ಮಾನ್ಯತಾ ಟೆಕ್ ಪಾರ್ಕ್‌ಗೆ ಪ್ರವಾಹ ಭೀತಿ ?

ಮಾನ್ಯತಾ ಟೆಕ್ ಪಾರ್ಕ್ ಸುಮಾರು 250ಕ್ಕೂ ಹೆಚ್ಚು ಎಕರೆಯಲ್ಲಿ ಹರಡಿಕೊಂಡಿದೆ. ಇತ್ತೀಚಿನ ವರ್ಷಗಳ ವರೆಗೂ ಸೀಮಿತ ಸಂಖ್ಯೆಯ ಕಂಪನಿಗಳು ಕಾರ್ಯಾಚರಿಸುತ್ತಿತ್ತು. ಆದರೆ, ಕಳೆದೆರಡು ವರ್ಷದಿಂದೀಚಿಗೆ ದೊಡ್ಡ ಸಂಖ್ಯೆಯಲ್ಲಿ ಕಂಪನಿಗಳು ಸ್ಥಾಪನೆಗೊಂಡು ಅಲ್ಲಿ ಕೆಲಸ ನಿರ್ವಹಿಸುವವರ ಸಂಖ್ಯೆ ದುಪ್ಪಟ್ಟಾಗಿದೆ. ಸಿಬ್ಬಂದಿ ಸಂಖ್ಯೆಗೆ ಕಚೇರಿಯೊಳಗೆ ಸೌಲಭ್ಯವಿದ್ದರೂ, ಟೆಕ್ ಪಾರ್ಕ್‌ನಲ್ಲಿ ಓಡಾಡಲು ರಸ್ತೆ ಸೇರಿ ಇತರ ಮೂಲಸೌಕರ್ಯ ಕೊರತೆ ಕಾಡಲಾರಂಭಿಸಿದೆ. ಪೀಕ್ ಅವರ್‌ನಲ್ಲಿ ಸಂಚಾರ ದಟ್ಟಣೆ ಉಂಟಾಗುತ್ತಿದೆ. ಒಂದೇ ಸಮಯದಲ್ಲಿ ಸಿಬ್ಬಂದಿ ಕೆಲಸಕ್ಕೆ ಹೋಗಿಬರಲು ಸಂಚಾರ ಸಿಕ್ಕುವಿನಲ್ಲಿ ಸಿಲುಕಿ ಪಡಿಪಾಟಿಲು ಅನುಭವಿಸಬೇಕಾದ ಸ್ಥಿತಿ ನಿರ್ಮಾಣವಾಗಿದೆ.

ಮಾನ್ಯತಾ ಟೆಕ್ ಪಾರ್ಕ್ ಆವರಣ ಬೃಹತ್ ಕಟ್ಟಡಗಳಿಂದ ಆವರಿಸಿದೆ. ಹಲವು ವಿದೇಶಿ ವಾಸ್ತುಶಿಲ್ಪವಿರುವ ಬಿಲ್ಡಿಂಗ್‌ಗಳೂ ಇವೆ. ಕೆಲವೆಡೆ ಹಸಿರು ಕಟ್ಟಡಗಳು ಗಮನ ಸೆಳೆಯುವಂತಿವೆ. ರಾತ್ರಿ ವೇಳೆ ಬಣ್ಣದ ದೀಪಗಳಿಂದ ಝಗಮಗಿಸುವ ದೃಶ್ಯ ವರ್ಣಣಾತೀತ. ಆದರೆ, ಮಳೆ ಬಂದಲ್ಲಿ ಹತ್ತಿ ಹಣ್ಣಿನೊಳಗೆ ಹುಳುಕು ಎಂಬಂತೆ ಟೆಕ್ ಪಾರ್ಕ್ ಒಳಗಿನ ಬಣ್ಣ ಬಯಲಾಗುವುದುಂಟು. ಭಾರೀ ಮಳೆಯಾದಲ್ಲಿ ಟೆಕ್ ಪಾರ್ಕ್​​ ಮಧ್ಯೆ ಹಾದುಹೋಗಿರುವ ಸುಮಾರು 80-100 ಅಡಿ ಅಗಲದ ಬೃಹತ್ ನೀರುಗಾಲುವೆ ತುಂಬಿ ಹರಿಯುತ್ತದೆ. ಆ ವೇಳೆ ಆವರಣದೊಳಗೆ ಮಳೆನೀರು ನುಗ್ಗಿ ಅವಾಂತರ ಸೃಷ್ಟಿಯಾಗುತ್ತದೆ. ಜತೆಗೆ ಕಟ್ಟಡಗಳ ಮೇಲೆ ಬೀಳುವ ಮಳೆನೀರು ರಸ್ತೆ ಮೇಲೆ ಹರಿದು ವಾಹನ ಸಂಚಾರ ಅಸ್ತವ್ಯಸ್ತವಾಗುವುದುಂಟು. ಜತೆಗೆ ರಾಜಕಾಲುವೆ ಆಸುಪಾಸು ದುರ್ವಾಸನೆ ಬೀರುವುದರಿಂದ ಮೂಗಿಮುಚ್ಚಿ ತೆರಳಬೇಕಾಗುತ್ತದೆ.

2018ರಲ್ಲಿ ಸುರಿದ ಭಾರಿ ಮಳೆಯಿಂದಾಗಿ ಮೊದಲ ಬಾರಿಗೆ ಮಾನ್ಯತಾ ಟೆಕ್ ಪಾರ್ಕ್ ನೀರಿನಲ್ಲಿ ಮುಳುಗಿತ್ತು. ಆಗ ಅಲ್ಲಿನ ರಾಜಕಾಲುವೆಯಲ್ಲಿ ತುಂಬಿದ್ದ ಹೂಳಿನಿಂದಾಗಿ ಮಳೆನೀರು ಹರಿವಿಗೆ ತಡೆ ಉಂಟಾಗಿತ್ತು. ಜತೆಗೆ ರಾಜಕಾಲುವೆ ಮೇಲೆ ಕಾಂಕ್ರೀಟ್ ಹಾಕಿದ್ದರಿಂದ ರಭಸವಾಗಿ ಹರಿದುಬರುತ್ತಿದ್ದ ನೀರು ಆವರಣಕ್ಕೆ ನುಗ್ಗಿ ಅವಾಂತರ ಸೃಷ್ಟಿಯಾಗಿತ್ತು. ಆಗ ಸ್ಥಳ ಪರಿಶೀಲನೆ ನಡೆಸಿದ್ದ ನಗರಾಭಿವೃದ್ಧಿ ಇಲಾಖೆಯ ಅಧಿಕಾರಿ ತುಷಾರ್ ಗಿರಿನಾಥ್ ಕಾಂಕ್ರೀಟ್ ತೆಗೆದುಹಾಕಲು ಸೂಚಿಸಿದ್ದರು. ದುರ್ವಾಸನೆ ಕಾರಣಕ್ಕೆ ಆ ಕೆಲಸ ಅರ್ಧಕ್ಕೆ ಸ್ಥಗಿತಗೊಂಡಿತ್ತು. ನಂತರದ ವರ್ಷದಲ್ಲಿ ಅದೇ ಸಮಸ್ಯೆ ಮರುಕಳಿಸಿದ್ದರಿಂದ ಟೆಕ್ ಪಾರ್ಕ್ ಆಡಳಿತ ಮಂಡಳಿ ಸಮಸ್ಯೆಯನ್ನು ಪರಿಹರಿಸಿತ್ತು. ಇದಕ್ಕೆ ಬಿಬಿಎಂಪಿ ಕೂಡ ಕೈಜೋಡಿಸಿ ರಾಜಕಾಲುವೆಯ ತಡೆಗೋಡೆಯನ್ನು ಎತ್ತರಿಸಿ ಪರಿಹಾರ ಕೈಗೊಳ್ಳಲಾಗಿತ್ತು.

ಪ್ರಸ್ತುತ ಟೆಕ್ ಪಾರ್ಕ್‌ನ ಪಶ್ಚಿಮ ಭಾಗದಿಂದ ಪ್ರವೇಶಿಸುವ ರಾಜಕಾಲುವೆಯ ಪುನಶ್ಚೇತನ ಕಾಮಗಾರಿ ಕೈಗೆತ್ತಿಕೊಳ್ಳಲಾಗಿದೆ. ಈ ಕೆಲಸ ಕುಂಟುತ್ತಾ ಸಾಗಿದ್ದು, ಸರಿಯಾದ ನಿರ್ವಹಣೆ ಇಲ್ಲದೆ ನಿರ್ಲಕ್ಷ್ಯಕ್ಕೆ ಒಳಗಾಗಿದೆ. ಇದೇ ಜಾಗದಲ್ಲಿ ಜಕ್ಕೂರು ಕೆರೆ, ರಾಚೇನಹಳ್ಳಿ ಕೆರೆಯಿಂದ ಹಾದುಬರುವ ಮತ್ತೊಂದು ನೀರುಗಾಲುವೆ ಸೇರ್ಪಡೆಯಾಗುತ್ತದೆ. ಜತೆಗೆ ವೀರಣ್ಣನಪಾಳ್ಯ ಕಡೆಯಿಂದ ಮತ್ತೊಂದು ರಾಜಕಾಲುವೆಯು ಸೇರಿ ಹೆಚ್ಚಿನ ಹರಿವನ್ನು ಸೃಷ್ಟಿಸುತ್ತದೆ. ಇದರ ಜತೆಗೆ ಹೆಬ್ಬಾಳ ಕೆರೆ ಹಾಗೂ ನಾಗವಾರ ಕೆರೆ ಅಭಿವೃದ್ಧಿ ಕಾಮಗಾರಿ ಆರಂಭಗೊಂಡಿದ್ದು, ರಾಜಕಾಲುವೆ ಹಾಗೂ ತ್ಯಾಜ್ಯನೀರು ಹರಿಯುವಿಕೆ ನೇರವಾಗಿ ಮಾನ್ಯತಾ ಟೆಕ್ ಪಾರ್ಕ್‌ನತ್ತ ಹರಿಬಿಡಲಾಗಿದೆ. ಇದರಿಂದಾಗಿ ಮಳೆಗಾಲದಲ್ಲಿ ಪೂರ್ಣ ಪ್ರಮಾಣದ ನೀರು ಟೆಕ್ ಪಾರ್ಕ್ ಮೂಲಕ ಹರಿದುಹೋದಲ್ಲಿ ನೆರೆ ಸೃಷ್ಟಿಯಾಗುವುದನ್ನು ತಳ್ಳಿಹಾಕಲಾಗದು. ಈ ವಾಸ್ತವ ಸ್ಥಿತಿಯನ್ನು ಅರಿತು ಪಾಲಿಕೆ ಅಧಿಕಾರಿಗಳು ಕಾಮಗಾರಿಯನ್ನು ತ್ವರಿತವಾಗಿ ಪೂರ್ಣಗೊಳಿಸಬೇಕು ಎಂಬ ಸಲಹೆ ವ್ಯಕ್ತವಾಗಿದೆ.

ಮಹಾನಗರದಲ್ಲಿ ಕೆರೆಗಳ ನೀರಿನ ಹರಿವು ಹಾಗೂ ಮಳೆನೀರು ಹರಿಯುವಿಕೆ ಆಧರಿಸಿ ಹೆಬ್ಬಾಳ, ವೃಷಭಾವತಿ, ಚಲ್ಲಘಟ್ಟ ಹಾಗೂ ಕೋರಮಂಗಲ ಎಂಬ 4 ಕಣಿವೆಗಳಾಗಿ ಗುರತಿಸಲಾಗಿದೆ. ಇವುಗಳ ಪೈಕಿ ಹೆಬ್ಬಾಳ ಕಣಿವೆ ವ್ಯಾಪ್ತಿಯಲ್ಲಿನ ಕೆರೆಯಿಂದ ಕರೆಗೆ ಹರಿಯುವ ನೀರಿನ ಜಾಲ ಉತ್ತಮವಾಗಿದೆ. ದೊಡ್ಡಬೊಮ್ಮಸಂದ್ರ ಕೆರೆ, ಹೆಬ್ಬಾಳ-ನಾಗವಾರ ಕೆರೆ ಮೂಲಕ ಕೆ.ಆರ್.ಪುರ ಬಳಿಯ ಎಲೆಮಲ್ಲಪ್ಪಶೆಟ್ಟಿ ಕೆರೆವರೆಗೂ ಸರಾಗ ಹರಿವು ಇದೆ. ಈ ನೀರು ಹರಿವಿನ ಪಾತ್ರ ರಿಂಗ್ ರಸ್ತೆಗೆ ಸಮಾನಾಂತರವಾಗಿದ್ದು, ಹೆಚ್ಚು ಮಳೆ ಬಂದಲ್ಲಿ ಸಮಸ್ಯೆ ಸೃಷ್ಟಿಯಾಗುತ್ತದೆ. ಆದರೆ, ಪಾಲಿಕೆಯಿಂದ ನೀರುಗಾಲುವೆ ಪುನಶ್ಚೇತನ ಕಾರ್ಯ ಕೈಗೆತ್ತಿಕೊಳ್ಳದಿರುವುದು ಸಮಸ್ಯೆಗೆ ಮುಖ್ಯ ಕಾರಣವಾಗಿದೆ ಎನ್ನುತ್ತಾರೆ ಸ್ಥಳೀಯ ಜನಪ್ರತಿನಿಧಿಗಳು.

ಸದ್ಯ ಮಾನ್ಯತಾ ಟೆಕ್ ಪಾರ್ಕ್ ಸ್ಥಳದಲ್ಲಿ ಸಾಮರ್ಥ್ಯಕ್ಕಿಂತ ಹೆಚ್ಚು ಪ್ರಮಾಣದ ನಿರ್ಮಾಣ ಚಟುವಟಿಕೆ ನಡೆಯುತ್ತಿದೆ. ಉದ್ಯಾನ, ಮುಕ್ತಜಾಗ, ಸುರಕ್ಷಾ ವಲಯಕ್ಕೆ ಮೀಸಲಿಟ್ಟಿರುವ ಜಾಗದಲ್ಲೂ ಬಿಲ್ಡಿಂಗ್‌ಗಳು ಮೇಲೇಳುತ್ತಿವೆ. ಗಗನಚುಂಬಿ ಕಟ್ಟಡ ರೀತಿ ಹೊಸ ಬಿಲ್ಡಿಂಗ್‌ಗಳನ್ನು ನಿರ್ಮಾಣ ಮಾಡುತ್ತಿರುವುದರಿಂದ ಮೂಲಸೌಕರ್ಯಕ್ಕೆ ಕೊರತೆ ಉಂಟುಮಾಡಿದೆ. ಇದರ ಅರಿವಿದ್ದರೂ, ಕೆಐಎಡಿಬಿ, ಬಿಡಿಎ, ನಗರ ಪಾಲಿಕೆ ಕಟ್ಟಡಗಳ ಉಪವಿಧಿಗಳನ್ನು ಕಡ್ಡಾಯವಾಗಿ ಪಾಲಿಸುವಂತೆ ಆಡಳಿತ ಮಂಡಳಿಗೆ ಸೂಚಿಸದಿರುವುದು ಭವಿಷ್ಯದಲ್ಲಿ ಟೆಕ್ ಪಾರ್ಕ್ ಕಿಷ್ಕಿಂಧೆಯಂತಾದರೂ ಅಚ್ಚರಿಪಡಬೇಕಿಲ್ಲ.

* ಟೆಕ್ ಪಾರ್ಕ್‌ನ ಪಶ್ಚಿಮ ಗಡಿಯಿಂದ ಎಂಎಸ್‌ಆರ್ ನಾರ್ತ್ ಸಿಟಿ (ಹೆಣ್ಣೂರು ಮುಖ್ಯರಸ್ತೆ) ತನಕ 2 ಕಿ.ಮೀ. ವ್ಯಾಪ್ತಿಯಲ್ಲಿ ನಡೆದಿರುವ ಕಾಮಗಾರಿ ತ್ವರಿತಗೊಳಿಸಬೇಕು

* ರಾಜಕಾಲುವೆಯಲ್ಲಿ ಹೂಳೆತ್ತಿ ಬಫರ್ ವಲಯದಲ್ಲಿ ಮುಕ್ತ ಜಾಗವಾಗಿ ಮೀಸಲಿಡುವುದು

* ಟೆಕ್ ಪಾರ್ಕ್ ಆವರಣದಲ್ಲಿ ಮಿತಿಗಿಂತ ಹೆಚ್ಚು ನಿರ್ಮಾಣ ಚಟುವಟಿಕೆಗೆ ನಿರ್ಬಂಧ

* ಟೆಕ್ ಪಾರ್ಕ್ ಆವರಣದೊಳಗೆ ವಾಹನ ಸಂಚಾರ ಇನ್ನಷ್ಟು ಸುಗಮಗೊಳಿಸಬೇಕಿದೆ

* ದಟ್ಟಣೆ ಅವಧಿಯಲ್ಲಿ ಟ್ರಾಫಿಕ್ ನಿಯಂತ್ರಿಸಲು ಹೆಚ್ಚಿನ ಸಂಖ್ಯೆ ಪೇದೆಗಳ ನಿಯೋಜನೆ

"