ಭೂಸ್ವಾಧೀನ ವಿರೋಧಿಸಿ ಬೈಕ್​ ರ್ಯಾಲಿ

ಭೂಸ್ವಾಧೀನ ವಿರೋಧಿಸಿ ಬೈಕ್​ ರ್ಯಾಲಿ

ಸರ್ಜಾಪುರ: ಭೂಸ್ವಾಧೀನ ವಿರೋಧಿಸಿ ಹೋರಾಟ ನಡೆಸುತ್ತಿರುವ ಸರ್ಜಾಪುರ ಹೋಬಳಿ ವ್ಯಾಪ್ತಿಯ 11 ಗ್ರಾಮಗಳ ರೈತರಿಗೆ ಬೆಂಬಲ ಸೂಚಿಸಿ ಕರ್ನಾಟಕ ರಾಷ್ಟ್ರ ಸಮಿತಿ ಪಕ್ಷದ ಸಂಸ್ಥಾಪಕ ಗೌರವಾಧ್ಯಕ್ಷ ರವಿ ಕೃಷ್ಣಾರೆಡ್ಡಿ ನೇತೃತ್ವದಲ್ಲಿ ಬೃಹತ್​ ಬೈಕ್​ ರ್ಯಾಲಿ ನಡೆಸಲಾಯಿತು.

ದೊಮ್ಮಸಂದ್ರದಿಂದ ಆರಂಭಗೊಂಡ ರ್ಯಾಲಿ ಕೊಮ್ಮಸಂದ್ರ, ಬಿ.ಹೊಸಹಳ್ಳಿ, ಗೋಪಸಂದ್ರ, ಸೋಂಪುರ, ಸರ್ಜಾಪುರ, ಬಿದರಗುಪ್ಪೆ, ಅರೇನೂರು, ಹಂದೇನಹಳ್ಳಿ, ಸೊಳ್ಳೆಪುರ, ಸಮ್ಮನಹಳ್ಳಿ ಮಾರ್ಗವಾಗಿ ಮುತ್ತಾನಲ್ಲೂರು ತಲುಪಿತು. ಈ ವೇಳೆ ರೈತರು, ಮಹಿಳೆಯರು ಹಾಗೂ ಪಕ್ಷದ ಕಾರ್ಯಕರ್ತರು ಸರ್ಕಾರದ ವಿರುದ್ಧ ಘೋಷಣೆ ಕೂಗಿದರು.

ಪ್ರತಿಭಟನಾ ರ್ಯಾಲಿ ಉದ್ದೇಶಿಸಿ ರವಿ ಕೃಷ್ಣಾರೆಡ್ಡಿ ಮಾತನಾಡಿ, ಆನೇಕಲ್​ ತಾಲೂಕಿನಲ್ಲಿ ಈಗಾಗಲೇ ಸಾವಿರಾರು ಎಕರೆ ಭೂಮಿ ಸ್ವಾಧಿನಪಡಿಸಿಕೊಂಡಿದ್ದರೂ ಆ ಪ್ರದೇಶವನ್ನು ಅಭಿವೃದ್ಧಿಪಡಿಸದೆ ಹಾಗೇಬಿಟ್ಟು, ಇದೀಗ ಮತ್ತೇ ಕೃಷಿ ಭೂಮಿಯನ್ನು ಸ್ವಾಧಿನಪಡಿಸಿಕೊಳ್ಳಲು ಮುಂದಾಗಿರುವುದು ಖಂಡನೀಯ. ರೈತರನ್ನು ಒಕ್ಕಲೆಬ್ಬಿಸಿ ಬಂಡವಾಳಶಾಹಿಗಳು ಹಾಗೂ ರಿಯಲ್​ ಎಸ್ಟೇಟ್​ ಉದ್ಯಮಿಗಳ ಪರವಾಗಿ ಭೂಮಿ ಬಳಸುವ ಪ್ರಯತ್ನ ನಡೆಯುತ್ತಿದ್ದು, ರೈತರ ಹೋರಾಟವನ್ನು ಹತ್ತಿಕ್ಕಲು ಪೊಲೀಸರನ್ನು ಬಳಸುತ್ತಿರುವುದು ಸರಿಯಲ್ಲ ಎಂದು ಕಿಡಿಕಾರಿದರು.

ಭೂಸ್ವಾಧಿನ ವಿರೋಧಿ ಹೋರಾಟ ಸಮಿತಿ ದೇವರಾಜ್​, ಮೇಜರ್​ ರಾಘುರಾಮ್​ ರೆಡ್ಡಿ, ನಾಗೇಶ್​, ಬಿಕ್ಕನಹಳ್ಳಿ ಅಶೋಕ್​ ರೆಡ್ಡಿ, ಕರ್ನಾಟಕ ರಾಷ್ಟ್ರ ಸಮಿತಿ ಪಕ್ಷದ ಆನೇಕಲ್​ ತಾಲೂಕು ಅಧ್ಯಕ್ಷ ವಿಜಯರೆಡ್ಡಿ, ಉಪಾಧ್ಯಕ್ಷ ಹರೀಶ್​ ಕುಮಾರ್​, ಮಹೇಶ್​ ರೆಡ್ಡಿ, ವಸುಂಧರ ರೆಡ್ಡಿ ಇತರರು ಇದ್ದರು.

ಸರ್ಜಾಪುರ ಕೆಐಡಿಬಿ ಸಭೆ&18