ಉತ್ತಮ ಇಳುವರಿಗೆ ಸಂಯುಕ್ತ ರಾಸಾಯನಿಕ ಗೊಬ್ಬರ ಅವಶ್ಯ

ಪೂರ್ವ ಮುಂಗಾರು ಆರಂಭದ ಹಿನ್ನೆಲೆಯಲ್ಲಿ ಕೃಷಿ ಆಧಾರಿತ ಬೆಳೆಗಳ ಉತ್ತಮ ಇಳುವರಿ ಹಾಗೂ ಮಣ್ಣಿನ ಫಲವತ್ತತೆ ಕಾಪಾಡಲು ಸಂಯುಕ್ತ ರಾಸಾಯನಿಕ ರಸಗೊಬ್ಬರಗಳನ್ನು ಬಳಕೆ ಮಾಡುವಂತೆ ಕೃಷಿ ಇಲಾಖೆ ಸಲಹೆ ನೀಡಿದೆ.

ಜಿಲ್ಲಾದ್ಯಂತ ಮುಂಗಾರು ಪೂರ್ವ ಮಳೆ ಆರಂಭವಾಗಿದ್ದು, ರೈತರು ಮುಂಗಾರು ಬಿತ್ತನೆಗೆ ಭೂಮಿ ಹದ ಮಾಡುವ ಕಾರ್ಯಕ್ಕೆ ಮುಂದಾಗಿದ್ದಾರೆ. ಬಿತ್ತನೆಗೂ ಮುನ್ನ ರೈತರಿಗೆ ಉತ್ತಮ ಬಿತ್ತನೆ ಬೀಜ ಹಾಗೂ ರಸಗೊಬ್ಬರಗಳ ಪೂರೈಕೆ ಹಾಗೂ ಸುರಕ್ಷಿತ ಕೀಟನಾಶಕಗಳ ಬಳಕೆ ಸಂಬಂಧ ಕೃಷಿ ಇಲಾಖೆ ಕೆಲವು ಮಾಹಿತಿಗಳನ್ನು ನೀಡಿದೆ. ಜಿಲ್ಲೆಯ ಪ್ರಮುಖ ಬೆಳೆಯಾದ ರಾಗಿ ಬೆಳೆಗೆ ಬೆಂಗಳೂರು ಕೃಷಿ ವಿಶ್ವವಿದ್ಯಾಲಯ ಶಿಫಾರಸಿನ ಸಾರಜನಕದ ಪ್ರಮಾಣವು 1ಎಕರೆಗೆ 20 ಕೆಜಿ ಮಾತ್ರ. ಅಂದರೆ ಎಕರೆಗೆ ಸುಮಾರು 45ಕೆಜಿ ಯೂರಿಯಾ ನೀಡಬೇಕು. ಬಿತ್ತನೆ ಸಮಯದಲ್ಲಿ ಅರ್ಧದಷ್ಟು ಸಾರಜನಕವನ್ನು ಸಂಯುಕ್ತ ರಸಗೊಬ್ಬರ/ಡಿಎಪಿ ಮೂಲಕ ನೀಡಬೇಕು, ಉಳಿದ ಅರ್ಧದಷ್ಟು ಸಾರಜನಕವನ್ನು ಅಂದರೆ ಸುಮಾರು 22-23 ಕೆಜಿ ಯೂರಿಯಾ ಗೊಬ್ಬರವನ್ನು 2 ಹಂತಗಳಲ್ಲಿ ರಾಗಿ ಬೆಳವಣಿಗೆಯ 20-25 ದಿನಗಳೊಳಗಾಗಿ ಒಮ್ಮೆ ಹಾಗೂ ಮತ್ತೊಮ್ಮೆ 30-45 ದಿನಗಳೊಳಗಾಗಿ ಹಾಕಿದಾಗ ಉತ್ತಮ ಇಳುವರಿಗೆ ಸಾಧ್ಯವಾಗುತ್ತದೆ. ಹೆಚ್ಚಾಗಿ ಹಾಕಿದ ಯೂರಿಯಾ ಮಣ್ಣು ಹಾಗೂ ನೀರಿನ ಮೂಲಕ ವ್ಯರ್ಥವಾಗುತ್ತದೆ ಎಂದು ಕೃಷಿ ಇಲಾಖೆ ಜಂಟಿ ನಿರ್ದೇಶಕಿ ಕಲಾವತಿ ತಿಳಿಸಿದ್ದಾರೆ.

ರೈತರು ಆದಷ್ಟು ಬೇಸಾಯದ ಖರ್ಚು ಕಡಿಮೆ ಮಾಡಿಕೊಳ್ಳುವ ಹಾಗೂ ಪರಿಸರದ ಹಾನಿ ತಪ್ಪಿಸುವ ಸಲುವಾಗಿ ಶಿಫಾರಸಿನ ಪ್ರಮಾಣದಲ್ಲಿಯೇ ರಸಗೊಬ್ಬರಗಳನ್ನು ಖರೀದಿಸುವುದು ಉತ್ತಮ ಎಂದು ತಿಳಿಸಿರುವ ಕೃಷಿ ಇಲಾಖೆ ಅಧಿಕಾರಿಗಳು ಜಿಲ್ಲೆಯ ರೈತರಿಗೆ ಅಗತ್ಯ ಪ್ರಮಾಣದ ರಸಗೊಬ್ಬರ ಒದಗಿಸುವುದು ಹಾಗೂ ಸಮರ್ಪಕ ರಸಗೊಬ್ಬರಗಳನ್ನು ಮಾಡುವುದಕ್ಕಾಗಿ ಎಲ್ಲ ನಿರ್ವಹಣೆ ಬೆಳೆಗಳಿಗೂ ಶಿಫಾರಿತ ಪ್ರಮಾಣದಲ್ಲೇ ರಸಗೊಬ್ಬರಗಳನ್ನು ವಿತರಿಸುವುದು ಅತ್ಯವಶ್ಯಕವಾಗಿದೆ

ಇದರಿಂದ ಹೆಚ್ಚು ಯೂರಿಯಾ ಬಳಕೆ ಮಾಡುವುದರಿಂದ ಉಂಟಾಗುವ ದುಷ್ಪರಿಣಾಮಗಳನ್ನು ನಿಯಂತ್ರಿಸಬಹುದಾಗಿರುತ್ತದೆ ಎಂದು ತಿಳಿಸಿದ್ದಾರೆ. ಪ್ರಮುಖ ಕೃಷಿ ಬೆಳೆಗಳಾದ ರಾಗಿ, ತೊಗರಿ, ಮುಸುಕಿನ ಜೋಳ, ಅಲಸಂದೆ, ಭತ್ತ, ಅವರೆ, ಶೇಂಗಾ, ಹರಳು ಹಾಗೂ ಹುರುಳಿ ಬೆಳೆಗಳಿಗೆ ನೀಡಬೇಕಾಗಿರುವ ರಸಗೊಬ್ಬರದ ಪ್ರಮಾಣವನ್ನು ಹಾಗೂ ವಿವಿಧ ಸಂಯುಕ್ತ ರಸಗೊಬ್ಬರಗಳ ಕಾಂಬಿನೇಷನ್ ಮೂಲಕ ನೀಡಬಹುದಾದ ರಸಗೊಬ್ಬರ ಪ್ರಮಾಣದ ಮಾಹಿತಿಯನ್ನು ಈಗಾಗಲೇ ಜಿಲ್ಲೆಯ ಎಲ್ಲ ರಸಗೊಬ್ಬರ ಮಾರಾಟಗಾರರಿಗೆ ನೀಡಲಾಗಿದೆ ಎಂದು ಕಲಾವತಿ ತಿಳಿಸಿದ್ದಾರೆ.

ಯೂರಿಯಾ ಮೇಲುಗೊಬ್ಬರವಾಗಿ ಬಳಸಿ:

ಈ ಬಾರಿ ಮುಂಗಾರು ಹಂಗಾಮಿಗೆ ಪ್ರಮುಖ ಬೆಳೆಗಳಾದ ರಾಗಿ-59100 ಹೆಕ್ಟೇರ್, ಮುಸುಕಿನ ಜೋಳ-7000 ಹೆಕ್ಟೇರ್, ತೊಗರಿ-1000 ಹೆಕ್ಟೇರ್, ಅವರೆ -750 ಹೆಕ್ಟೇರ್, ಹುರುಳಿ-500 ಹೆಕ್ಟೇರ್, ಅಲಸಂದೆ-433 ಹೆಕ್ಟೇರ್, ಶೇಂಗಾ- 195 ಹೆಕ್ಟೇರ್, ಹರಳು-150ಹೆಕ್ಟೇರ್, ಭತ್ತ-100 ಹೆಕ್ಟೇರ್, ಹಾಗೂ ತೃಣ ಧಾನ್ಯಗಳು-10 ಹೆಕ್ಟೇರ್ ಸೇರಿ 69548 ಹೆಕ್ಟೇರ್ ಪ್ರದೇಶಕದಲ್ಲಿ ಬಿತ್ತನೆ ಗುರಿ ನಿಗಧಿಯಾಗಿದೆ. ರೈತ ಸಂಪರ್ಕ ಕೇಂದ್ರಗಳಲ್ಲಿ ತೊಗರಿ - 17.2 ಕ್ವಿಂಟಲ್,

ರಾಗಿ - 154 ಕ್ವಿಂಟಲ್, ಅಲಸಂದೆ -7.2 ಕ್ವಿಂಟಲ್ ದಾಸ್ತಾನು ಇದೆ ಎಂದು ಕೃಷಿ ಇಲಾಖೆ ತಿಳಿಸಿದೆ.

ರೈತರು ಶಿಫಾರಸಿನಷ್ಟೇ ಪ್ರಮಾಣದಲ್ಲಿ ರಸಗೊಬ್ಬರ ಖರೀಸಿಸಬೇಕು ಹಾಗೂ ಸಾರಜನಕವನ್ನು ಕೇವಲ ಯೂರಿಯಾ ಮೂಲಕ ನೀಡದೆ ಸಂಯುಕ್ತ ರಸಗೊಬ್ಬರಗಳ ಜತೆ ಅಥವಾ ಅಮೋನಿಯಮ್ ಸಲ್ವೇಟ್ ಅನ್ನು ಮೂಲಗೊಬ್ಬರವಾಗಿ ಬಳಸಬೇಕು. ಯೂರಿಯಾವನ್ನು ಮೇಲುಗೊಬ್ಬರಕ್ಕಾಗಿ ಮಾತ್ರ ಬಳಸಬೇಕು. ಮುಂಗಾರು ಹಂಗಾಮಿನಲ್ಲಿ ಕೃಷಿ ಚಟುವಟಿಕೆ ಗರಿಗೆದರಿದ್ದು ರೈತರು ಬೆಳೆಗಳಿಗೆ ಅವಶ್ಯಕತೆ ಇರುವಷ್ಟು ರಸಗೊಬ್ಬರ ಮಾತ್ರ ಬಳಕೆ ಮಾಡಬೇಕು.