ಘಟನೆಯ ಬಳಿಕ ಮಂಗಳವಾರ ಇಲ್ಲಿಗೆ ಬೆಳ್ತಂಗಡಿ ತಾಲೂಕು ಶಿಕ್ಷಣ ಇಲಾಖೆಯಿಂದ ಇಸಿಒಗಳಾದ ಸಿದ್ದಲಿಂಗ ಸ್ವಾಮಿ ಹಾಗೂ ಚೇತನಾಕ್ಷಿ, ಹಾಗೂ ಕ್ಲಸ್ಟರ್ ಸಿಆರ್ಪಿ ಆರತಿ ಭೇಟಿ ನೀಡಿ ಕುಸಿತಗೊಂಡಿದ್ದ ಶಾಲಾ ಮೇಲ್ಚಾವಣಿ ಪರಿಶೀಲಿಸಿದ್ದಾರೆ. ಇದೇ ವೇಳೆ ಶಾಲೆಯ ಕೊಠಡಿಯ ಅಲ್ಲಲ್ಲಿ ಮಳೆ ನೀರು ಸೋರಿಕೆಯಾಗುತ್ತಿರುವ ಬಗ್ಗೆ ಅವರ ಗಮನಕ್ಕೆ ತರಲಾಗಿದ್ದು ಆ ಕೊಠಡಿಗಳನ್ನೂ ವೀಕ್ಷಿಸಿದ್ದಾರೆ. ಶಾಲೆಯಿಂದ ಬಂದಿರುವ ಕೊಠಡಿ ದುರಸ್ಥಿಯ ಅರ್ಜಿಗಳನ್ನು ಪರಿಶೀಲಿಸಿದ್ದು ಅದನ್ನು ಮುಂದಿನ ಕ್ರಮಕ್ಕಾಗಿ ಮೇಲಧಿಕಾರಿಗಳಿಗೆ ರವಾನಿಸಿರುವುದಾಗಿ ತಿಳಿಸಿದರು. ಛಾವಣಿ ಕುಸಿತದಿಂದ ತೊಂದರೆ ಉಂಟಾಗಿದ್ದು, ತರಗತಿ ಕೊಠಡಿಗಳು ಸಾಕಾಗದ ಕಾರಣ ಒಂದೊಂದು ಕೊಠಡಿಯಲ್ಲಿ ಎರಡೆರಡು ತರಗತಿಯ ವಿದ್ಯಾರ್ಥಿಗಳನ್ನು ಕುಳ್ಳಿರಿಸಿ ಪಾಠ ಪ್ರವಚನ ಮಾಡುತ್ತಿರುವುದರ ಬಗ್ಗೆ ಶಿಕ್ಷಕರು ಇಲಾಖಾ ಅಧಿಕಾರಿಗಳ ಗಮನಕ್ಕೆ ತಂದರು. ಮಕ್ಕಳು ಕುಳಿತುಕೊಳ್ಳಲು ಬೇಕಾದ ಪರ್ಯಾಯ ವ್ಯವಸ್ಥೆಯ ಬಗ್ಗೆಯೂ ಚರ್ಚಿಸಲಾಯಿತು. ಎಸ್ಡಿಎಂಸಿ ಅಧ್ಯಕ್ಷರು, ಸದಸ್ಯರು, ಹಳೇ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.
