ನಾಗಾವರದಲ್ಲಿ ಮೆಟ್ರೋ ವಾಣಿಜ್ಯ ಸಂಕೀರ್ಣ | Complex in nagavara

ನಮ್ಮ ಮೆಟ್ರೋದ ಬಹು ನಿರೀತ ಯೋಜನೆಯಾದ "ಗುಲಾಬಿ ಮಾರ್ಗದಲ್ಲಿ ನಾಗಾವರ ನಿಲ್ದಾಣದಲ್ಲಿ 4 ಅಂತಸ್ತಿನ ವಾಣಿಜ್ಯ ಸಂಕೀರ್ಣ, ಬಹುಮಹಡಿ ಪಾರ್ಕಿಂಗ್​ ನಿರ್ಮಾಣಕ್ಕೆ ಬೆಂಗಳೂರು ಮೆಟ್ರೋ ರೈಲು ನಿಗಮ ನಿಯಮಿತ (ಬಿಎಂಆರ್​ಸಿಎಲ್​)ಯೋಜನೆ ರೂಪಿಸಿದೆ.

ಸ್ಥಳಾವಕಾಶ ಬೇಡಿಕೆ ಬಗ್ಗೆ ಅಭಿಪ್ರಾಯಗಳನ್ನು ಆಹ್ವಾನಿಸಿದೆ.

ಕಾರ್ಪೊರೇಟ್​ ಸಂಸ್ಥೆಗಳು, ಡೆವಲಪರ್​ಗಳು, ನಿರ್ವಾಹಕರು, ವ್ಯಾಪಾರಿಗಳು ಮತ್ತು ಚಿಲ್ಲರೆ ಅಥವಾ ಮಾಲ್​ ನಡೆಸುವವರು ಕಚೇರಿಗೆ ಅಥವಾ ವ್ಯಾಪಾರಕ್ಕೆ ಸ್ಥಳಾವಕಾಶ ಕೋರಿ ಅರ್ಜಿ ಸಲ್ಲಿಸಬಹುದು ಎಂದು ತಿಳಿಸಿದೆ.

ನಾಗವಾರದ ಭೂಗತ ನಿಲ್ದಾಣದ ಪಕ್ಕದಲ್ಲಿ 3,226 ಚದರ ಮೀಟರ್​ ವಿಸ್ತೀರ್ಣ ಲಭ್ಯವಿದೆ. ಕಟ್ಟಡದ ನಿಯಮಗಳ ಪ್ರಕಾರ ಬಹು ಹಂತದ ಪಾರ್ಕಿಂಗ್​ ಸೌಲಭ್ಯಗಳ ಅಭಿವೃದ್ಧಿಗೆ ಬಳಕೆಯಾಗಲಿದೆ. 615 ಕಾರುಗಳು ಮತ್ತು 161 ದ್ವಿಚಕ್ರ ವಾಹನಗಳನ್ನು ನಿಲ್ಲಿಸುವ ಸಾಮರ್ಥ್ಯ ಇರಲಿದೆ ಎಂದು ತಿಳಿಸಿದೆ.

ಈ ಸ್ಥಳವು ಗ್ರೇಡ್​ "ಎ' ಕಚೇರಿಗಳು, ಕಾರ್ಯ ಕೇಂದ್ರಗಳು ಅಥವಾ ಪ್ರೀಮಿಯಂ ಶಾಪಿಂಗ್​ ಮಾಲ್​ಗಳಿಗೆ ಸೂಕ್ತವಾಗಿದೆ. ಎಂಬೆಸಿ ಮಾನ್ಯತಾ ಬಿಸಿನೆಸ್​ ಪಾರ್ಕ್​, ಕಾರ್ಲೆ ಟೌನ್​ ಸೆಂಟರ್​ ಮತ್ತು ಇತರ ಐಟಿ, ವಾಣಿಜ್ಯ ಕೇಂದ್ರಗಳಿಗೆ ಹತ್ತಿರವಿದೆ. 2026ರಲ್ಲಿ ಗುಲಾಬಿ ಮಾರ್ಗದಲ್ಲಿ ಮೆಟ್ರೊ ಸಂಚಾರ ಆರಂಭವಾಗಲಿದೆ.

ವಾಣಿಜ್ಯ ಸಂಕೀರ್ಣದಲ್ಲಿ ಮೊದಲ ಎರಡು ಮಹಡಿಗಳನ್ನು ಕಂಬ, ಬೀಮ್​ ಮತ್ತು ತೊಲೆಗಳೊಂದಿಗೆ ಪೂರ್ಣಗೊಳಿಸಲಾಗಿದೆ. ಗೋಡೆಗಳ ಕೆಲಸವಷ್ಟೇ ಬಾಕಿ ಇದೆ. ಉಳಿದ ಎರಡು ಮಹಡಿಗಳನ್ನು 10 ತಿಂಗಳಲ್ಲಿ ಪೂರ್ಣಗೊಳಿಸಲಾಗುವುದು ಎಂದು ತಿಳಿಸಿದೆ.

ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಸಂಪರ್ಕಿಸುವ ನೀಲಿ ಮಾರ್ಗವು ನಾಗವಾರದಲ್ಲಿ ಉತ್ತರಿಸಿದ ನಿಲ್ದಾಣದ ಮೂಲಕ ಹಾದು ಹೋಗಲಿದ್ದು, 2027ರಲ್ಲಿ ಆರಂಭಗೊಳ್ಳಲಿದೆ.

ಸದ್ಯ ಇಲ್ಲಿ ಉದ್ಯಮಿಗಳ ಆಸಕ್ತಿಯನ್ನು ತಿಳಿಯುವುದಕ್ಕಾಗಿ ಆಹ್ವಾನ ನೀಡಲಾಗಿದೆ. ಡಿಸೆಂಬರ್​ 15ರ ಒಳಗೆ ಆಸಕ್ತರು ಪ್ರಸ್ತಾವ ಸಲ್ಲಿಸಬೇಕು. ಇದುವೇ ಅಂತಿಮವಲ್ಲ, ಬಿಎಂಆರ್​ಸಿಎಲ್​ ಎಲ್ಲ ಇಒಐ (ಆಸಕ್ತಿಯ ಅಭಿವ್ಯಕ್ತಿ) ಗಳನ್ನು ಮೌಲ್ಯಮಾಪನ ಮಾಡುತ್ತದೆ. ಸ್ವೀಕರಿಸಿದ ಪರಿಕಲ್ಪನೆ ಮತ್ತು ಪ್ರತಿಕ್ರಿಯೆಗಳ ಆಧಾರದಲ್ಲಿ ಅಭಿವೃದ್ಧಿ ಮಾದರಿಯನ್ನು ಅಂತಿಮಗೊಳಿಸಲಾಗುವುದು. ಬಳಿಕ ಟೆಂಡರ್​ ಕರೆಯಲಾಗುವುದು ಎಂದು ಬಿಎಂಆರ್​ಸಿಎಲ್​ ಅಧಿಕಾರಿಗಳು ತಿಳಿಸಿದ್ದಾರೆ.

ಇದು ಬಿಎಂಆರ್​ಸಿಎಲ್​ ಈ ವರ್ಷ ಘೋಷಿಸಿದ ಮೂರನೇ ಆಸ್ತಿ ಅಭಿವೃದ್ಧಿ ಯೋಜನೆಯಾಗಿದೆ. ಕೆ.ಆರ್​.ಪುರ ಮೆಟ್ರೋ ನಿಲ್ದಾಣದ ಬಳಿ 1.66 ಎಕರೆ ವಿಸ್ತೀರ್ಣದಲ್ಲಿ ನೆಲಮಾಳಿಗೆಯ ಪಾರ್ಕಿಂಗ್​ ಹೊಂದಿರುವ 11 ಅಂತಸ್ತಿನ ವಾಣಿಜ್ಯ ಕಟ್ಟಡ ನಿರ್ಮಿಸಲು ಈಗಾಗಲೇ ಯೋಜನೆ ರೂಪಿಸಿದೆ. ಮೆಜೆಸ್ಟಿಕ್​ನಲ್ಲಿ ಮೆಟ್ರೋ ನಿಲ್ದಾಣದ ಮೇಲಿರುವ 31,920 ಚದರ ಮೀಟರ್​ ಸ್ಥಳದಲ್ಲಿ 10 ಲಕ್ಷ ಚದರ ಮೀಟರ್​ ವಾಣಿಜ್ಯ ಸಂಕೀರ್ಣ ಹಾಗೂ ಪಾರ್ಕಿಂಗ್​ ಸೌಲಭ್ಯ ಕಲ್ಪಿಸಲು ಯೋಜನೆ ರೂಪಿಸಲಾಗಿದೆ.