ರೇರಾದಲ್ಲಿ ದಾಖಲಾಗುವ ಪ್ರಕರಣಗಳು ವರ್ಷಗಟ್ಟಲೇ ವಿಚಾರಣೆ ನಡೆದರೂ ಸೂಕ್ತ ಪರಿಹಾರ ಸಿಗದು ಎಂಬ ಮಾತು ಚಾಲ್ತಿಯಲ್ಲಿದೆ. ಕೆಲವೊಂದು ಕೇಸ್ಗಳಲ್ಲಿ ಬಿಲ್ಡರ್/ನಿರ್ಮಾಣ ಕಂಪನಿ ಪರ ಮೃಧು ಧೋರಣೆ ಕೈಗೊಳ್ಳಲಾಗುತ್ತದೆ ಎಂಬ ಅಪವಾದವೂ ಇದೆ. ಇನ್ನೂ ಕೆಲ ಪ್ರಕರಣಗಳಲ್ಲಿ ರೇರಾ ಆದೇಶಗಳಿಗೆ ಮೇಲ್ಮನವಿ ಪ್ರಾಧಿಕಾರ/ಹೈಕೋರ್ಟ್ನಲ್ಲಿ ತಡೆಯಾಜ್ಞೆ ತರಲಾಗುತ್ತಿದೆ. ಆದರೆ, ಹಾಲಿ ಪ್ರಕರಣದಲ್ಲಿ 10 ತಿಂಗಳಲ್ಲೇ ಹಲವಾರು ಬಾರಿ ವಿಚಾರಣೆ ನಡೆಸಿ ಕೇಸ್ ಇತ್ಯರ್ಥಪಡಿಸಲಾಗಿದೆ. ರೇರಾ ಆದೇಶವನ್ನು ಒಪ್ಪುವುದಾಗಿ ಭೂಮಾಲೀಕ ಹಾಗೂ ಬಿಲ್ಡರ್ ಇಬ್ಬರೂ ವಾಗ್ದಾನ ನೀಡಿದ್ದು, ದಶಕದಿಂದ ನೆನೆಗುದಿಗೆ ಬಿದ್ದಿರುವ ಬೃಹತ್ ವಸತಿ ಯೋಜನೆಗೆ ಮರುಜೀವ ಬಂದಂತಾಗಿದೆ. ಮುಖ್ಯವಾಗಿ 400ಕ್ಕೂ ಅಧಿಕ ಸಂಖ್ಯೆಯ ಜನರಿಗೆ ಬಿಗ್ ರಿಲೀಫ್ ದೊರೆತು, 2026ರೊಳಗೆ ಸೂರು ಸಿಗುವ ನಿರೀಕ್ಷೆ ಹುಟ್ಟಿಸಿದೆ.
