇಡಿಕೆ

ಚಳಿಗಾಲ ಅತಿಥಿ ಅವರೆಕಾಯಿ ಜತೆಗೆ ತೊಗರಿಕಾಯಿ ಬೆಳೆಯೂ ಈ ಬಾರಿ ಉತ್ತಮವಾಗಿದ್ದು ಜಿಲ್ಲೆಯಲ್ಲಿ 838 ಹೆಕ್ಟೇರ್‌ನಲ್ಲಿ ತೊಗರಿ ಸಲು ಬಂದಿದೆ. ಮಾರುಕಟ್ಟೆಗಳಲ್ಲಿ ಗುಣಮಟ್ಟದ ತೊಗರಿಗೆ ಬೇಡಿಕೆ ಸೃಷ್ಟಿಯಾಗಿದ್ದು ದರವೂ ಏರಿಕೆಯಾಗಿದೆ.

ಅವರೆಕಾಯಿ ಜತೆಗೆ ಆಗಮಿಸಿದ ಹಸಿಬಟಾಣಿ ಜತೆಜತೆಗೆ ಬಂದ ತೊಗರಿಕಾಯಿ ಬೆಳೆಯಿಂದಾಗಿ ಚಳಿಗಾಲದ ಅತಿಥಿಗಳನ್ನು ಗ್ರಾಹಕರು ಸಂಭ್ರಮದಿಂದಲೇ ಬರಮಾಡಿಕೊಂಡಿದ್ದಾರೆ. ಉತ್ತಮ ವಾತಾವರಣದ ಕಾರಣ ಜಿಲ್ಲೆಯಲ್ಲಿ ನಿರೀಕ್ಷೆಯಷ್ಟು ಅವರೆಕಾಯಿ ಹಾಗೂ ತೊಗರೆಯಾಗಿ ಸಲು ಕಾಣುವಂತಾಗಿದೆ ಎಂಬ ಮಾತು ಕೇಳಿಬರುತ್ತಿದೆ. ರಾಗಿ ಪ್ರಧಾನವಾಗಿರುವ ಗ್ರಾಮಾಂತರ ಜಿಲ್ಲೆಯಲ್ಲಿ ಎರಡನೇ ಪ್ರಮುಖ ಬೆಳೆಯಾಗಿ ಜೋಳ ಬೆಳೆಯಲಾಗುತ್ತದೆ ಈ ಬಾರಿ ಮೂರನೇ ಸ್ಥಾನದಲ್ಲಿ ತೊಗರಿಕಾಯಿ ಬೆಳೆಯಲಾಗಿದ್ದು ಅವರೆಕಾಯಿ ಬೆಳೆಗಿಂತ ಹೆಚ್ಚಿನ ಸಲು ಬಂದಿದೆ ಎಂದು ಅಂದಾಜಿಸಲಾಗಿದೆ.

ಬೇಡಿಕೆ ಸೃಷ್ಟಿ:

ಜಿಲ್ಲೆಯಲ್ಲಿ ಕಳೆದ ಸಾಲಿನಲ್ಲಿ 970 ಹೆಕ್ಟೇರ್ ಪ್ರದೇಶದಲ್ಲಿ ರೈತರು ತೊಗರಿ ಬೆಳೆದಿದ್ದರು. ಈ ಬಾರಿ 838 ಹೆಕ್ಟೇರ್ ಪ್ರದೇಶದಲ್ಲಷ್ಟೇ ಬೆಳೆಯಲಾಗಿದ್ದರೂ ಗುಣಮಟ್ಟದ ಸಲು ಕಂಡಿರುವುದು ರೈತಾಪಿ ಜನರಲ್ಲಿ ಸಂತಸ ಮೂಡಿಸಿದೆ. ಚಳಿಗಾಲದ ಸಮೃದ್ಧ ಬೆಳೆಯಾಗಿರುವ ತೊಗರಿಕಾಯಿಗೆ ಮಾರುಕಟ್ಟೆಯಲ್ಲಿ ಬೇಡಿಕೆ ಸೃಷ್ಟಿಯಾಗಿ ಉತ್ತಮ ಬೆಲೆ ಬಂದಿದೆ, ಗುಣಮಟ್ಟದ ತೊಗರಿಕಾಯಿ ಖರೀದಿಗೆ ಗ್ರಾಹಕರು ಮುಗಿಬೀಳುತ್ತಿದ್ದಾರೆ. ಡಿಸೆಂಬರ್ ಮೊದಲ ವಾರದಿಂದಲೇ ಮಾರುಕಟ್ಟೆಗೆ ಲಗ್ಗೆ ಇಟ್ಟ ತೊಗರಿ ವ್ಯಾಪಾರಿಗಳ ಜೇಬು ಭರ್ತಿ ಮಾಡಿತ್ತು. ಗುಣಮಟ್ಟದ ತೊಗರಿಯ ಖಾದ್ಯಗಳನ್ನು ಸವಿದ ಗ್ರಾಹಕರು ಖುಷಿಪಡುವಂತಾಯಿತು.

ದರ ಏರಿಕೆ:

ಕೆಲವು ದಿನಗಳಿಂದ ಜಿಲ್ಲೆಯ ರಸ್ತೆ ಬದಿಗಳಲ್ಲಿ ತೊಗರಿ ಕಾಯಿ ಮಾರಾಟ ಜೋರಾಗಿಯೇ ನಡೆಯುತ್ತಿದೆ. ಮಾರುಕಟ್ಟೆಯಲ್ಲಿ ತೊಗರಿಕಾಯಿಗೆ ಗ್ರಾಹಕರಿಂದ ಹೆಚ್ಚಿನ ಬೇಡಿಕೆ ಸೃಷ್ಟಿಯಾಗಿದ್ದು. ಬೇಡಿಕೆಗೆ ತಕ್ಕಂತೆ ಸಿಗುತ್ತಿಲ್ಲ. ಈ ಬಾರಿ ಮಾರುಕಟ್ಟೆಗೆ ನಿರೀಕ್ಷಿತ ಮಟ್ಟದಲ್ಲಿ ತೊಗರಿ ಕಾಯಿ ಬಂದಿಲ್ಲ. ಹೀಗಾಗಿ ಸಹಜವಾಗಿ ಬೆಲೆ ಏರಿಕೆಯಾಗಿದೆ ಎಂಬ ಮಾತು ಕೇಳಿಬರುತ್ತಿದೆ. ಮಾರುಕಟ್ಟೆಯಲ್ಲಿ ಅವರೆಕಾಯಿ ಜತೆಗೆ ತೊಗರಿ ಕಾಯಿಗೆ ಉತ್ತಮ ಬೆಲೆ ಬಂದಿದೆ.

ಭರ್ಜರಿ ವ್ಯಾಪಾರ:

ಮಾರುಕಟ್ಟೆಗಳಲ್ಲಿ ಬಂದಷ್ಟೇ ವೇಗದಲ್ಲಿ ಅವರೇಕಾಯಿಯಂತೆ ತೊಗರಿಕಾಯಿಯೂ ಖಾಲಿಯಾಗುತ್ತಿದೆ, ಕೆಜಿ ತೊಗರಿಕಾಯಿ 70 ರೂ ಇದ್ದರೆ ಮತ್ತೆ ಕೆಲವು ಕಡೆಗಳಲ್ಲಿ 80 ರಿಂದ 100 ರೂಪಾಯಿವರೆಗೆ ಮಾರಾಟವಾಗುತ್ತಿದೆ ಗ್ರಾಹಕರು ಚೌಕಾಶಿ ವ್ಯಾಪಾರದಲ್ಲಿ ತೊಡಗಿರುವುದು ಕಂಡುಬರುತ್ತಿದೆ. ಉತ್ತಮ ಕಾಳು ತುಂಬಿದ ತೊಗರೆಗೆ ಡಿಮಾಂಡ್ ಹಾಗೇ ಇದೆ.

ರಾಗಿ ಜತೆಗೆ ತೊಗರಿ:

ಮಳೆ ಆಧಾರಿತ ಬೆಳೆಯಾಗಿ ರಾಗಿ ಬೆಳೆಯುವ ಗ್ರಾಮಾಂತರ ಜಿಲ್ಲೆಯಲ್ಲಿ ರಾಗಿ ಬೆಳೆಯ ಜತೆಗೆ ತೊಗರಿ ಸೇರಿ ಹಲವು ಬಗೆಯ ದ್ವಿದಳ ಧಾನ್ಯಗಳ ಬೆಳೆ ಬೆಳೆಯುತ್ತಾರೆ ಇತ್ತೀಚಿನ ದಿನಗಳಲ್ಲಿ ಎಕರೆಗಟ್ಟೆಲೆ ತೊಗರಿ ಹಾಗೂ ಅವರೆಕಾಯಿ ಬೆಳೆಯುವ ರೈತರ ಸಂಖ್ಯೆಯೂ ಹೆಚ್ಚುತ್ತಿದೆ.

ಬೆಂಗಳೂರು ಗ್ರಾಮಾಂತರ ಜಿಲ್ಲೆಯಲ್ಲಿ ಮಳೆ ಆತವಾಗಿ ರೈತರು ರಾಗಿ ಬೆಳೆಯನ್ನು ಹೆಚ್ಚಿನ ಪ್ರಮಾಣದಲ್ಲಿ ಬೆಳೆಯುತ್ತಾರೆ. ತೊಗರಿ ಕಾಯಿ ಬೆಳೆಯನ್ನು ಮನೆಯ ಸುತ್ತಮುತ್ತ ಮತ್ತು ಇತರೆ ಭಾಗಗಳಲ್ಲಿ ಬೆಳೆಯುತ್ತಾರೆ. ಈ ಭಾಗದಿಂದ ಪ್ರತಿ ವರ್ಷ ಚಳಿಗಾಲದ ವೇಳೆ ಸ್ಥಳೀಯ ಮಾರುಕಟ್ಟೆಗಳಲ್ಲಿ ತೊಗರಿಕಾಯಿ ಕಂಡುಬರುತ್ತದೆ.

ಶಿವರಾತ್ರಿವರೆಗೆ ಕೊಯ್ಲು:

ಸಾಮಾನ್ಯವಾಗಿ ಮುಂಗಾರಿನಲ್ಲಿ ರೈತರು ವಿವಿಧ ಬೆಳೆಗಳೊಂದಿಗೆ ಭೂಮಿಗೆ ನಾಟಿ ತೊಗರಿಯನ್ನು ಸಾಲುಗಳಲ್ಲಿ ಅಥವಾ ಬದುಗಳಲ್ಲಿ ಹಾಕುತ್ತಾರೆ. ಚಳಿಗಾಲದಲ್ಲಿ ಕೊಯ್ಲಿಗೆ ಬರಲಿದೆ. ಸಂಕ್ರಾಂತಿ ಶಿವರಾತ್ರಿವರೆಗೂ ಕೊಯ್ಲು ನಡೆಯುತ್ತದೆ.

ಬಾಕ್ಸ್()

ತಾಲೂಕುವಾರು ತೊಗರಿ ಪ್ರದೇಶ

ದೇವನಹಳ್ಳಿ 110 ಹೆಕ್ಟೇರ್

ಹೊಸಕೋಟೆ 177 ಹೆಕ್ಟೇರ್

ದೊಡ್ಡಬಳ್ಳಾಪುರ 287 ಹೆಕ್ಟೇರ್

ನೆಲಮಂಗಲ 264 ಹೆಕ್ಟೇರ್

ಒಟ್ಟು 838 ಹೆಕ್ಟೇರ್