ಶಂಕರ ಸ್ವಾಮೀಜಿ ಬದುಕು ದಾರಿದೀಪ

ಅಥಣಿ: ‘ಪ್ರವಚನ ಕೇಸರಿ’ ಬಿರುದು ಪಡೆದು ನಾಡಿನುದ್ದಗಲಕ್ಕೂ ಸಂಚರಿಸಿ ಬಸವತತ್ತ್ವ ಸಾರಿದ ಕೀರ್ತಿ ಶೆಟ್ಟರಮಠದ ಲಿಂ.ಶಂಕರ ಸ್ವಾಮೀಜಿಗೆ ಸಲ್ಲುತ್ತದೆ ಎಂದು ಶೆಟ್ಟರಮಠದ ಮಠಾಧೀಶ ಮರುಳಸಿದ್ಧ ಸ್ವಾಮೀಜಿ ಹೇಳಿದರು.

ಶ್ರೀಮಠದಲ್ಲಿ ಮಂಗಳವಾರ ಆಯೋಜಿಸಿದ್ದ ಲಿಂ.ಶಂಕರ ಸ್ವಾಮೀಜಿ 9ನೇ ಪುಣ್ಯಸ್ಮರಣೋತ್ಸವ ಅಂಗವಾಗಿ ಶ್ರೀಗಳ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿ ಕರ್ತೃ ಗದ್ದುಗೆಗೆ ವಚನಾಭಿಷೇಕ ಮಾಡಿ ಮಾತನಾಡಿದರು.

ಕರ್ನಾಟಕ, ಆಂಧ್ರಪ್ರದೇಶ, ತಮಿಳುನಾಡು, ಮಹಾರಾಷ್ಟ್ರ ರಾಜ್ಯಗಳಿಗೆ ಸಂಚರಿಸಿ 30 ವರ್ಷಗಳಿಂದ ಬಸವ ಪುರಾಣ ಹಾಗೂ ಸಂದೇಶ ಸಾರಿದ ಅವರಿಗೆ ಮೈಸೂರು ರಾಜ್ಯವಾಗಿದ್ದ ಕಾಲದಲ್ಲಿ ‘ಪ್ರವಚನ ಕೇಸರಿ’ ಎಂದು ಬಿರುದು ಪಡೆದಿದ್ದರು. ಅಂತಹ ಪೂಜ್ಯರ ಆದರ್ಶಮಯ ಬದುಕು ನಮಗೆಲ್ಲ ದಾರಿದೀಪವಾಗಿದೆ. ಅವರು ಹಾಕಿಕೊಟ್ಟ ಸನ್ಮಾರ್ಗದಲ್ಲಿ ನಾವೆಲ್ಲರೂ ನಡೆಯಬೇಕು ಎಂದರು.

ಭಕ್ತರಾದ ಮುರುಗೆಪ್ಪ ತೊದಲಬಾಗಿ, ಸಂಗಪ್ಪ ಉಣ್ಣಿ ಮಾತನಾಡಿದರು. ದಾನಯ್ಯ ಅಂದಾನಿಮಠ, ಅಶೋಕ ಬಿಳ್ಳೂರ, ಮಹಾದೇವ ಹಳ್ಳದಮಳ, ಷಣ್ಮುಕಯ್ಯ ಹಿರೇಮಠ, ಜ್ಯೋತಿ ಲಸಮಠ, ನಿರ್ಮಲಾ ಧನ್ಯಾಳಮಠ, ಪಾರ್ವತಿ ಹಿರೇಮಠ, ಶಶಿಕಲಾ ಮಹಾಜನ, ದಾಕ್ಷಾಯಿಣಿ ಗುಡ್ಡೊಡಗಿ, ಅನಸೂಯಾ ಬಿಳ್ಳೂರ, ಲಲಿತಾ ಬಿಳ್ಳೂರ, ಸಾವಿತ್ರಿ ಅಂಗಡಿ, ಮಹಾದೇವಿ ಹಳ್ಳದಮಳ, ಚನ್ನಪ್ಪ ಹಡಪದ ಇತರರಿದ್ದರು.