ಡಿಕೆಶಿ ಪದಗ್ರಹಣ' ಮನೆಮನೆಗೂ ಸಿಹಿ ವಿತರಣೆ

ಡಿಕೆಶಿ ಪದಗ್ರಹಣ' ಮನೆಮನೆಗೂ ಸಿಹಿ ವಿತರಣೆ

ಡಿ.ಕೆ.ಶಿವಕುಮಾರ್​ ಪ್ರಮಾಣ ವಚನ ಸ್ವೀಕಾರ ಹಿನ್ನೆಲೆಯಲ್ಲಿ ನಗರದ ಕುಣಿಗಲ್​ ಬೈಪಾಸ್​ನಲ್ಲಿರುವ ಪಕ್ಷದ ಕಚೇರಿಯಲ್ಲಿ ಭಾನುವಾರ ಆಯೋಜಿಸಿದ್ದ ಪಕ್ಷದ ಮುಖಂಡರು, ಕಾರ್ಯಕರ್ತರ ಸಭೆಯಲ್ಲಿ ಮಾತನಾಡಿದರು.

ಪ್ರಮಾಣ ವಚನ ಸ್ವೀಕಾರದಂದು ಕಾನೂನು ಸುವ್ಯವಸ್ಥೆ ಪಾಲನೆ, ಭದ್ರತೆ ಇನ್ನಿತರ ವಿಚಾರವಾಗಿ ರಾಜ್ಯದ ಇಂಟೆಲಿಜೆನ್ಸ್​ ಅವರಿಂದ ವರದಿ ಪಡೆದುಕೊಂಡಿರುವ ಡಿಕೆಶಿ ಅವರು ಸರಳವಾಗಿ ಪ್ರಮಾಣ ವಚನ ಸ್ವೀಕರಿಸುತ್ತಿದ್ದಾರೆ. ನಗರಸಭೆ ಸೇರಿ ಕ್ಷೇತ್ರದ ಎಲ್ಲ ಹೋಬಳಿ ಕೇಂದ್ರಗಳಲ್ಲಿ ಪ್ರಮಾಣ ವಚನ ಸ್ವೀಕರಿಸುವುದನ್ನು ಪಕ್ಷದ ಮುಖಂಡರು, ಕಾರ್ಯಕರ್ತರು ಹಾಗೂ ಸಾರ್ವಜನಿಕರು ವೀಕ್ಷಿಸಲು ಪ್ರೊಜೆಕ್ಟರ್​ ವ್ಯವಸ್ಥೆ ಮಾಡಿಕೊಡಲಾಗುತ್ತಿದ್ದು, ಆಯಾ ಭಾಗದ ಮುಖಂಡರು ಅಗತ್ಯ ವ್ಯವಸ್ಥೆ ಮಾಡಿಕೊಳ್ಳಬೇಕು ಎಂದು ತಿಳಿಸಿದರು.

ಸಂಭ್ರಮಾಚರಣೆ: ಪ್ರಮಾಣ ವಚನ ಸ್ವೀಕಾರ ಕಾರ್ಯಕ್ರಮ ವೀಕ್ಷಿಸಿದ ಬಳಿಕ ಪಕ್ಷದ ಕಾರ್ಯಕರ್ತರು, ಮುಖಂಡರು, ಸಾರ್ವಜನಿಕರಿಗೆ ಸಿಹಿ ವಿತರಿಸಿ ಸಂಭ್ರಮಿಸಬೇಕು ಎಂದು ಶಾಸಕ ಎನ್​.ಶ್ರೀನಿವಾಸ್​ ಹೇಳಿದರು.

ಪ್ರತಿ ಮನೆಗೆ ಸಿಹಿವಿತರಣೆ

ಕ್ಷೇತ್ರದ ಎಲ್ಲ ಮನೆಗಳಿಗೆ (ಪಕ್ಷಾತಿತವಾಗಿ) ಸಿಹಿ ಹಂಚಲು ನಿರ್ಧರಿಸಿದ್ದು, ಸಾಧ್ಯವಾದಲ್ಲಿ ಪ್ರಮಾಣವಚನ ಸ್ವೀಕಾರ ದಿನದಂದು ಸಂಜೆ ಸರಬರಾಜು ಮಾಡಲಾಗುವುದು. ಅದಕ್ಕೆ ಬೇಕಾದ ವ್ಯವಸ್ಥೆ ಮಾಡಿಕೊಂಡು ಪಕ್ಷದ ಮುಖಂಡರು ಸಿದ್ಧರಾಗಿರಬೇಕು ಎಂದು ಶಾಸಕರು ಹೇಳಿದರು.

ಸೋಲೂರು ಮತ್ತು ಸೋಂಪುರ ಹೋಬಳಿಯ ಪ್ರತಿ ಬೂತ್​ನಿಂದ ಕನಿಷ್ಠ 50ಕ್ಕೂ ಹೆಚ್ಚು ಯುವ ಕಾರ್ಯಕರ್ತರನ್ನು ಕರೆತರಬೇಕು. ಇದು ಭವಿಷ್ಯದಲ್ಲಿ ಪಕ್ಷ ಸಂಘಟನೆಗೂ ಸಹಕಾರಿಯಾಗಲಿದೆ ಎಂದು ಸೋಲೂರು ಬ್ಲಾಕ್​ ಕಾಂಗ್ರೆಸ್​ ಅಧ್ಯಕ್ಷ ತಟ್ಟೆಕೆರೆ ಬಾಬು ಹೇಳಿದರು. ಮಾಜಿ ಸದಸ್ಯ ಬಿ.ಜಿ.ವಾಸು, ಮುಖಂಡ ಲಕ್ಷ್ಮೀನಾರಾಯಣ್​, ಟಿ.ನಾಗರಾಜು, ಕೆಂಪರಾಜು, ಮುನಿರಾಜು, ಕೆ.ವಸಂತ್​, ಸಿ.ಎಂ.ಗೌಡ, ಚಿಕ್ಕಣ್ಣ, ಮುನಿಯಪ್ಪ, ಕೆ.ಕೃಷ್ಣಪ್ಪ, ಗೋವಿಂದರಾಜು, ಜಗದೀಶ್​ ಇತರರು ಇದ್ದರು.

ನಿರ್ಗಮಿತ ಸಿಎಂಗೆ ಕೃತಜ್ಞತೆ

ಕ್ಷೇತ್ರದ ಹಲವು ಅಭಿವೃದ್ಧಿ ಯೋಜನೆಗೆ ಅನುಮೋದನೆ ನೀಡುವುದರ ಜತೆಗೆ ಅಗತ್ಯ ಅನುದಾನ ನೀಡಿ ಸಹಕರಿಸಿದ ನಿರ್ಗಮಿತ ಸಿಎಂ ಸಿದ್ದರಾಮಯ್ಯ ಅವರಿಗೆ ಶಾಸಕ ಎನ್​.ಶ್ರೀನಿವಾಸ್​ ಕೃತಜ್ಞತೆ ಸಲ್ಲಿಸಿದರು.

ಜನರ ಕನಸು ನನಸು

ಕೋಟ್ಯಂತರ ಜನರ ಕನಸು ನನಸಾಗಿದೆ. ಪಕ್ಷ ಸಂಘಟನೆಗೂ ಅನುಕೂಲವಾಗಲಿದೆ. ನಗರದ ತಾಲೂಕು ಕಚೇರಿ ಆವರಣ, ಕಸಬಾ ಹೋಬಳಿ, ಸೋಲೂರು, ಸೊಂಪುರ, ತ್ಯಾಮಗೊಂಡ್ಲು ಹೋಬಳಿ ಕೇಂದ್ರಗಳಲ್ಲಿ ಪಕ್ಷದ 3 ಸಾವಿರ ಕಾರ್ಯಕರ್ತರು, ಮುಖಂಡರು ಸೇರಿ ಸಾರ್ವಜನಿಕರನ್ನು ಕರೆ ತಂದು ಸಂಭ್ರಮಾಚರಣೆ ಮಾಡುವಂತೆ ನಗರ ಬ್ಲಾಕ್​ ಕಾಂಗ್ರೆಸ್​ ಅಧ್ಯಕ್ಷ ಸಿ.ಪ್ರದಿಪ್​ ಮಾಹಿತಿ ನೀಡಿದರು.

ಮೈತ್ರಿ ಪಕ್ಷದ ಮುಖಂಡರು ಹಾಗೂ ಕಾರ್ಯಕರ್ತರನ್ನು ಪಕ್ಷಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಸೇರ್ಪಡೆ ಮಾಡಿಕೊಂಡು ಪಕ್ಷವನ್ನು ಬಲಪಡಿಸಬೇಕು ಎಂದು ನೆ.ಯೋ.ಪ್ರಾಧಿಕಾರದ ಅಧ್ಯಕ್ಷ ಎಂ.ಕೆ.ನಾಗರಾಜು ತಿಳಿಸಿದರು.