ಬಡವರ ಪ್ರಿಡ್ಜ್‌ಗೆ ಬೇಡಿಕೆ

ಆಧುನಿಕ ತಂತ್ರಜ್ಞಾನದ ಮಧ್ಯೆಯೂ ಮಣ್ಣಿನ ಮಡಕೆಗಳು ಬೇಡಿಕೆ ಉಳಿಸಿಕೊಂಡಿವೆ, ಸಾವಿರಾರು ರೂಪಾಯಿಯಿಂದ ಲಕ್ಷಾಂತರ ರೂಪಾಯಿಯ ಫಿಡ್ಜ್‌ಗಳ ಭರಾಟೆಯ ನಡುವೆಯೂ ಮಣ್ಣಿನ ಮಡಿಕೆಗಳು ಜನರನ್ನು ಸೆಳೆಯುತ್ತಿವೆ.

ವರ್ಷಪೂರ್ತಿ ಮಣ್ಣಿನ ಮಡಕೆಗಳ ಮಾರಾಟ ಕಂಡುಬಂದರೂ, ಬೇಸಿಗೆ ವೇಳೆಯಲ್ಲಿ ಇವಕ್ಕೆ ಡಿಮಾಂಡ್ ಬರುತ್ತದೆ, ರಸ್ತೆ ಬದಿಗಳಲ್ಲಿ ರಾಶಿ ರಾಶಿ ಮಡಿಕೆಗಳ ಮಾರಾಟ ಕಂಡುಬರುತ್ತಿದೆ, ಹೆದ್ದಾರಿಗಳ ಇಕ್ಕೆಲಗಳಲ್ಲಿ ಬಣ್ಣಬಣ್ಣದ ತರಹೇವಾರಿ ಮಣ್ಣಿನ ಮಡಿಕೆಗಳು ಗಮನ ಸೆಳೆಯುತ್ತಿವೆ.

ಈ ಹಿಂದೆ ಯಾವುದೇ ಬಣ್ಣವಿಲ್ಲದ ಸಾದಾಸೀದ ಮಣ್ಣಿನ ಮಡಕೆಗಳಷ್ಟೇ ಕಂಡುಬರುತ್ತಿದ್ದವು, ಆದರೆ ಪ್ರಸ್ತುತ ಇವುಗಳಿಗೆ ಆಧುನಿಕ ಸ್ಪರ್ಶ ನೀಡಲಾಗುತ್ತಿದೆ. ಬಣ್ಣ ಬಣ್ಣದ ಮಡಕೆಗಳು ಮಾರುಕಟ್ಟೆಗೆ ಬಂದಿವೆ. ಕುಂಬಾರರಿಂದ ರೂಪು ಪಡೆದ ಮಡಕೆಗಳಿಗೆ ಬಣ್ಣದ ಕುಂಚಗಳ ಸ್ಪರ್ಶ ಸಿಗುತ್ತಿದೆ, ಮಡಕೆಗಳ ಮೇಲೆ ರಂಗೋಲಿ, ದೇವರ ಚಿತ್ರಗಳು ಸೇರಿ ನಾನಾ ಬಗೆಯ ಕಲಾಕೃತಿಗಳು ಗಮನ ಸೆಳೆಯುತ್ತಿವೆ. ಮೊದಲೆಲ್ಲ ಬಿಂದಿಗೆ ಮತ್ತಿತರ ಪರಿಕರಗಳಿಂದ ನೀರು ತಂದು ಮಡಕೆಗಳಲ್ಲಿ ಶೇಕರಿಸಿಕೊಳ್ಳುತ್ತಿದ್ದರು ನೇರವಾಗಿ ಮಡಿಕೆಯಿಂದ ನೀರನ್ನು ಮೊಗೆದು ತೆಗೆಯಬೇಕಿತ್ತು. ಆದರೆ ಈಗ ಮಡಿಕೆಗಳಿಗೆ ಕೊಳಾಯಿಗಳನ್ನು ಅಳವಡಿಸಲಾಗುತ್ತಿದೆ. ನೇರವಾಗಿ ಕೊಳಾಯಿ ತಿರುವಿ ನೀರು ಪಡೆಯಬಹುದಾದ ಸೌಲಭ್ಯಗಳು ಲಭ್ಯವಿದೆ. ಪ್ಲಾಸ್ಟಿಕ್ ಸೇರಿ ಸ್ಟೀಲ್ ಕೊಳಾಯಿಗಳನ್ನು ಮಡಕೆಗಳಿಗೆ ಅಳವಡಿಸಲಾಗುತ್ತಿದೆ ಇದು ಗ್ರಾಹಕರು ಹೆಚ್ಚು ಆಪ್ತವೆನಿಸುತ್ತಿದೆ.

ಈಗಾಗಲೇ ಜಿಲ್ಲಿಯಲ್ಲಿ ಬಿಸಿಲಿನ ತಾಪ ಏರಿದೆ, ಸುಮಾರು 34 ಡಿಗ್ರಿ ಸೆಲ್ಪಿಯಸ್‌ನಷ್ಟು ತಾಪಮಾನ ಕಂಡುಬರುತ್ತಿದೆ, ಎಲ್ಲಿ ಸಿಕ್ಕರೂ ತಣ್ಣೀರು ಕುಡಿಯಬೇಕೆಂಬಷ್ಟು ಬಿಸಿಯ ವಾತಾವರಣ ಕಂಡುಬರುತ್ತಿದೆ. ಬಿಸಿಲಿನ ತಾಪಕ್ಕೆ ತತ್ತರಿಸಿರುವ ಜಿಲ್ಲೆಯ ಜನರು ನೀರಿನ ದಾಹ ನೀಗಿಸಿಕೊಳ್ಳಲು ತಣ್ಣನೆಯ ನೀರಿಗಾಗಿ ಬಡವರ ಪ್ರಿಡ್ಜ್ ಎಂದು ಕರೆಯಲ್ಪಡುವ ಮಣ್ಣಿನ ಮಡಕೆಗಳ ಮೊರೆಹೋಗುತ್ತಿದ್ದಾರೆ. ಪ್ರಿಡ್ಜ್‌ಗೆ ವಿದ್ಯುತ್ ಸಂಪರ್ಕ ಬೇಕೆ ಬೇಕು ಒಂದು ವೇಳೆ ಗಂಟೆಗಟ್ಟಲೆ ಕರೆಂಟ್ ಕೈಗೊಟ್ಟರೆ ಪ್ರಿಡ್ಜ್ ಇದ್ದರೂ ಪ್ರಯೋಜವಿಲ್ಲ. ಆದರೆ ಈ ಬಡವರ ಪ್ರಿಡ್ಜ್‌ಗೆ ಯಾವುದೇ ಕರೆಂಟ್‌ನ ಹಂಗಿಲ್ಲ. ದಿನದ 24 ಗಂಟೆಯೂ ತಣ್ಣನೆಯ ನೀರು ದೊರೆಯುತ್ತದೆ. ಅನಾದಿಕಾಲದಿಂದಲೂ ಮಣ್ಣಿನ ಪಾತ್ರೆಗಳು ಮನುಷ್ಯನ ಜೀವನದೊಂದಿಗೆ ಬೆಸೆದುಕೊಂಡಿದೆ. ಲೋಹಗಳ ಭರಾಟೆಯಲ್ಲಿ ಮಣ್ಣಿನ ಪಾತ್ರೆಗಳಿಗೆ ತುಸು ಹಿನ್ನಡೆಯಾಗಿದ್ದರೂ ಬೇಸಿಗೆಯಲ್ಲಿ ಜನರು ಮಣ್ಣಿನ ಮಡಕೆಗಳನ್ನು ಹೆಚ್ಚು ಬಳಸುತ್ತಿದ್ದಾರೆ.

ಈ ಬಾರಿ ಮಣ್ಣಿನ ಬಾಟಲ್‌ಗಳನ್ನು ನಿರ್ಮಾಣವಾಗಿದೆ. ನೀರು ಕುಡಿಯಲು ಸಾರ್ವಜನಿಕರನ್ನು ಆಕರ್ಷಿಸುತ್ತಿದೆ. ಮಣ್ಣಿನ ಕುಡಿಯುವ ನೀರಿನ ಬಾಟಲಿಗಳಿಗೆ ಹೊರಗಡೆಯಿಂದ ಬಟ್ಟೆ ಮತ್ತಿತರ ವಸ್ತುಗಳ ಪ್ಯಾಕಿಂಗ್ ಇರುತ್ತದೆ, ಸ್ಟೀಲ್ ಮುಚ್ಚಳ ಇರುತ್ತದೆ, ಇದರಿಂದ ಆಕಸ್ಮಾತ್ ಬಿದ್ದರೂ ತಕ್ಷಣ ಒಡೆದುಹೋಗುವುದಿಲ್ಲ. ಆದರೂ ಇದನ್ನು ನಾಜೂಕಾಗಿ ಬಳಸಬೇಕು ಎಂಬುದು ಮಡಿಕೆ ವ್ಯಾಪಾರಿಗಳ ಎಚ್ಚರಿಕೆಯಾಗಿದೆ.

ಪ್ಲಾಸ್ಟಿಕ್ ಬಂದ ನಂತರ ಮಡಕೆತಯಾರಿಸುವವರು, ಮಾರುವವರು ಕಣ್ಮರೆಯಾಗುತ್ತಿದ್ದಾರೆ, ನಾವು ಕಲಿತ ಕಸಬನ್ನು ಬಿಡಬಾರದು ಎಂದು ಈಗಲೂ ಮಡಕೆ ಮಾಡುತ್ತೆವೆ. ಬೇಸಿಗೆಯಲ್ಲಿ ಮಾತ್ರ ವ್ಯಾಪಾರ ಇರುತ್ತದೆ, ಉಳಿದ ಕಾಲದಲ್ಲಿ ನಮ್ಮತ್ತ ತಿರುಗಿಯೂ ಸಹ ನೋಡುವುದಿಲ್ಲ.ಕುಂಬಾರಿಕೆ ವಂಶಪಾರಂಪರ ವೃತ್ತಿಯಾಗಿದ್ದು, ಇದರಲ್ಲಿ ಲಾಭಕ್ಕಿಂತ ನಷ್ಟವೇ ಹೆಚ್ಚಾದರೂ ಪರ್ಯಾಯ ವೃತ್ತಿ ತಿಳಿಯದೆ ಕುಂಬಾರಕೆಯನ್ನೇ ಮುಂದುವರೆಸಿಕೊಂಡು ಬಂದಿದ್ದೇವೆ.

ಬೇರೆ ಬೇರೆ ಕಡೆಗಳಲ್ಲಿ ತಿರುಗಿ ನಾಲ್ಕಾರು ಕೆರೆಗಳಿಂದ ಗುಣಮಟ್ಟದ ಮಣ್ಣು ತಂದು ಹದಗೊಳಿಸಿ ಮಡಕೆ ತಯಾರಿಸುವುದು ಕಷ್ಟಕರವಾಗಿದೆ. ಸಾಗಾಣಿಕೆ ಸಮಯದಲ್ಲಿ ಮಡಕೆಗಳು ಒಡೆದು ಸಾಕಷ್ಟು ನಷ್ಟವಾಗುತ್ತದೆ. ಬೇಸಿಗೆ ವೇಳೆಯಲ್ಲಷ್ಟೇ ಇವುಗಳಿಗೆ ಬೇಡಿಕೆ ಹೆಚ್ಚಿರುತ್ತದೆ. ಉಳಿದ ದಿನಗಳಲ್ಲಿ ಗಿಡಗಳ ಪಾಟ್‌ಗಳು ಮತ್ತಿತರ ಅಲಂಕಾರಿಕ ವಸ್ತುಗಳನ್ನು ಮಾರಾಟ ಮಾಡುತ್ತೇವೆ.

ಏನೇ ಆಧುನಿಕತೆ ಬಂದರೂ ಮಣ್ಣಿನ ಮಡಕೆಗಳ ಬಳಕೆಯೇ ಹೆಚ್ಚು ಆಪ್ತವೆನಿಸುತ್ತದೆ, ಮಣ್ಣಿನ ಮಡಕೆಗಳಲ್ಲಿ ನೀರು ಕುಡಿಯಲು ಹೆಚ್ಚು ತೃಪ್ತಿ ಸಿಗುತ್ತದೆ. ಹಿಂದೆ ಮನೆಯಲ್ಲಿ ಅಡುಗೆ ಸೇರಿ ಎಲ್ಲದಕ್ಕೂ ಮಣ್ಣಿನ ಮಡಕೆಗಳನ್ನೇ ಬಳಸುತ್ತಿದ್ದರು. ಈಗಲೂ ಗ್ರಾಮೀಣ ಪ್ರದೇಶಗಳಲ್ಲಿ ಕೆಲವು ಕಡೆಗಳಲ್ಲಿ ಬಳಸುತ್ತಾರೆ. ಪ್ರಸ್ತುತ ಬಣ್ಣ ಬಣ್ಣದ ಆಕರ್ಷಕ ಮಡಕೆಗಳು ಬಂದಿರುವುದು ಗಮನ ಸೆಳೆಯುತ್ತಿವೆ.