ಯೋಗ್ಯವಲ್ಲದ ವರದಿ : ಫುಟ್ಬಾಲ್ ಮೈದಾನ ನಿರ್ಮಾಣವಾಗಿ ಹತ್ತು ವರ್ಷಕ್ಕಿಂತ ಅಧಿಕ ಕಳೆದಿದೆ. ಮೈದಾನಕ್ಕೆ ಅಳವಡಿಸಿರುವ ಸಿಂಥೇಟಿಕ್ ಟರ್ಫ್ ಐದರಿಂದ ಆರು ವರ್ಷದ ಮಿತಿಯಿದೆ. ಆದ್ದರಿಂದ, ಮೈದಾನ ನಿರ್ಮಾಣವಾದ ವೇಳೆ ಹಾಕಿರುವ ಸಿಂಥೇಟಿಕ್ ಟರ್ಫ್ ಸಂಪೂರ್ಣವಾಗಿ ಹಾಳಾಗಿದ್ದು ಈವರೆಗೆ ಬದಲಾವಣೆಗೊಳಿಸಿಲ್ಲ. ಸದ್ಯ, ಸಿಂಥೇಟಿಕ್ ಟರ್ಫ್ ಕಠಿಣವಾಗಿದ್ದು ಆಟಗಾರರಿಗೆ ಗಾಯಗಳು ಆಗುವ ಭೀತಿಯಿದೆ. ಆದ್ದರಿಂದ ರಾಜ್ಯ ಫುಟ್ಬಾಲ್ ಮಂಡಳಿಯೂ ಮೈದಾನವು ಪಂದ್ಯಕ್ಕೆ ಯೋಗ್ಯವಲ್ಲ ಎಂಬ ವರದಿ ನೀಡಿದೆ ಎಂದು ಇಲಾಖೆಯ ಅಧಿಕಾರಿಯೊಬ್ಬರು ತಿಳಿಸಿದರು. ಹೊನಲು ಬೆಳಕಿನ ಪಂದ್ಯಗಳಿಗಾಗಿ ಅಳವಡಿಸಿದ್ದ ಬೃಹತ್ ಫ್ಲಡ್ ಲೈಟ್ಗಳು ಹಲವು ತಿಂಗಳಿಂದ ಕಾರ್ಯ ನಿರ್ವಹಿಸದೆ ಇರುವುದರಿಂದ ದುಸ್ಥಿತಿಗೆ ತಲುಪಿವೆ. ಪ್ರೇಕ್ಷಕರ ಆಸನಕ್ಕಾಗಿ ಒಂದು ಕಡೆ ಗ್ಯಾಲರಿಯೂ ನಿರ್ಮಿಸಲಾಗಿದ್ದು ವಿಪರೀತ ಬಿಸಿಲು, ಗಾಳಿ ಹಾಗೂ ಮಳೆಗೆ ಕುರ್ಚಿಗಳು ಮುರಿದಿವೆ. ಒಟ್ಟಾರೆ, ರಾಜ್ಯದಲ್ಲಿಯೇ ಎರಡನೇಯ ರಾಷ್ಟ್ರೀಯ ಫುಟ್ಬಾಲ್ ಮೈದಾನವೂ ಅಧಿಕಾರಿಗಳ ಹಾಗೂ ಜನಪ್ರತಿನಿಧಿಗಳ ಇಚ್ಚಾಶಕ್ತಿ ಕೊರತೆಯಿಂದ ಹಾಳಾಗಿವೆ. ರಾಜ್ಯಮಟ್ಟದಲ್ಲಿ ಪಂದ್ಯಗಳು ಆಯೋಜಿಸಿ ಪ್ರೇಕ್ಷಕರ ಸೆಳೆಯಬೇಕಿದ್ದ ಮೈದಾನದಲ್ಲಿ ಕಳೆದ ಫಿಫಾ ಫುಟ್ಬಾಲ್ ಹಾಗೂ ವಿಶ್ವಕಪ್ ಕ್ರಿಕೆಟ್ ಫೈನಲ್ ಪಂದ್ಯಗಳನ್ನು ಸಾರ್ವಜನಿಕರ ವೀಕ್ಷಣೆಗೆ ಎಲ್ಸಿಡಿ ಸ್ಕ್ರೀನ್ ಅಳವಡಿಸಿದ್ದು ಇವರ ಸಾಧನೆ ಎನ್ನಬಹುದು. ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬಂದ ಬಳಿಕ ಗ್ರಾಮೀಣ ಕ್ಷೇತ್ರದ ಶಾಸಕ ಬಿ.ನಾಗೇಂದ್ರ ಅವರು ಯುವಜನ ಸಬಲೀಕರಣ ಹಾಗೂ ಕ್ರೀಡಾ ಇಲಾಖೆಯ ಸಚಿವರಾಗಿದ್ದ ವೇಳೆ ಮೈದಾನದ ಕಾಳಜಿ ವಹಿಸಿಲ್ಲ ಎಂಬುದು ಜಿಲ್ಲೆಯ ಕ್ರೀಡಾ ಅಭಿಮಾನಿಗಳ ಅಭಿಪ್ರಾಯವಾಗಿದೆ.
