ಮಳೆನೀರುಗಾಲುವೆಗಳ ಮೇಲ್ದರ್ಜೆಗೆ ಜಿಬಿಎ ಸಿದ್ಧತೆ

ದಶಕಗಳಿಂದ ನಗರವನ್ನು ಕಾಡುತ್ತಿರುವ ಪ್ರವಾಹ ಸಮಸ್ಯೆ ನಿವಾರಿಸಿಕೊಳ್ಳಲು ಹಣಕಾಸಿನ ಕೊರತೆ ಕಾಡುತ್ತಿತ್ತು. ಸರ್ಕಾರ ಹಾಗೂ ಪಾಲಿಕೆ ಕೋಟ್ಯಂತರ ರೂಪಾಯಿ ವ್ಯಯಿಸಿದರೂ ಪರಿಹಾರ ಕಂಡುಕೊಳ್ಳಲು ಸಾಧ್ಯವಾಗಿರಲಿಲ್ಲ. ಮಳೆಗಾಲ ಬಂದಾಗಲಷ್ಟೇ ಪರಿಹಾರಕ್ಕೆ ಮುಂದಾಗುವ ತಾತ್ಕಾಲಿಕ ಕ್ರಮಗಳಿಂದ ನಗರದ ಜನರಿಗೆ ಪ್ರವಾಹ ಭೀತಿ ಕಾಡುತ್ತಿದೆ. ಇದನ್ನು ಒಂದೇ ಬಾರಿ ನಿವಾರಿಸಿ ನಗರವನ್ನು ಪ್ರವಾಹಮುಕ್ತಗೊಳಿಸಲು ವಿಶ್ವಬ್ಯಾಂಕ್ ನೆರವು ಪಡೆಯಲಾಗಿದೆ. ಮೂರು ವರ್ಷಗಳ ಸತತ ಪ್ರಯತ್ನದ ಲವಾಗಿ 2 ಸಾವಿರ ಕೋಟಿ ರೂ. ನೆರವು ಲಭಿಸಿದ್ದು, ಈ ಅನುದಾನದಡಿ ಒಮ್ಮೆಲೇ ಎಲ್ಲೆಡೆ ಉಂಟಾಗುತ್ತಿರುವ ಪ್ರವಾಹ ತಡೆಗೆ ಸ್ಪಷ್ಟ ಪರಿಹಾರ ಚೌಕಟ್ಟು ರೂಪಿಸಿ ಯೋಜನೆ ಸಿದ್ಧಪಡಿಸಲಾಗಿದೆ.

ನಗರದಲ್ಲಿರುವ ಮಳೆನೀರುಗಾಲುವೆಗಳು 4 ಕಣಿವೆ (ಹೆಬ್ಬಾಳ, ವೃಷಭಾವತಿ, ಚಲ್ಲಘಟ್ಟ, ಕೋರಮಂಗಲ) ವ್ಯಾಪ್ತಿಯ 860 ಕಿ.ಮಿ. ಉದ್ದಕ್ಕೂ ವಿಸ್ತರಿಸಿದೆ. ಆಯಾ ಪ್ರದೇಶ ಆಧರಿಸಿ 40-100 ಅಡಿ ಅಗಲವಾಗಿ ಹರಿಯುವ ಈ ನೀರುಗಾಲುವೆಯೇ ಪ್ರವಾಹಕ್ಕೆ ಆಸ್ಪದ ನೀಡಿದೆ. ಹಲವೆಡೆ ಸರಿಯಾದ ತಡೆಗೋಡೆ ಇಲ್ಲದಿರುವುದು, ತಗ್ಗುಪ್ರದೇಶಗಳಲ್ಲಿ ನೀರುಗಾಲುವೆಗೆ ಮಳೆನೀರು ಸರಾಗವಾಗಿ ಹರಿಯದಿರುವುದು, ಹೂಳು ತುಂಬಿರುವುದು ಇತ್ಯಾದಿ ಕಾರಣದಿಂದ ಇವುಗಳು ಮೃತ್ಯುಕೂಪಗಳಾಗಿ ಮಾರ್ಪಟ್ಟಿವೆ. ಇದರಿಂದ ಕೆರೆ, ಕಾಲುವೆಗಳ ಬದಿಯಿರುವ ಮನೆಗಳಿಗೆ ನೀರು ನುಗ್ಗಿ ಅಪಾರ ಪ್ರಮಾಣದ ಆಸ್ತಿ-ಪಾಸ್ತಿ ನೀರುಪಾಲು ಆಗುವುದು ಮುಂದುವರಿದಿದೆ. ಈ ಸಮಸ್ಯೆ ನಿವಾರಿಸಲು ಮಳೆನೀರುಗಾಲುವೆಗಳಿಗೆ ಆರ್‌ಸಿಸಿ ರಿಟೈನಿಂಗ್ ವಾಲ್‌ಗಳು ಸೇರಿ ನೀರಿನ ಧಾರಣ ರಚನೆ, ಪ್ರಕೃತಿ ಆಧಾರಿತ ಪರಿಹಾರ ರಚನೆ, ಕಲ್ವರ್ಟ್ ಮತ್ತು ಸೇತುವೆಗಳ ಪ್ರವಾಹ ರಕ್ಷಣಾ ರಚನೆಗಳ ನಿರ್ಮಾಣ ಕಾಮಗಾರಿ ಕೈಗೊಳ್ಳಲಾಗುತ್ತದೆ. ಈ ಯೋಜನೆ ಪೂರ್ಣಗೊಂಡಲ್ಲಿ ನಗರವು ಪ್ರವಾಹಮುಕ್ತ ಆಗಲಿದೆ ಎಂದು ಜಿಬಿಎ ಅಧಿಕಾರಿಗಳು ಪ್ರತಿಪಾದಿಸಿದ್ದಾರೆ.

ಪ್ರಸ್ತುತ ಕೈಗೆತ್ತಿಕೊಳ್ಳಲಿರುವ ಯೋಜನೆ ಅಡಿ ಕಾಮಗಾರಿ ನಡೆಯುವ ಸ್ಥಳಗಳು ಜಿಬಿಎ ಗಡಿಯಲ್ಲೇ ಇವೆ. ನಗರದ ಹೊರವಲಯದ ವಿಧಾನಸಭಾ ಕ್ಷೇತ್ರಗಳಲ್ಲಿ ಹರಡಿಕೊಂಡಿರುವ ಈ ನೀರುಗಾಲುವೆಗಳನ್ನು ಮೇಲ್ದರ್ಜೆಗೇರಿಸಲು ಒಟ್ಟು 16 ಪ್ಯಾಕೇಜ್‌ಗಳಾಗಿ ವಿಂಗಡಿಸಲಾಗಿದೆ. ಇವುಗಳಿಗೆ ಆಹ್ವಾನಿಸಿದ್ದ ಟೆಂಡರ್ ಪೈಕಿ 11ಅನ್ನು ಅನುಮೋದನೆ ಕೋರಿ ಸರ್ಕಾರಕ್ಕೆ ಕಡತ ರವಾನಿಸಲಾಗಿದೆ. ದೊಡ್ಡ ಮೊತ್ತದ ಹಣಕಾಸು ವ್ಯವಹಾರ ಇರುವುದರಿಂದ ಸರ್ಕಾರದ ಒಪ್ಪಿಗೆ ಅತ್ಯಗತ್ಯವಾಗಿದೆ. ಉಳಿದ 5ರ ಪೈಕಿ ನಾಲ್ಕಕ್ಕೆ ಮರುಟೆಂಡರ್ ಆಹ್ವಾನಿಸುತ್ತಿದ್ದು, ಮತ್ತೊಂದಕ್ಕೆ ಹೊಸದಾಗಿ ಟೆಂಡರ್ ಆಹ್ವಾನಿಸಿ ಅಂತಿಮಗೊಳಿಸಲಾಗುತ್ತದೆ ಎಂದು ಜಿಬಿಎ ಮಳೆನೀರುಗಾಲುವೆ ವಿಭಾಗದ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

ಒಟ್ಟು ಉದ್ದ - 860 ಕಿ.ಮೀ.

ಕೆಲಸ ಪೂರ್ಣ - 491 ಕಿ.ಮೀ.

ಕೆಲಸದ ಪ್ರಗತಿ - 125 ಕಿ.ಮೀ.

ಬಾಕಿ ಉಳಿಕೆ - 173.9 ಕಿ.ಮೀ.

ಪ್ಯಾಕೇಜ್‌ಗಳಾಗಿ ವಿಂಗಡಿಸಿರುವ ಕಾಮಗಾರಿಗಳನನ್ನು 12/36 ತಿಂಗಳಿನಲ್ಲಿ ಪೂರ್ಣಗೊಳಿಸಲು ಗಡುವು ನೀಡಲಾಗುತ್ತದೆ. ಇವುಗಳ ಮೇಲೆ ನಿರಂತರ ಮೇಲ್ವಿಚಾರಣೆ ವಹಿಸಲು ಯೋಜನಾ ನಿರ್ವಹಣೆ, ಮೇಲ್ವಿಚಾರಣೆ ಹಾಗೂ ಗುಣಮಟ್ಟ ನಿಯಂತ್ರಣ (ಪಿಎಂಸಿ) ಕಾರ್ಯಕ್ಕೆ ಟೆಂಡರ್ ಆಹ್ವಾನಿಸಲಾಗಿದೆ. ಈ ಸೇವೆ ನೀಡಲಿರುವ ಗುತ್ತಿಗೆ ಕಂಪನಿಯಿಂದ ಸತತವಾಗಿ ನಿಗಾ ವಹಿಸಿ ಪ್ರಾಜೆಕ್ಟ್ ಪೂರ್ಣಗೊಳಿಸಲು ಜಿಬಿಎ ಮುಂದಾಗಿದೆ.

ಮಹಾನಗರದಲ್ಲಿ ಹಲವೆಡೆ ನೀರುಗಾಲುವೆಗಳು ಒತ್ತುವರಿಗೆ ಒಳಗಾಗಿವೆ. ಹಾಲಿ 2,602 ಪ್ರಕರಣಗಳನ್ನು ಗುರುತಿಸಿದ್ದು, 1,480ಅನ್ನು ತೆರವುಗೊಳಿಸಲಾಗಿದೆ. ಉಳಿದ 1,122 ಪ್ರಕರಣಗಳಲ್ಲಿ ಕಡಿಮೆ ಉದ್ದ/ವಿಸ್ತೀರ್ಣ ಇದು ಕಾಮಗಾರಿ ಕೈಗೆತ್ತಿಕೊಳ್ಳಲು ಸಮಸ್ಯೆಯಾಗದು. ಒತ್ತುವರಿಮುಕ್ತ ಇರುವ ನೀರುಗಾಲುವೆಗಳನ್ನೇ ಮೊದಲು ಮೇಲ್ದರ್ಜೆಗೇರಿಸಲಾಗುತ್ತದೆ. ಬಳಿಕ ಒತ್ತುವರಿ ಇದ್ದ ಕಡೆ ಸಮಸ್ಯೆ ನಿವಾರಿಸಿ ಮುಂದಡಿ ಇಡಲು ಜಿಬಿಎ ಯೋಜನೆ ರೂಪಿಸುತ್ತಿದೆ.

"