ಕಾಮಗಾರಿ ಕೈಗೊಳ್ಳದೆ ಬಿಲ್ ಪಾವತಿ ?

ಏಳೆಂಟು ವರ್ಷದಿಂದ ಕುಂಟುತ್ತಾ ಸಾಗಿರುವ ಲೇಔಟ್‌ನಲ್ಲಿ ರಸ್ತೆ ನಿರ್ಮಾಣ ಆಮೆ ವೇಗದಲ್ಲಿ ನಡೆದಿದೆ. ರಸ್ತೆಗಳು ಪೂರ್ಣಗೊಳ್ಳದ ಕಾರಣ ನಿವೇಶನ ಆಕಾಂಕ್ಷಿಗಳು ಮನೆ ನಿರ್ಮಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಇನ್ನೊಂದೆಡೆ ದೊಡ್ಡ ಮೊತ್ತದಲ್ಲಿ ಕೈಗೆತ್ತಿಕೊಂಡಿರುವ ಕಾಮಗಾರಿಗಳಲ್ಲಿ ಹಲವು ರಸ್ತೆಗಳು ಟೆಂಡರ್‌ನಲ್ಲಿ ನಮೂದಿಸಿದ್ದ ಷರತ್ತಿನಂತೆ ನಿರ್ಮಾಣವಾಗಿಲ್ಲ. ಮಣ್ಣು ಸ್ಥಿರೀಕರಣ, ಜಲ್ಲಿ ರಸ್ತೆ, ಕಚ್ಛಾ ರಸ್ತೆ ಸೇರಿ ಡಾಂಬರು ಕಾರ್ಯವೂ ಸಮರ್ಪಕವಾಗಿ ನಡೆದಿಲ್ಲ. ಅರ್ಹತೆ ಇಲ್ಲದ ಗುತ್ತಿಗೆ ಕಂಪನಿಗೆ ಕೆಲಸ ವಹಿಸಿದ್ದರಿಂದ ಈ ರಾದ್ಧಾಂತ ನಡೆದಿದೆ ಎಂದು ಬಿಡಿಎ ಆಯುಕ್ತರಿಗೆ ಲಿಖಿತ ದೂರು ಸಲ್ಲಿಸಲಾಗಿದೆ.

ಕೆಂಪೇಗೌಡ ಬಡಾವಣೆಯಲ್ಲಿ ರಸ್ತೆಜಾಲವನ್ನು ಅಭಿವೃದ್ಧಿಪಡಿಸಲು 2023-24 ಹಾಗೂ 2024-25ನೇ ಸಾಲಿನಲ್ಲಿ 389.29 ಕೋಟಿ ರೂ. ಮೊತ್ತದ ಟೆಂಡರ್ ಆಹ್ವಾನಿಸಲಾಗಿದೆ. ಇವುಗಳನ್ನು 5 ಪ್ಯಾಕೇಜ್‌ಗಳಾಗಿ ವಿಂಗಡಿಸಿ ಗುತ್ತಿಗೆ ಕಂಪನಿಗೆ ವಹಿಸಲಾಗಿದೆ. ಪ್ರಸ್ತುತ ಅರ್ಧದಷ್ಟು ಕೆಲಸ ಆಗಿದ್ದು, ಮೂರನೇ ಸಂಸ್ಥೆಯಿಂದ ಪರಿಶೀಲನೆ ನಡೆಸುವ ಮುನ್ನವೇ ಬಿಲ್ ಪಾವತಿ ಮಾಡಲಾಗಿದೆ. ಬಾಕಿ ಕಾಮಗಾರಿಯೂ ಸಮರ್ಪಕವಾಗಿ ನಡೆಯದ ಬಗ್ಗೆ ಸೈಟ್ ಹಂಚಿಕೆದಾರರು ಹಾಗೂ ಎನ್‌ಪಿಕೆಎಲ್ ವೇದಿಕೆ ಬಿಡಿಎಗೆ ಪ್ರತ್ಯೇಕ ದೂರು ಸಲ್ಲಿಸಿದ್ದರೂ, ಗುಣಮಟ್ಟ ಕಾಯ್ದುಕೊಳ್ಳಲು ಅಧಿಕಾರಿ ವರ್ಗ ಗಮನ ಹರಿಸದಿರುವುದು ಅಕ್ರಮದಲ್ಲಿ ಭಾಗಿಯಾಗಿದ್ದಾರೆಂಬ ಶಂಕೆ ವ್ಯಕ್ತವಾಗಿದೆ.

2020ರಿಂದ ಬಡಾವಣೆಯ ವಿವಿಧೆಡೆ ರಸ್ತೆ ಕಾಮಗಾರಿಗೆ ಚಾಲನೆ ನೀಡಲಾಗಿದೆ. ಲೇಔಟ್ ಮಧ್ಯೆ ಹಾದುಹೋಗುವ 100 ಮೀ. ಅಗಲದ 10.79 ಕಿ.ಮೀ. ಉದ್ದದ ಮುಖ್ಯ ಆರ್ಟೀರಿಯಲ್ ರಸ್ತೆಗೆ (ಎಂಎಆರ್) ಪ್ರತ್ಯೇಕ ಟೆಂಡರ್ ಆಹ್ವಾನಿಸಲಾಗಿದೆ. ಜತೆಗೆ ಪ್ರಮುಖ ರಸ್ತೆಗಳನ್ನು ಸಂಪರ್ಕಿಸುವ ಹಾಗೂ ಬ್ಲಾಕ್‌ನಿಂದ ಬ್ಲಾಕ್‌ಗೆ ತೆರಳಲು ನಿರ್ಮಿಸಿರುವ 60 ಅಡಿ ಅಗಲದ ರಸ್ತೆಗಳು ಉತ್ತಮವಾಗಿದೆ. ಆದರೆ, 30, 40 ಹಾಗೂ 50 ಅಡಿ ಅಗಲದ ಒಳರಸ್ತೆಗಳ ಜಾಲ ಬಹುತೇಕ ಕಳಪೆಯಿಂದ ಕೂಡಿದೆ. ನೆಲವನ್ನು ಸಮತಟ್ಟು ಮಾಡದೆ, ವಾಹನಗಳ ಸಾಂದ್ರತೆಗೆ ಅನುಗುಣವಾಗಿ ಜಲ್ಲಿ, ಮರಳು, ಎಂ ಸ್ಯಾಂಡ್ ಬಳಸದ ಕಾರಣ ಆ ರೋಡ್‌ಗಳಲ್ಲಿ ಈಗಾಗಲೇ ಡಾಂಬರು ಪದರ ಕಳಚಿಕೊಳ್ಳುತ್ತಿವೆ. ಗುಣಮಟ್ಟ ಕಾಯ್ದುಕೊಳ್ಳದ ಕಾರಣ ಕಳಪೆ ಕಾಮಗಾರಿಯಿಂದ ರಸ್ತೆಗಳು ಕಳಪೆಯಾಗಿವೆ ಎಂಬ ಆಕ್ಷೇಪ ಕೇಳಿಬಂದಿದೆ.

ಲೇಔಟ್‌ನ ಒಳರಸ್ತೆಗಳನ್ನು ಏಕಕಾಲದಲ್ಲಿ ಅಭಿವೃದ್ಧಿಪಡಿಸಲು ವಿವಿಧ ಬ್ಲಾಕ್‌ಗಳನ್ನು ಒಟ್ಟುಗೂಡಿಸಿ ಟೆಂಡರ್ ವಹಿಸಲಾಗಿದೆ. ಆದರೆ, ಟೆಂಡರ್ ಸಲ್ಲಿಸಿದ್ದ ಕಂಪನಿಗಳ ಪೈಕಿ ಅರ್ಹತೆ ಇಲ್ಲದ ಕಂಪನಿಗೆ ಕಾಮಗಾರಿ ವಹಿಸಲಾಗಿದೆ. ದೊಡ್ಡ ಮೊತ್ತದ ಟೆಂಡರ್‌ನಿಂದಾಗಿ 5 ವರ್ಷದ ಹಿಂದೆ ನೋಂದಣಿಯಾಗಿರುವ ಕಂಪನಿಯು ವಾರ್ಷಿಕ 120 ಕೋಟಿ ರೂ. ವಹಿವಾಟು ನಡೆಸಿರಬೇಕು. ಜತೆಗೆ 80 ಕೋಟಿ ರೂ. ವೆಚ್ಚ ಮಾಡುವ ಸಾಮರ್ಥ್ಯವಿರಬೇಕು. 26 ಕೋಟಿ ರೂ. ನಗದು ವಹಿವಾಟಿಗೆ ಸಿದ್ಧರಿರಬೇಕು ಎಂಬ ಷರತ್ತು ವಿಧಿಸಲಾಗಿತ್ತು. ಆದರೆ, ತಾಂತ್ರಿಕ ಹಾಗೂ ಹಣಕಾಸು ಅರ್ಹತೆ ಹೊಂದದ ಕಂಪನಿಗಳಿಗೆ ಎಲ್ಲ ಕಾಮಗಾರಿಯನ್ನು ವಹಿಸಲಾಗಿದೆ. ಬಹುತೇಕ ಷರತ್ತನ್ನು ಪೂರೈಸದಿದ್ದರೂ, ಕಾಮಗಾರಿ ವಹಿಸಿರುವುದು ಅಕ್ರಮ ನಡೆದಿರುವ ಸಾಧ್ಯತೆ ಇದ್ದು, ಈ ಬಗ್ಗೆ ತನಿಖೆ ನಡೆಸುವಂತೆ ಸಾಮಾಜಿಕ ಕಾರ್ಯಕರ್ತ ಕೆ.ಎನ್. ಶರತ್‌ಬಾಬು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.

2023-24 52.32 ಕೋಟಿ ರೂ.

2023-24 52.39 ಕೋಟಿ ರೂ.

2023-24 52.35 ಕೋಟಿ ರೂ.

2023-24 38.15 ಕೋಟಿ ರೂ.

2023-24 26.09 ಕೋಟಿ ರೂ.

2024-25 167.96 ಕೋಟಿ ರೂ.