ಬೆಂಗಳೂರು: ಯುವ ಮನಸ್ಸುಗಳನ್ನು ಗೆಲ್ಲಲು ಮತ್ತು ಪ್ರಸ್ತುತ ಇರುವ ಗೊಂದಲಗಳ ನಿವಾರಣೆ ಮಾಡುವ ಸಲುವಾಗಿ ರಾಜ್ಯ ಬಿಜೆಪಿ ಯುವ ಮೋರ್ಚಾ ಘಟಕ(ಬಿಜೆವೈಎಂ) ಜೆನ್‌ಜೀಗಳೊಂದಿಗೆ ಸಂವಾದಕ್ಕೆ ವೇದಿಕೆ ಸಜ್ಜು ಮಾಡಿದೆ. ‘ವಿಕಸಿತ ಭಾರತ-ಯುವ ಭಾರತ’ ಎಂಬ ಧ್ಯೇಯದೊಂದಿಗೆ ಕಾಕ್ರೋಚ್ ಜನತಾ ಪಾರ್ಟಿಯ (ಸಿಜೆಪಿ) ನೆರೆಟಿವ್ ಸರಿಗಟ್ಟಲು ಮುಂದಾಗಿದೆ.
ಮೊದಲು ಮಹಾನಗರಗಳಾದ ಬೆಂಗಳೂರು ನಗರ, ದಾವಣಗೆರೆ ಮತ್ತು ಬೆಳಗಾವಿಯಲ್ಲಿ ಕಾಲೇಜು ವಿದ್ಯಾರ್ಥಿಗಳು ಮತ್ತು ವೃತ್ತಿಪರ ಯುವ ಉದ್ಯೋಗಿಗಳೊಂದಿಗೆ ವಿಕಸಿತ ಭಾರತ, ಯುವ ಭಾರತ ಸಂವಾದ ಆಯೋಜಿಸುತ್ತಿದ್ದು, ದೀಪಾವಳಿಗೂ ಮೊದಲೇ ನಡೆಯಲಿವೆ. ಇದಾದ ಮೇಲೆ ಪ್ರತಿಯೊಂದು ಜಿಲ್ಲೆಯಲ್ಲ್ಲೂ ತಲಾ ಮೂರು ಕಾಲೇಜುಗಳಲ್ಲಿ ಜೆನ್‌ಜೀಗಳೊಂದಿಗೆ ಸಂವಾದ ಆಯೋಜನೆಗೆ ನಿರ್ಧಾರ ಮಾಡಲಾಗಿದೆ. ಇದು ವೇದಿಕೆ ಕಾರ್ಯಕ್ರಮ ಆಗಿರುವುದಿಲ್ಲ. ಕೇವಲ ಸಂವಾದ ಆಗಿದ್ದು, ಬಿಜೆಪಿ ಮತ್ತು ಯುವ ಮೋರ್ಚಾ ವೇದಿಕೆ ಹಿಂದೆ ಕೆಲಸ ಮಾಡಲಿದೆ. ಇದಲ್ಲದೆ, ವೈದ್ಯರು, ಲೆಕ್ಕಪರಿಶೋಧಕರು, ಇಂಜಿನಿಯರ್‌ಗಳು, ವಕೀಲರು ಸೇರಿ ವೃತ್ತಿಪರ ಯುವ ಉದ್ಯೋಗಿಗಳೊಂದಿಗೂ ಸಂವಾದ ನಡೆಯಲಿದೆ. ಈ ಮೂಲಕ 100 ಕಾಲೇಜುಗಳಲ್ಲಿ ಕಾರ್ಯಕ್ರಮ ಆಯೋಜಿಸುವ ಗುರಿಯನ್ನು ಮೋರ್ಚಾ ಹೊಂದಿದೆ.
