ಬೆಳಗಾವಿ ತಂಡಗಳಿಗೆ ಗೆಲುವು

ಹುಬ್ಬಳ್ಳಿ: ಆರಂಭಿಕ ಸಾಯಿರಾಜ್ ಸಾಳುಂಕೆ ಭರ್ಜರಿ ಅರ್ಧ ಶತಕ (52ರನ್, 29ಎಸೆತ, 10ಬೌಂ., 1ಸಿ.)ದ ನೆರವಿನಿಂದ ಬೆಳಗಾವಿಯ ಯೂನಿಯನ್ ಜಿಮ್ಾನಾ, ಶ್ರೀದುರ್ಗಾ ಕಪ್-16 ವಯೋಮಿತಿಯ ಕ್ರಿಕೆಟ್ ಟೂರ್ನಾಮೆಂಟ್​ನಲ್ಲಿ ಸೋಮವಾರ ದುರ್ಗಾ ವುಮೆನ್ಸ್ ಕಂಬೈನ್ಡ್ ಇಲೆವನ್ ವಿರುದ್ಧ 10 ವಿಕೆಟ್​ಗಳಿಂದ ಸುಲಭ ಗೆಲುವು ಸಾಧಿಸಿತು.

ದೇಶಪಾಂಡೆನಗರದ ಕೆಜಿಎ ಮೈದಾನದಲ್ಲಿ ಈ ಪಂದ್ಯವು ಬಾಲಕರ ವಿರುದ್ದ ಬಾಲಕಿಯರ ಸೆಣಸಾಟವಾಗಿತ್ತು. ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ದುರ್ಗಾ ವುಮೆನ್ಸ್ ಕಂಬೈನ್ಡ್ 25 ಓವರ್​ಗಳಲ್ಲಿ 8 ವಿಕೆಟ್​ಗೆ 87ರನ್ ಗಳಿಸಿತ್ತು. ಲಕ್ಷ್ಮೀ ಬಾಗೇವಾಡಿ 27 ರನ್ ಬಾರಿಸಿದರು. ಯೂನಿಯನ್ ಜಿಮ್ಾನಾ 7.1 ಓವರ್​ಗಳಲ್ಲಿ ವಿಕೆಟ್ ನಷ್ಟವಿಲ್ಲದೇ 88 ರನ್ ಬಾರಿಸಿ ಗೆಲುವಿನ ನಗೆ ಬೀರಿತು.

ಆನಂದ ಕ್ರಿಕೆಟ್ ಅಕಾಡೆಮಿಗೆ ಜಯ

ಇನ್ನೊಂದು ಪಂದ್ಯದಲ್ಲಿ ಹುಬ್ಬಳ್ಳಿ ಸ್ಪೋರ್ಟ್ಸ್ ಕ್ಲಬ್​ನ ವಿರುದ್ಧ ಬೆಳಗಾವಿಯ ಆನಂದ ಕ್ರಿಕೆಟ್ ಅಕಾಡಮಿ 3 ವಿಕೆಟ್​ಗಳಿಂದ ಜಯ ದಾಖಲಿಸಿತು.

ಹುಬ್ಬಳ್ಳಿ ಸ್ಪೋರ್ಟ್ಸ್ ಕ್ಲಬ್ 83 ರನ್​ಗೆ ಆಲೌಟ್ ಆಯಿತು. ಮನೀಷ್ ನಸನೂರ 31 ರನ್ ಬಾರಿಸಿದರು. ಆನಂದ ಕ್ರಿಕೆಟ್ ಅಕಾಡಮಿ ಪರ ಸುಮಿತ ಕೆ. 3, ಲಾಭ ವೆರ್ಣೆಕರ್ ಹಾಗೂ ಸ್ವರಾಜ್ ತಲಾ 2 ವಿಕೆಟ್​ಗಳನ್ನು ಪಡೆದರು. ಓಂ ಜಕಾತಿ 30 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 2 ಸಿಕ್ಸರ್ ಮೂಲಕ 40 ರನ್ ಬಾರಿಸಿ ಆನಂದ ಕ್ರಿಕೆಟ್ ಅಕಾಡೆಮಿಗೆ ಗೆಲುವು ತಂದಿತ್ತರು. ಹುಬ್ಬಳ್ಳಿ ಸ್ಪೋರ್ಟ್ಸ್ ಕ್ಲಬ್ ಪರವಾಗಿ ಹರ್ಷಿತ ಶಿವಪುರ ಹಾಗೂ ಸುಹಾಸ ಮಮದಾಪೂರ ತಲಾ 3ವಿಕೆಟ್​ಗಳನ್ನು ಪಡೆಯುವಲ್ಲಿ ಯಶಸ್ವಿಯಾದರು.

ಅ. 17ರಂದು ಬೆಳಗ್ಗೆ 8.30ಕ್ಕೆ ತೇಜಲ್ ಶಿರಗುಪ್ಪಿ ಕ್ರಿಕೆಟ್ ಅಕಾಡೆಮಿ-ಬೆಳಗಾವಿ ಸ್ಪೋರ್ಟ್ಸ್ ಕ್ಲಬ್ ಹಾಗೂ ಮಧ್ಯಾಹ್ನ 1ಗಂಟೆಗೆ ದುರ್ಗಾ ವುಮೆನ್ಸ್ ಕಂಬೈನ್ಡ್- ಲಕ್ಷ ಕ್ರಿಕೆಟ್ ಅಕಾಡೆಮಿ ಚಿಕ್ಕೋಡಿ ಸೆಣಸಲಿವೆ.