ಉಪನಗರ ರೈಲಿಗೆ "ಇಟಿಸಿಎಸ್​' ಕವಚ

ಬೆಂಗಳೂರಿನ ಬಹುನಿರೀಕ್ಷಿತ ಉಪನಗರ ರೈಲು ಯೋಜನೆಗೆ (ಬಿಎಸ್​ಟಿಪಿ) ಮತ್ತಷ್ಟು ಆಧುನಿಕ ಸ್ಪರ್ಶ ದೊರೆಯಲಿದೆ. ಯೋಜನೆಯ ನಾಲ್ಕೂ ಕಾರಿಡಾರ್​ಗಳಲ್ಲಿ ಈ ಹಿಂದೆ ಪ್ರಸ್ತಾಪಿಸಿದ್ದ ಕಮ್ಯುನಿಕೇಶನ್​ ಬೇಸ್ಡ್​ ಟ್ರೈನ್​ ಕಂಟ್ರೋಲ್​ (ಸಿಬಿಟಿಸಿ) ಬದಲಿಗೆ ಯುರೋಪಿಯನ್​ ಟ್ರೈನ್​ ಕಂಟ್ರೋಲ್​ ಸಿಸ್ಟಮ್​ (ಇಟಿಸಿಎಸ್​) ಲೆವೆಲ್​&-2 ಅಳವಡಿಸಲು ಕೆ-ರೈಡ್​ ಅನುಮತಿ ಪಡೆದಿದೆ.

ನಮ್ಮ ಮೆಟ್ರೊ ನೇರಳೆ ಮತ್ತು ಹಸಿರು ಮಾರ್ಗಗಳಲ್ಲಿ ಡಿಸ್ಟೆನ್ಸ್​ ಟು ಗೋ (ಡಿಟಿಜಿ) ವ್ಯವಸ್ಥೆ ಬಳಕೆಯಲ್ಲಿದೆ. ಹಳದಿ, ಗುಲಾಬಿ ಹಾಗೂ ನೀಲಿ ಮಾರ್ಗಗಳಲ್ಲಿ ಸಿಬಿಟಿಸಿ ಅಳವಡಿಸಲಾಗುತ್ತಿದೆ. ಸಿಬಿಟಿಸಿಯಲ್ಲಿ ಚಾಲಕರ ನೆರವಿಲ್ಲದೆಯೂ ರೈಲು ಸಂಚಾರ ಸಾಧ್ಯ. ಆದರೆ, ಉಪನಗರ ಹಾಗೂ ಪ್ರಾದೇಶಿಕ ರೈಲು ಜಾಲವನ್ನು ಗಮನದಲ್ಲಿಟ್ಟುಕೊಂಡು ಇಟಿಸಿಎಸ್​ ಲೆವೆಲ್​-2 ಹೆಚ್ಚು ಸೂಕ್ತ ಎಂದು ಕೆ-&ರೈಡ್​ ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.

ರೈಲು ನಿಗದಿತ ವೇಗದ ಮಿತಿ ಮೀರಿದರೆ ಇಟಿಸಿಎಸ್​ ವ್ಯವಸ್ಥೆಯೇ ಸ್ವಯಂಚಾಲಿತವಾಗಿ ಬ್ರೇಕ್​ ಹಾಕಲಿದೆ. ಚಾಲಕ ಕೆಂಪು ಸಿಗ್ನಲ್​ ಉಲ್ಲಂಘಿಸಿದರೂ ರೈಲನ್ನು ನಿಯಂತ್ರಿಸಿ ನಿಲ್ಲಿಸಲಿದೆ. ಒಂದೇ ಹಳಿಯಲ್ಲಿ ರೈಲುಗಳು ಅಪಾಯಕಾರಿ ರೀತಿಯಲ್ಲಿ ಸಮೀಪಿಸುವುದಕ್ಕೂ ಇದು ತಡೆ ನೀಡಲಿದೆ.

ಹಳಿಗಳಲ್ಲಿ ಅಳವಡಿಸುವ "ಬಾಲಿಸ್​' ಎಂಬ ಎಲೆಕ್ಟ್ರಾನಿಕ್​ ಸಾಧನಗಳ ಮೂಲಕ ಮುಂದಿನ ಸಿಗ್ನಲ್​, ವೇಗದ ಮಿತಿ ಮತ್ತಿತರ ಮಾಹಿತಿಯನ್ನು ರೈಲಿನಲ್ಲಿರುವ ನಿಯಂತ್ರಣ ವ್ಯವಸ್ಥೆಗೆ ರವಾನಿಸಲಾಗುತ್ತದೆ. ಅಗತ್ಯಕ್ಕೆ ತಕ್ಕಂತೆ ವೇಗ ಇಳಿಕೆಯಾಗದಿದ್ದರೆ ಕಂಪ್ಯೂಟರ್​ ಸ್ವಯಂಚಾಲಿತವಾಗಿ ಬ್ರೇಕ್​ ಕಾರ್ಯಗತಗೊಳಿಸಲಿದೆ.

ಬಿಎಸ್​ಟಿಪಿಯ ವಿಸತ ಯೋಜನಾ ವರದಿಯಲ್ಲಿ ಸಿಬಿಟಿಸಿ ಪ್ರಸ್ತಾಪಿಸಲಾಗಿತ್ತು. ಆದರೆ, ನಗರ ವ್ಯಾಪ್ತಿಯನ್ನು ಮೀರಿ ಉಪನಗರ ಹಾಗೂ ಪ್ರಾದೇಶಿಕ ರೈಲು ಜಾಲ ವಿಸ್ತರಣೆಯಾಗುವ ಸಾಧ್ಯತೆ ಹಿನ್ನೆಲೆಯಲ್ಲಿ ಹೆಚ್ಚಿನ ವೇಗದ ಸಂಚಾರಕ್ಕೆ ಪೂರಕವಾಗುವ ಇಟಿಸಿಎಸ್​ ಆಯ್ಕೆ ಮಾಡಲಾಗಿದೆ. ನಗರದಲ್ಲಿ ಕಡಿಮೆ ಅಂತರದಲ್ಲಿ ನಿಲ್ದಾಣಗಳಿರುವ ಮೆಟ್ರೋಗೆ ಸಿಬಿಟಿಸಿ ಸೂಕ್ತವಾಗಿದ್ದರೆ, ದೂರದ ಉಪನಗರ ಸಂಪರ್ಕಕ್ಕೆ ಇಟಿಸಿಎಸ್​ ಹೆಚ್ಚು ಪರಿಣಾಮಕಾರಿ ಎಂಬುದು ಕೆ-&ರೈಡ್​ನ ಲೆಕ್ಕಾಚಾರವಾಗಿದೆ.