Ranji Trophy: ಕರ್ನಾಟಕ ತಂಡಕ್ಕೆ ದೇವದತ್​ ಪಡಿಕ್ಕಲ್​ ಹೊಸ ನಾಯಕ!

ಪ್ರತಿಷ್ಠಿತ ರಣಜಿ ಟ್ರೋಫಿ (Ranji Trophy) ದೇಶೀಯ ಕ್ರಿಕೆಟ್​ ಟೂರ್ನಿಯಲ್ಲಿ ಪ್ರವಾಸಿ ಮಧ್ಯಪ್ರದೇಶ ವಿರುದ್ಧ ಆಘಾತಕಾರಿ ಸೋಲು ಅನುಭವಿಸಿ ಇಕ್ಕಟ್ಟಿಗೆ ಸಿಲುಕಿರುವ ಬೆನ್ನಲ್ಲೇ, ಕೊನೇ ಲೀಗ್​ ಪಂದ್ಯಕ್ಕೆ ಮುನ್ನ ಕರ್ನಾಟಕ ತಂಡದಲ್ಲಿ ಹಲವು ಬದಲಾವಣೆಗಳನ್ನು ಮಾಡಲಾಗಿದೆ. ಪ್ರಮುಖವಾಗಿ ಅನುಭವಿ ಬ್ಯಾಟರ್​ ಮಯಾಂಕ್​ ಅಗರ್ವಾಲ್ (Mayank Agarwal)​ ಅವರನ್ನು ನಾಯಕತ್ವದಿಂದ ಕೆಳಗಿಳಿಸಲಾಗಿದ್ದು, ಎಡಗೈ ಬ್ಯಾಟರ್​ ದೇವದತ್​ ಪಡಿಕ್ಕಲ್​ರನ್ನು (Devdutt Padikkal) ಹೊಸ ನಾಯಕರನ್ನಾಗಿ ನೇಮಿಸಲಾಗಿದೆ.

ಟೀಮ್​ ಇಂಡಿಯಾ ಆಟಗಾರರಾದ ಕೆಎಲ್​ ರಾಹುಲ್​ ಮತ್ತು ವೇಗಿ ಪ್ರಸಿದ್ಧಕೃಷ್ಣ ರಾಜ್ಯ ತಂಡಕ್ಕೆ ಮರಳಿದ್ದರೆ, ಕರುಣ್​ ನಾಯರ್​ ಗಾಯದಿಂದಾಗಿ ಅಲಭ್ಯರಾಗಿದ್ದಾರೆ. ಗಾಯದಿಂದ ಚೇತರಿಸಿಕೊಂಡಿರುವ ಆರ್​. ಸ್ಮರಣ್​ ತಂಡಕ್ಕೆ ಮರಳಿದ್ದರೆ, ನಿಕಿನ್​ ಜೋಸ್​ ತಂಡದಿಂದ ಹೊರಬಿದ್ದಿದ್ದಾರೆ. ಪ್ರಸಿದ್ಧ ಕೃಷ್ಣಗೆ ಅಭಿಲಾಷ್​ ಶೆಟ್ಟಿ ಸ್ಥಾನ ಬಿಟ್ಟುಕೊಟ್ಟಿದ್ದಾರೆ. ಬ್ಯಾಟಿಂಗ್​ ವಿಭಾಗದಲ್ಲಿ ಕರುಣ್​ ನಾಯರ್​ ಅನುಭವದ ಕೊರತೆಯನ್ನು ರಾಹುಲ್​ ನೀಗಿಸಲಿದ್ದಾರೆ. ರಾಹುಲ್​ 2018ರ ಬಳಿಕ ಕೇವಲ 2 ರಣಜಿ ಪಂದ್ಯ ಆಡಿದ್ದು, 2025ರ ಜನವರಿಯಲ್ಲಿ ಕೊನೆಯದಾಗಿ ಹರಿಯಾಣ ಎದುರು ಕಣಕ್ಕಿಳಿದಿದ್ದರು. ಪ್ರಸಿದ್ಧಕೃಷ್ಣ ಕೂಡ ಹಾಲಿ ಆವೃತ್ತಿಯಲ್ಲಿ ಮೊದಲ ಬಾರಿ ಆಡಲಿದ್ದಾರೆ.

ಹಾಲಿ ರಣಜಿ ಆವೃತ್ತಿಯಲ್ಲಿ ವೈಫಲ್ಯ ಅನುಭವಿಸಿರುವ ಅಭಿನವ್​ ಮನೋಹರ್​ರನ್ನೂ ತಂಡದಿಂದ ಕೈಬಿಡಲಾಗಿದ್ದು, ಯುವ ಆಟಗಾರ ಧ್ರುವ ಪ್ರಭಾಕರ್​ಗೆ ವಿಜಯ್​ ಹಜಾರೆ ಟ್ರೋಫಿಯ ಯಶಸ್ಸಿನ ಬೆನ್ನಲ್ಲೇ ರಣಜಿ ಟ್ರೋಫಿ ತಂಡದಲ್ಲೂ ಮೊದಲ ಬಾರಿಗೆ ಸ್ಥಾನ ಕಲ್ಪಿಸಲಾಗಿದೆ.

ಹಾಲಿ ಆವೃತ್ತಿಯ 6 ಪಂದ್ಯಗಳಲ್ಲಿ 298 ರನ್​ ಮಾತ್ರ ಗಳಿಸಿ ಬ್ಯಾಟಿಂಗ್​ನಲ್ಲಿ ವೈಲ್ಯ ಅನುಭವಿಸಿರುವ ಮಯಾಂಕ್​ ಅಗರ್ವಾಲ್​ ಮೇಲಿನ ನಾಯಕತ್ವದ ಭಾರವನ್ನು ಇಳಿಸಲು ಅಮಿತ್​ ವರ್ಮ ನೇತೃತ್ವದ ನೂತನ ಆಯ್ಕೆ ಸಮಿತಿ ನಿರ್ಧರಿಸಿದೆ. ವಿಜಯ್​ ಹಜಾರೆ ಟ್ರೋಫಿಯಲ್ಲಿ 4 ಶತಕಗಳ ಸಹಿತ 700ಕ್ಕೂ ಅಧಿಕ ರನ್​ ಸಿಡಿಸಿದ ಬಳಿಕ ಮಧ್ಯಪ್ರದೇಶ ವಿರುದ್ಧ ಎರಡೂ ಇನಿಂಗ್ಸ್​ಗಳಲ್ಲಿ ಸೊನ್ನೆ ಸುತ್ತಿದ ನಡುವೆಯೂ ಪಡಿಕ್ಕಲ್​ಗೆ ಮೊದಲ ಬಾರಿ ರಾಜ್ಯ ತಂಡದ ನಾಯಕತ್ವ ವಹಿಸಲಾಗಿದೆ. ಟೂರ್ನಿಯ ಮೊದಲ ಪಂದ್ಯದಲ್ಲಿ 96, 15 ರನ್​ ಗಳಿಸಿದ್ದ ಪಡಿಕ್ಕಲ್​, ನಂತರ ಭಾರತ ಟೆಸ್ಟ್​ ತಂಡದಲ್ಲಿದ್ದ ಕಾರಣ ನಂತರದ 4 ಲೀಗ್​ ಪಂದ್ಯಗಳಲ್ಲಿ ಆಡಿರಲಿಲ್ಲ.

ಕರ್ನಾಟಕ ತಂಡ ಜನವರಿ 29ರಿಂದ ಫೆಬ್ರವರಿ 1ರವರೆಗೆ ಮೊಹಾಲಿಯಲ್ಲಿ ನಡೆಯಲಿರುವ 7ನೇ ಹಾಗೂ ಕೊನೇ ಲೀಗ್​ ಪಂದ್ಯದಲ್ಲಿ ಆತಿಥೇಯ ಪಂಜಾಬ್​ ತಂಡವನ್ನು ಎದುರಿಸಲಿದೆ. ನಾಕೌಟ್​ ಹಂತಕ್ಕೇರಲು ಕರ್ನಾಟಕ ತಂಡ ಈ ಪಂದ್ಯದಲ್ಲಿ ಗೆಲ್ಲಲೇಬೇಕಾದ ಒತ್ತಡದಲ್ಲಿದೆ.

ಕರ್ನಾಟಕ ತಂಡ: ದೇವದತ್​ ಪಡಿಕ್ಕಲ್​ (ನಾಯಕ), ಮಯಾಂಕ್​ ಅಗರ್ವಾಲ್​, ಕೆಎಲ್​ ರಾಹುಲ್​, ಅನೀಶ್​ ಕೆವಿ, ಆರ್​. ಸ್ಮರಣ್​, ಶ್ರೇಯಸ್​ ಗೋಪಾಲ್​, ಕೃತಿಕ್​ ಕೃಷ್ಣ (ವಿ.ಕೀ), ವೆಂಕಟೇಶ್​ ಎಂ, ವಿದ್ಯಾಧರ್​ ಪಾಟೀಲ್​, ವಿದ್ವತ್​ ಕಾವೇರಪ್ಪ, ಪ್ರಸಿದ್ಧಕೃಷ್ಣ, ಮೊಹ್ಸಿನ್​ ಖಾನ್​, ಶಿಖರ್​ ಶೆಟ್ಟಿ, ಕೆಎಲ್​ ಶ್ರೀಜಿತ್​ (ವಿ.ಕೀ), ಧ್ರುವ ಪ್ರಭಾಕರ್​.