ಕುರುಗೋಡು ನಿವಾಸಿಯಾದ ಪಿ.ಗಾದಿಲಿಂಗಪ್ಪ ಅವರು ಜಿಲ್ಲೆಯ ನಾನಾ ಸರ್ಕಾರಿ ಶಾಲೆಗಳಲ್ಲಿ ಶಿಕ್ಷಕರಾಗಿ ಸೇವೆ ಸಲ್ಲಿಸಿ, ಮುಖ್ಯಗುರುಗಳಾಗಿ ಬಡ್ತಿ ಪಡೆದು 2022ರಲ್ಲಿ ಸೇವೆಯಿಂದ ನಿವೃತ್ತಿ ಹೊಂದಿದರು. ಆದರೆ, ಮಾಜಿ ರಾಷ್ಟ್ರಪತಿ ಡಾ.ಎ.ಪಿ.ಜೆ.ಅಬ್ದುಲ್ ಕಲಾಂ ಅವರ ಆದರ್ಶಗಳನ್ನು ಮೈಗೂಡಿಸಿಕೊಂಡಿರುವ ಇವರು ಉಸಿರು ಇರುವವರೆಗೆ ಮಕ್ಕಳಿಗೆ ಬೋಧಿಸುವ ಆಸಕ್ತಿ ಹೊಂದಿದ್ದಾರೆ. ಆದ್ದರಿಂದ, 2023-24ನೇ ಸಾಲಿನಲ್ಲಿ ರಾಜ್ಯದ 31 ಜಿಲ್ಲೆಗಳಲ್ಲಿ ‘ ಪ್ರೇರಣಾ ಚೈತ್ರಾ ’ ಯಾತ್ರೆ ಮೂಲಕ ಎಸ್ಎಸ್ಎಲ್ಸಿ ಮಕ್ಕಳಿಗೆ ಮುಖ್ಯ ಪರೀಕ್ಷೆಯ ತರಬೇತಿ ನೀಡಿದರು. 2024 -25ನೇ ಸಾಲಿನಲ್ಲಿ ಕಲ್ಯಾಣ ಕರ್ನಾಟಕದ ಕಲಿಕೆಯಲ್ಲಿ ಹಿಂದುಳಿದ ಮಕ್ಕಳಿಗಾಗಿ ‘ ಕಂದೀಲು ’ ಎಂಬ ಯಾತ್ರೆಯಡಿ ಬೋಧನೆ ಮಾಡಿದರು. ಪ್ರಸ್ತಕ ಸಾಲಿನಲ್ಲಿ ಬೆಳಗಾವಿ ಯಿಂದ ಬನವಾಸಿವರೆಗೆ ‘ಕಿತ್ತೂರು ಕರ್ನಾಟಕ ಕಿರಣ’ ಎಂಬ ಯಾತ್ರೆಯ ಮೂಲಕ ಮಕ್ಕಳಿಗೆ ಕಲಿಸುತ್ತಿದ್ದಾರೆ.
