ಶಹಾಪುರ, ವಡಗಾವಿಗೆ ನಾಲೆ ಬಾಧೆ!

ಶಹಾಪುರ ಹಾಗೂ ವಡಗಾವಿಯಲ್ಲಿ ನಾಲ್ಕು ಪ್ರಮುಖ ನಾಲೆ ಹರಿಯುತ್ತವೆ. ಇವುಗಳ ಮೂಲಕ ಹರಿಯುವ ತ್ಯಾಜ್ಯ ನೀರೆಲ್ಲ ಬಳ್ಳಾರಿ ನಾಲೆಗೆ ಸೇರುತ್ತದೆ. ಈ ನಾಲೆಗಳಿಗೆ ಹಲವಾರು ಉಪನಾಲೆಗಳಿವೆ. ಆದರೆ, ಕಾಲಕಾಲಕ್ಕೆ ಆಗಿರುವ ಅತಿಕ್ರಮಣದಿಂದ ದೊಡ್ಡ ನಾಲೆಗಳೇ ಚರಂಡಿ ಗಾತ್ರಕ್ಕೆ ಕುಗ್ಗಿವೆ. ಎಷ್ಟೋ ಕಡೆ ನಾಲೆ ಗೋಡೆಗಳ ಮೇಲೆ ಕಟ್ಟಡಗಳು ತಲೆ ಎತ್ತಿವೆ. ಅತಿಕ್ರಮಣದಿಂದ ಹೊರಗುಳಿದ ನಾಲೆಗಳಲ್ಲಿ ಹೂಳು ಹಾಗೂ ಪ್ಲಾಸ್ಟಿಕ್ ತ್ಯಾಜ್ಯ ತುಂಬಿದೆ. ಇದರಿಂದ ನೀರು ಸರಾಗವಾಗಿ ಹರಿದು ಹೋಗುತ್ತಿಲ್ಲ. ನಾಲೆಗಳನ್ನು ನಿಯಮಿತವಾಗಿ ಸ್ವಚ್ಛಗೊಳಿಸುವ ಕೆಲಸವಾಗುತ್ತಿಲ್ಲ. ಇದರಿಂದ ಮಳೆಗಾಲದಲ್ಲಿ ನಾಲೆಗಳ ಚರಂಡಿ ನೀರು ಮನೆಗಳಿಗೆ ನುಗ್ಗುತ್ತಿದೆ.

ಸ್ಮಾರ್ಟ್ ಸಿಟಿ ಯೋಜನೆಯಡಿ ಶಹಾಪುರ, ವಡಗಾವಿಯ ಕೆಲ ಪ್ರದೇಶಗಳು ಅಭಿವೃದ್ಧಿಗೊಂಡಿದ್ದರೂ ಇಲ್ಲಿನ ಹಳೇ ಬಡಾವಣೆಗಳಲ್ಲಿ ಸಮರ್ಪಕ ಯೋಜನೆಯ ಕೊರತೆ ಎದ್ದು ಕಾಣುತ್ತಿದೆ. ಮಲಪ್ರಭಾ ನಗರ, ಲಕ್ಷ್ಮೀ ನಗರ, ಬ್ರಹ್ಮ ನಗರ, ಅನ್ನಪೂರ್ಣೇಶ್ವರಿ ನಗರ ಮತ್ತು ಬಾಲಕೃಷ್ಣ ನಗರಗಳಲ್ಲಿ ಜನವಸತಿ ಒಂದೂವರೆ ದಶಕದಿಂದೀಚೆಗೆ ಹೆಚ್ಚು ಬೆಳೆದಿದೆ. ಇಲ್ಲಿ ಸರಿಯಾದ ನಗರ ಯೋಜನೆಯ ಅಡಿಪಾಯವಿಲ್ಲ. ಕಿರಿದಾದ ರಸ್ತೆಗಳಲ್ಲಿ ಬೇಕಾಬಿಟ್ಟಿ ಮನೆ ನಿರ್ಮಾಣಗೊಂಡಿವೆ. ಚರಂಡಿಗಳೇ ಇಲ್ಲದ ಹಲವು ಬೀದಿಗಳಿವೆ. ಭವಿಷ್ಯದಲ್ಲಿ ಒಳಚರಂಡಿ ಹಾಗೂ ಕುಡಿಯುವ ನೀರಿನ ಪೈಪ್ ಅಳವಡಿಸುವುದಕ್ಕೂ ಆಸ್ಪದ ಇಲ್ಲದಂತೆ ಜನವಸತಿ ವ್ಯಾಪಿಸಿದೆ. ಎಷ್ಟೋ ಕಡೆ ಗಟಾರು ನಿರ್ಮಾಣಕ್ಕೂ ಜಾಗವಿಲ್ಲದಷ್ಟು ಚಿಕ್ಕ ಓಣಿಗಳಿವೆ. ಸರಾಗವಾಗಿ ಮಳೆ ನೀರು ಬಳ್ಳಾರಿ ನಾಲೆಯತ್ತ ಹರಿದು ಹೋಗಲು ಇಳಿಜಾರೂ ಇಲ್ಲ. ನೀರು ನಿಂತಲ್ಲಿಯೇ ನಿಂತು ಸಮಸ್ಯೆ ಸೃಷ್ಟಿಸುತ್ತಿದೆ. ಆನಂದ ನಗರದಲ್ಲಿ ನಾಲೆ ನೀರು ಸರಾಗವಾಗಿ ಹರಿಯಲು ಹಲವು ಅಡೆತಡೆಗಳಿವೆ. ಇದರಿಂದ ಬಳ್ಳಾರಿ ನಾಲೆ ಸೇರಬೇಕಾದ ಚರಂಡಿ ನೀರು, ಮನೆಗಳಿಗೆ ಹಾಗೂ ಕೃಷಿ ಭೂಮಿಗೆ ನುಗ್ಗಿ ಅಧ್ವಾನ ಸೃಷ್ಟಿಸುತ್ತಿದೆ.

ವಡಗಾವಿಗೆ ಇಷ್ಟು ದಿನ 8 ದಿನಕ್ಕೊಮ್ಮೆ ಕುಡಿಯುವ ನೀರು ಪೂರೈಕೆಯಾಗುತ್ತಿತ್ತು. ಆದರೆ, ಎರಡು ವಾರಗಳಿಂದ ಅದು 10 ದಿನಗಳ ಅಂತರಕ್ಕೆ ವಿಸ್ತರಣೆಯಾಗಿದ್ದು, ಕನಿಷ್ಠ ಕುಡಿಯುವ ನೀರನ್ನಾದರೂ ಸರಿಯಾಗಿ ಪೂರೈಕೆ ಮಾಡಿ ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.