ಜಿಲ್ಲೆಯಲ್ಲಿ ತೀವ್ರ ಚಳಿಗೆ ಜನರು ಗಡಗಡ

ದಿತ್ವಾ ಚಂಡಮಾರುತದ ಪರಿಣಾಮವಾಗಿ ಗ್ರಾಮಾಂತರ ಜಿಲ್ಲೆಯಲ್ಲಿ ಕಳದ ಮೂರು ದಿನಗಳಿಂದ ತೀವ್ರ ಚಳಿಯ ವಾತಾವರಣ ನಿರ್ಮಾಣವಾಗಿದ್ದು, ಜನರಲ್ಲಿ ಶೀತ, ನೆಗಡಿ, ಕೆಮ್ಮು ಹಾಗೂ ಜ್ವರ ಹೆಚ್ಚು ಕಾಣಿಸಿಕೊಂಡಿದ್ದು ಆಸ್ಪತ್ರೆಗಳ ಬಳಿ ಜನರ ದಂಡು ಕಂಡುಬರುತ್ತಿದೆ.

ಮೂರ‌್ನಾಲ್ಕು ದಿನಗಳಿಂದ ಸೂರ್ಯನ ದರ್ಶನವೇ ಇಲ್ಲದೆ ಥಂಡಿಯೊಡಿಯುತ್ತಿದ್ದು, ಮುಂಜಾನೆ 7 ಗಂಟೆ ಸರಿದರೂ ಮಂಕು ಮುಸುಕಿದ ವಾತಾವರಣ ನಿರ್ಮಾಣವಾಗಿದ್ದು ಜನ ಮನೆಯಿಂದ ಹೊರಬರಲು ಮೀನಮೇಷ ಎಣಿಸುವಂತಾಗಿದೆ. ಡಿಸೆಂಬರ್‌ನ ಚಳಿಗಾಲದ ಜತೆಗೆ ಚಂಡಮಾರುತದ ಪರಿಣಾಮ ಮತ್ತಷ್ಟು ಚಳಿ ಹೆಚ್ಚಾಗಿದ್ದು ಮೈಕೊರೆಯುವ ಅನುಭವನವಾಗುತ್ತಿದೆ ದಿಢೀರ್ ವಾತಾವರಣ ಬದಲಾವಣೆಯಿಂದ ಸಾಂಕ್ರಾಮಿಕ ರೋಗಗಳು ಹೆಚ್ಚಾಗುತ್ತಿದ್ದು, ಸಾರ್ವಜನಿಕರು ಆರೋಗ್ಯದ ಬಗ್ಗೆ ಕಾಳಜಿ ವಹಿಸಬೇಕು ಎಂದು ಜಿಲ್ಲಾಡಳಿತದ ಮನವಿ ಮಾಡಿದೆ.

ಮಾರುಕಟ್ಟೆಗಳಲ್ಲಿ ಬೆಚ್ಚನೆ ಉಡುಪುಗಳ ವ್ಯಾಪಾರ ಜೋರು:

ಚಳಿಯ ಪ್ರಮಾಣ ಹೆಚ್ಚಾಗಿದ್ದು, ಮಾರುಕಟ್ಟೆಗಳಲ್ಲಿ ಸ್ಪೆಟರ್, ಜರ್ಕಿನ್ ಮತ್ತಿತರ ತರಹೇವಾರಿ ಬೆಚ್ಚನೆಗೆಯ ಉಡುಪುಗಳು ಲಗ್ಗೆ ಇಟ್ಟಿದ್ದು, ವ್ಯಾಪಾರವೂ ಜೋರಾಗಿದೆ. ಶ್ರೀಲಂಕಾ ಕರಾವಳಿ ತೀರದಲ್ಲಿ ಉಂಟಾಗಿರುವ ವಾಯುಭಾರ ಕುಸಿತ ಪರಿಣಾಮ ಬೆಂಗಳೂರು ಗ್ರಾಮಾಂತರ ಜಿಲ್ಲೆ ಮೇಲೆಯೂ ಬೀರಿದ್ದು ಮುಂದಿನ ನಾಲ್ಕು ದಿನಗಳ ಕಾಲ ತೀವ್ರತರವಾಗ ಚಳಿ ಬಾಧಿಸಲಿದೆ ಎಂದು ಹವಾಮಾನ ಇಲಾಖೆ ಮಾಹಿತಿಯಲ್ಲಿ ತಿಳಿಸಿದೆ.

ನಗರ ಪಟ್ಟಣ ಪ್ರದೇಶಗಳಲ್ಲಿ ಮುಂಜಾನೆ ವೇಳೆ ಉದ್ಯಾನಗಳಲ್ಲಿ ಕಂಡುಬರುತ್ತಿದ್ದ ವಾಯುವಿಹಾರಿಗಳ ಸಂಖ್ಯೆ ಗಣನೀಯವಾಗಿ ಇಳಿಕೆಯಾಗಿದೆ, ಸಾಮಾನ್ಯವಾಗಿ ಹಿರಿಯ ನಾಗರಿಕರು ಹೆಚ್ಚು ವಾಯುವಿಹಾರಕ್ಕೆ ಬರುತ್ತಿದ್ದರು, ತೀವ್ರ ಚಳಿಗೆ ಹೆದರಿ ವಾಯುವಿಹಾರಕ್ಕೆ ತಾತ್ಕಾಲಿಕ ವಿರಾಮ ನೀಡಿರುವುದು ಕಂಡುಬರುತ್ತಿದೆ.

ಕಳೆದ ನಾಲ್ಕೈದು ದಿನಗಳಿಂದ ಗ್ರಾಮೀಣ ಪ್ರದೇಶ ಸೇರಿ ನಗರ ಪಟ್ಟಣ ಪ್ರದೇಶಗಳ ಹೋಟೆಲ್‌ಗಳಲ್ಲಿ ಕಾಫಿ ಟೀಗೆ ಬೇಡಿಕೆ ಹೆಚ್ಚಾಗಿದೆ, ಹೋಟೆಲ್‌ಗಳ ಮುಂದೆ ಕಾಫಿ ಟೀ ಸೇವನೆಯ ಜನಜಂಗುಳಿ ಕಂಡುಬರುತ್ತಿದೆ. ಚಳಿ ನಡುವೆ ಹಬೆಯಾಡುತ್ತಿರುವ ಕಾಫಿ ಹೀರುವ ಅನುಭವ ಜನರದ್ದಾಗಿದೆ. ಇದರೊಂದಿಗೆ ಸಂಜೆ ಹಾಗೂ ರಾತ್ರಿ ವೇಳೆ ಬೋಂಡ, ಬಜ್ಚಿ, ಗೋಬಿ ಸೇರಿ ಕುರುಕಲು ತಿಂಡಿಗಳನ್ನು ಸವಿಯಲು ಜನ ಮುಂದಾಗಿರುವ ದೃಶ್ಯ ಕಂಡುಬರುತ್ತಿದೆ.

ದಿನವೀಡಿ ಶೀತ ಗಾಳಿ ಹೆಚ್ಚಾಗಿದ್ದು, ಶೀತ, ನೆಗಡಿ, ಕೆಮ್ಮು ಹೆಚ್ಚಾಗುವ ಸಾಧ್ಯತೆ ಇದೆ. ಮಕ್ಕಳು ಹಾಗೂ ಹಿರಿಯ ನಾಗರೀಕರು ಆದಷ್ಟು ದೇಹವನ್ನು ಬೆಚ್ಚಗೆ ಇಟ್ಟುಕೊಳ್ಳಬೇಕು, ಮುಂಜಾನೆ ಚಳಿ ಹೆಚ್ಚಾಗಿದ್ದು. ಈ ಸಮಯದಲ್ಲಿ ವಾಯುವಿಹಾರ ಮಾಡುವುದು ಸೂಕ್ತವಲ್ಲ ಆದಷ್ಟು ಬಿಸಿನೀರು ಕುಡಿಯುವುದು ಉತ್ತಮ ಎಂದು ವೈದ್ಯರು ಸಲಹೆ ನೀಡಿದ್ದಾರೆ.

ಭಾರತೀಯ ಹವಾಮಾನ ಇಲಾಖೆ ಹಾಗೂ ಬೆಂಗಳೂರಿನಲ್ಲಿನ ರಾಜ್ಯ ನೈಸರ್ಗಿಕ ವಿಕೋಪ ಉಸ್ತುವಾರಿ ಕೇಂದ್ರದ ಮುನ್ಸೂಚನೆಯಂತೆ ದೇಶದ ದಕ್ಷಿಣ ಭಾಗದಲ್ಲಿ ವಾಯುಭಾರ ಕುಸಿತವಾಗಿದ್ದು, ಇದರ ಪರಿಣಾಮವಾಗಿ ರಾಜ್ಯದ ದಕ್ಷಿಣ ಭಾಗದಲ್ಲಿರುವ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಕೆಲವು ಭಾಗಗಳಲ್ಲಿ ಬಿರುಗಾಳಿ ಸಹಿತ ಭಾರಿ ಮಳೆಯಾಗುವ ಸಾಧ್ಯತೆಯಿದೆ ಎಂದು ಸೂಚನೆ ಇದೆ. ಈ ಹಿನ್ನೆಲೆಯಲ್ಲಿ ಜಿಲ್ಲೆಯ ಜನರು ಮುಂಜಾಗ್ರತೆವಹಿಸಬೇಕಿದೆ.

ಚಳಿ ಪ್ರಮಾಣ ಇರುವುದರಿಂದ ಮಕ್ಕಳು ಮತ್ತು ಹಿರಿಯ ನಾಗರೀಕರು ದೇಹವನ್ನು ಬೆಚ್ಚಗಿಟ್ಟುಕೊಳ್ಳುವಂತ ಉಡುಪುಗಳನ್ನು ಧರಿಸಬೇಕು, ಮುಂಜಾನೆ ವಾಯುವಿಹಾರಕ್ಕೆ ಹೋಗುವುದಕ್ಕೆ ವಿರಾಮ ನೀಡಬೇಕು. ಕೆಮ್ಮು, ಜ್ವರ ಮತ್ತಿತರ ರೋಗ ಲಕ್ಷಣ ಕಂಡುಬಂದರೆ ತಕ್ಷಣ ವೈದ್ಯರನ್ನು ಭೇಟಿ ಮಾಡಬೇಕು, ಆರೋಗ್ಯದ ಬಗ್ಗೆ ಕಾಳಜಿ ವಹಿಸಬೇಕು.