ರೈತ ಸಂತೆಯಲ್ಲಿ ‘ಜೈವಿಕ ಗೊಬ್ಬರದ ಕ್ಯಾಪ್ಸೂಲ್’ ಆಕರ್ಷಣೆ

ಕೃಷಿ ವಿವಿ ಕ್ಯಾಂಪಸ್ ಜಿಕೆವಿಕೆಯಲ್ಲಿ ಶನಿವಾರ ನಡೆದ ರೈತ ಸಂತೆಯಲ್ಲಿ ಜೈವಿಕ ಗೊಬ್ಬರದ ಕ್ಯಾಪ್ಸೂಲ್ ಬಗ್ಗೆ ಅನೇಕ ಜನರು ಮಾಹಿತಿ ಪಡೆದು ಖರೀದಿಸಿದರು. ಗಿಡಗಳ ಆರೈಕೆ, ಬೆಳವಣಿಗೆ ಹಂತದಲ್ಲಿ ಬಳಸಬಹುದಾದ ಈ ಗೊಬ್ಬರದ ಗುಳಿಗೆ ಮಣ್ಣಿನ ಲವತ್ತತೆ ಹೆಚ್ಚಿಸುತ್ತದೆ. ಅಷ್ಟೇ ಅಲ್ಲ, ಪಾಟ್‌ನಲ್ಲಿ ಮಣ್ಣು ಹಾಗೂ ಗೊಬ್ಬರ ಕೊರತೆಯನ್ನು ನಿವಾರಿಸಿ ಗಿಡಗಳು ಉತ್ತಮವಾಗಿ ಬೆಳೆಯಲು ಸಹಕಾರಿಯಾಗುತ್ತದೆ. ಕಡಿಮೆ ಬೆಲೆಯಲ್ಲಿ ಸಿಗುವ ಈ ಜೈವಿಕ ಗೊಬ್ಬರದ ಕ್ಯಾಪ್ಸೂಲ್ ತಾರಸಿ ತೋಟ ಕೈಗೊಳ್ಳುವವರಿಗೆ ಅನುಕೂಲ ಮಾಡಿಕೊಟ್ಟಿದೆ ಎಂದು ವಿವಿಯ ಕುಲಪತಿ ಡಾ. ಎಸ್.ವಿ. ಸುರೇಶ್ ಪ್ರತಿಕ್ರಿಯಿಸಿದರು.

ಕೃಷಿ ವಿವಿಯ ಕೃಷಿ ವ್ಯವಹಾರ ನಿರ್ವಹಣಾ ವಿಭಾಗದಲ್ಲಿ (ಎಬಿಎಂ) 2ನೇ ವರ್ಷದ ವಿದ್ಯಾರ್ಥಿಯಾಗಿರುವ ಜಿ.ಎಸ್. ಮಂಜುನಾಥ್ ತನ್ನ ಪ್ರಾಧ್ಯಾಪಕರ ಮಾರ್ಗದರ್ಶನದಲ್ಲಿ ಸಿದ್ಧಪಡಿಸಿರುವ ಜೈವಿಕ ಗೊಬ್ಬರದ ಕ್ಯಾಪ್ಸೂಲ್​​​ಗಳಿಗೆ ನಗರವಾಸಿಗಳು ಮಾರುಹೋಗಿದ್ದಾರೆ. ಕಳೆದ ಜನವರಿಯಿಂದ ರೈತ ಸಂತೆಯಲ್ಲೇ ಸಾರ್ವಜನಿಕರಿಗೆ ಮಾರಾಟ ಮಾಡುತ್ತಿದ್ದಾರೆ. 10 ರೂ. ಮುಖಬೆಲೆಯ ಪಾಕೆಟ್‌ನಲ್ಲಿ 6 ಕ್ಯಾಪ್ಸೂಲ್‌ಗಳಿದ್ದು, ಅವುಗಳಲ್ಲಿ 1-2ಅನ್ನು ಗಿಡ ನೆಡುವ ವೇಳೆ ಅಥವಾ ಬೆಳವಣಿಗೆ ಹಂತದಲ್ಲಿ 15 ದಿನಗಳ ಅಂತರದಲ್ಲಿ ಮಣ್ಣಿನಲ್ಲಿ ಇಡಬಹುದು. ನಗರವಾಸಿಗಳಿಗೆ ಕಡಿಮೆ ಪ್ರಮಾಣದ ಜೈವಿಕ ಗೊಬ್ಬರದ ಕೊರತೆಯನ್ನು ಈ ಕ್ಯಾಪ್ಸೂಲ್ ನಿವಾರಿಸಿರುವ ಫೀಡ್‌ಬ್ಯಾಕ್ ದೊರೆತಿದೆ. ಪ್ರತಿ ತಿಂಗಳೂ ಸಂತೆಯಲ್ಲಿ 1,000 ಕ್ಯಾಪ್ಸೂಲ್ ಮಾರಾಟ ಮಾಡಲಾಗುತ್ತಿದೆ ಎಂದು ಮಂಜುನಾಥ್ ತಿಳಿಸಿದರು.

ಈ ಬಾರಿಯ ಸಂತೆಗೆ ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ್ದರು. ಉದ್ದಿನ ಹಪ್ಪಳ, ಕಲ್ಲಂಗಡಿಯಿಂದ ತಯಾರಿಸಿದ ‘ಮೊಹಬ್ಬತ್ ಶರ್ಬತ್’, ಅವಕಾಡೊ ಟೋಸ್ಟ್ ತಿನಿಸು ಹಾಗೂ ಪಾನೀಯ ಸಂತೆಯ ಆಕರ್ಷಣೆಯಾಗಿತ್ತು. ಸುಗಂಧ ಮತ್ತು ಔಷಧೀಯ ಸಸ್ಯಗಳು, ಅಲಕಾರಿಕ ಗಿಡಗಳು, ಎರೆಹುಳು ಗೊಬ್ಬರ, ಅಲಂಕಾರಿಕ ಮೀನುಗಳು ಹಾಗೂ ಇತರ ಕೃಷಿ ಉತ್ಪನ್ನಗಳನ್ನು ಖರೀದಿಸಿದರು.

ರೈತಸಂತೆಯಲ್ಲಿ ವಿವಿಯ ಕುಲಸಚಿವ ಡಾ. ಕೆ.ಮಧುಸೂದನ್, ಸಂಶೋಧನಾ ನಿರ್ದೇಶಕ ಡಾ. ಮೂಡಲಗಿರಿಯಪ್ಪ, ವಿಸ್ತರಣಾ ನಿರ್ದೇಶಕ ಡಾ. ವೈ.ಎನ್. ಶಿವಲಿಂಗಯ್ಯ, ಸಹ ವಿಸ್ತರಣಾ ನಿರ್ದೇಶಕ ಡಾ. ಕೆ.ಪಿ. ರಘುಪ್ರಸಾದ್ ಹಾಜರಿದ್ದರು.

ರೈತ ಸಂತೆಯಲ್ಲಿ ಕೃಷಿಕರು ಬೆಳೆದ ವಿವಿಧ ಬಗೆಯ ಹಣ್ಣು-ತರಕಾರಿಗಳು ಹೆಚ್ಚಿನ ಪ್ರಮಾಣದಲ್ಲಿ ಮಾರಾಟವಾದವು. ಸಾವಯವ ಉತ್ಪನ್ನ, ಸಿರಿಧಾನ್ಯ ಹಾಗೂ ಮಹಿಳಾ ಸ್ವಸಹಾಯ ಸಂಘಗಳು ತಯಾರಿಸಿರುವ ಉತ್ಪನ್ನಗಳು ಕೂಡ ಬಿಸಿದೋಸೆಯಂತೆ ಬಿಕರಿಯಾದವು. ಇವುಗಳಲ್ಲಿ ಜೋಳದಿಂದ ತಯಾರಿಸಿದ ಅಂಬಲಿ ಆರೋಗ್ಯಕರ ಪಾನೀಯ ಆಗಿರುವುದರಿಂದ ಆರೋಗ್ಯಕ್ಕೆ ಸಹಕಾರಿಯಾಗಲಿದೆ. ಬೇಸಿಗೆಯಲ್ಲಿ ದೇಹಕ್ಕೆ ತಂಪು ಹಾಗೂ ಶಕ್ತಿಯನ್ನು ನೀಡುವ ಈ ಪೌಷ್ಟಿಕ ಪಾನೀಯ ಸಿರಿಧಾನ್ಯಗಳ ಮಹತ್ವ ಹಾಗೂ ಮೌಲ್ಯವರ್ಧನೆ ಬಗ್ಗೆ ರೈತರು ಗ್ರಾಹಕರಿಗೆ ಅರಿವು ಮೂಡಿಸಿದರು.