ದಾಖಲೆ ಬರೆದ ಬೆಂಗಳೂರು ಟ್ರಾಫಿಕ್​: ಪ್ರಪಂಚದಲ್ಲೇ ಬೆಂಗಳೂರು ನಂಬರ್​ 1

ಬೆಂಗಳೂರು: ಅನೇಕ ವಿಚಾರಗಳಲ್ಲಿ ದಾಖಲೆಗಳನ್ನು ಬರೆಯುತ್ತಾ ಬಂದಿರುವ ಬೆಂಗಳೂರು ಇದೀಗ ಮತ್ತೊಂದು ವಿಚಾರದಲ್ಲಿ ದಾಖಲೆ ಬರೆದಿದೆ.

ಬೆಂಗಳೂರಿನ ಬಹು ದೊಡ್ಡ ಸಮಸ್ಯೆಯೆನಿಸಿಕೊಂಡಿರುವ ಟ್ರಾಫಿಕ್​ ದಾಖಲೆಯನ್ನು ಬರೆದಿದೆ. ಈ ಮೂಲಕ 2019ರಲ್ಲಿ ಪ್ರಪಂಚದಲ್ಲೇ ಅತೀ ಹೆಚ್ಚು ಟ್ರಾಫಿಕ್​ ಸಮಸ್ಯೆಯನ್ನು ಬೆಂಗಳೂರು ಅನುಭವಿಸಿದೆ ಎನ್ನುವ ಮಾಹಿತಿ ಹೊರಬಿದ್ದಿದೆ.

ಟಾಮ್​ ಟಾಮ್​ ಸಂಸ್ಥೆಯು 2019ರಲ್ಲಿ ಪ್ರಪಂಚದ ಒಟ್ಟು 57 ಪ್ರಮುಖ ದೇಶಗಳ 416 ನಗರಗಳಲ್ಲಿ ಸಮೀಕ್ಷೆಯನ್ನು ನಡೆಸಿದ್ದು, ಯಾವ ಯಾವ ನಗರಗಳಲ್ಲಿ ಹೆಚ್ಚಿನ ಟ್ರಾಫಿಕ್​ ಸಮಸ್ಯೆ ಉಂಟಾಗಿದೆ ಎನ್ನುವುದನ್ನು ವರದಿ ಮಾಡಿದೆ. ಈ ವರದಿಯಲ್ಲಿ ಬೆಂಗಳೂರಿಗೆ ಮೊದಲ ಸ್ಥಾನ ದೊರಕಿದ್ದರೆ ಮುಂಬೈಗೆ ನಾಲ್ಕನೇ ಸ್ಥಾನ, ಪುಣೆಗೆ ಐದನೇ ಸ್ಥಾನ ಮತ್ತು ದೆಹಲಿಗೆ 8ನೇ ಸ್ಥಾನ ಲಭಿಸಿದೆ. ಟಾಪ್​ 10 ಸ್ಥಾನಗಳಲ್ಲಿ ನಾಲ್ಕು ಸ್ಥಾನಗಳು ಭಾರತದ ನಗರಗಳ ಪಾಲಾಗಿದ್ದು, ಭಾರತದಲ್ಲಿರುವ ಟ್ರಾಫಿಕ್​ ಸಮಸ್ಯೆಯನ್ನು ಎತ್ತಿ ಹಿಡಿದಂತಾಗಿದೆ.

ಬೆಂಗಳೂರಿನಲ್ಲಿ ವಾಸಿಸುತ್ತಿರುವ ಪ್ರತಿ ಮನುಷ್ಯ 2019ರಲ್ಲಿ 243 ಕ್ಕೂ ಹೆಚ್ಚು ಗಂಟೆಗಳ ಕಾಲ ಟ್ರಾಫಿಕ್​ನಲ್ಲಿ ಕಳೆದಿದ್ದಾನೆ. ಎಂದರೆ ಸರಿಸುಮಾರು 10 ದಿನ, 3 ಗಂಟೆ ಟ್ರಾಫಿಕ್​ನಲ್ಲೇ ಇದ್ದಂತೆ. ನಾಲ್ಕನೇ ಸ್ಥಾನದಲ್ಲಿರುವ ಮುಂಬೈನಲ್ಲಿ ಕಳೆದ ವರ್ಷ ಪ್ರತಿಯೊಬ್ಬರು ಸರಿ ಸುಮಾರು 209 ಗಂಟೆಗಳ ಕಾಲ (8 ದಿನ, 17 ಗಂಟೆ) ಟ್ರಾಫಿಕ್​ನಲ್ಲಿ ಕಳೆದಿದ್ದಾರೆ. ಪುಣೆಯಲ್ಲಿ 193 ಗಂಟೆಗಳು ವರದಿಯಾಗಿದ್ದರೆ, ದೆಹಲಿ ನಗರ ವಾಸಿಗರು 190 ಗಂಟೆ ಟ್ರಾಫಿಕ್​ನಲ್ಲಿದ್ದಿರುವುದಾಗಿ ವರದಿಯಾಗಿದೆ. 2018ಕ್ಕೆ ಹೋಲಿಸಿದರೆ ದೆಹಲಿಯಲ್ಲಿ 2019ರಲ್ಲಿ ಟ್ರಾಫಿಕ್​ನ ಸಮಸ್ಯೆ ಶೇ.2 ಕಡಿಮೆಯಾಗಿದೆ ಎಂದು ಹೇಳಲಾಗಿದೆ.

2018ಕ್ಕೆ ಹೋಲಿಕೆ ಮಾಡಿದರೆ 2019ರಲ್ಲಿ ಬಹುತೇಕ ನಗರಗಳಲ್ಲಿ ಟ್ರಾಫಿಕ್​ ಸಮಸ್ಯೆ ಹೆಚ್ಚಾಗಿದೆ ಎನ್ನುವುದು ವರದಿಯಿಂದ ತಿಳಿದುಬಂದಿದೆ. ಕೇವಲ 63 ನಗರಗಳಲ್ಲಿ ಮಾತ್ರ ಸಮಸ್ಯೆ ಸ್ವಲ್ಪ ಮಟ್ಟಿಗೆ ಸುಧಾರಣೆಗೊಂಡಿದೆ