ಹಿಂಡಲಗಾ ಜೈಲಲ್ಲಿ ಮೊಬೈಲ್, ಮಾದಕವಸ್ತು ಎಸೆತ?

ಹಿನ್ನೆಲೆಯಲ್ಲಿ ಹಿರಿಯ ಪೊಲೀಸ್ ಅಧಿಕಾರಿಗಳು ಮತ್ತು ಕಾರಾಗೃಹ ಇಲಾಖೆ ಹಿರಿಯ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲಿಸಿದರು.

ಈಚೆಗೆ ಹಿಂಡಲಗಾ ಕಾರಾಗೃಹದಲ್ಲಿ ತಪಾಸಣೆ ವೇಳೆ ಮೊಬೈಲ್, ಸಿಮ್, ಯುಎಸ್‌ಬಿ ಚಾರ್ಜರ್ ಪತ್ತೆಯಾಗಿದ್ದವು. ಹೀಗಾಗಿ, ವಿಡಿಯೋ ವೈರಲ್ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿ, ಕಾರಾಗೃಹ ಇಲಾಖೆ ಉತ್ತರ ವಲಯ ಡಿಐಜಿ ಟಿ.ಪಿ.ಶೇಷ ಮತ್ತು ನಗರ ಪೊಲೀಸ್ ಆಯುಕ್ತ ಭೂಷಣ ಬೋರಸೆ ಕಾರಾಗೃಹಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು. ಪ್ರಾಥಮಿಕ ತನಿಖೆಯಲ್ಲಿ ಇದು ಹಳೇ ವಿಡಿಯೋ ಎಂಬುದು ಖಚಿತವಾಗಿದೆ.

ಕಾರಾಗೃಹ ಇಲಾಖೆ ಉತ್ತರ ವಲಯ ಡಿಐಜಿ ಟಿ.ಪಿ.ಶೇಷ ಈ ಕುರಿತು ಮಾತನಾಡಿ, ವೈರಲ್ ಆಗಿರುವ ಸಿಸಿಟಿವಿ ದೃಶ್ಯ ಒಂದು ತಿಂಗಳ ಹಿಂದಿನದ್ದಾಗಿದೆ. ಈಗಾಗಲೇ ಈ ಕುರಿತು ಪ್ರಕರಣ ದಾಖಲಿಸಿದ್ದು, ಗ್ರಾಮೀಣ ಠಾಣೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಸಿಸಿಟಿವಿ ೆಟೇಜ್ ನಮ್ಮವರೇ ಕೊಟ್ಟಿರುವುದು ಮೇಲ್ನೋಟಕ್ಕೆ ಕಂಡುಬಂದಿದೆ ಎಂದು ಮಾಹಿತಿ ನೀಡಿದರು.

ವೈರಲ್ ಮಾಡಿದ್ದಾರು?: ವಿಡಿಯೋ ವೈರಲ್ ಮಾಡಿದ್ದು ಯಾರು, ಕಾರಣ ಏನು ಎಂಬ ಪ್ರಶ್ನೆ ಈಗ ಉದ್ಭವಿಸಿದೆ. ಈಚೆಗೆ ಜೈಲಿನಲ್ಲಿ ನಡೆಯುತ್ತಿರುವ ಚಟುವಟಿಕೆಗಳ ಬಗ್ಗೆ ಗಂಭೀರ ತನಿಖೆಯಾಗದಿರುವುದೇ ವಿಡಿಯೋ ವೈರಲ್‌ಗೆ ಕಾರಣ ಎನ್ನಲಾಗಿದೆ. ಕಾರಾಗೃಹ ತಪಾಸಣೆ ವೇಳೆ, ಮೊಬೈಲ್ ಸಿಕ್ಕ ಬಗ್ಗೆ ದೂರು ದಾಖಲಾಗಿತ್ತು. ಆದರೆ, ಮೊಬೈಲ್ ಎಸೆದ ಪ್ರಕರಣ ಪ್ರಸ್ತಾಪವಾಗಿರಲಿಲ್ಲ. ಹೀಗಾಗಿ, ವ್ಯವಸ್ಥೆಯೊಳಗಿದ್ದವರೇ ವೈರಲ್ ಮಾಡಿದ್ದಾರೆಂದು ಶಂಕಿಸಲಾಗಿದೆ.

ಮೊಬೈಲ್ ಪತ್ತೆಯಾದ ವಿಡಿಯೋ ದಿನ ಸಿಸಿಟಿವಿ ಪರಿಶೀಲಿಸುವಾಗ ಕಂಡುಬಂದ ಈ ದೃಶ್ಯಗಳನ್ನು ತನಿಖೆ ದೃಷ್ಟಿಯಿಂದ ಗ್ರಾಮೀಣ ಠಾಣೆ ಪೊಲೀಸರಿಗೆ ನೀಡಲಾಗಿತ್ತು. ಈ ವೇಳೆ ಅಲ್ಲಿದ್ದ ಕೆಲವರು ಇದನ್ನು ತಮ್ಮ ಮೊಬೈಲ್‌ಗಳಲ್ಲೂ ಚಿತ್ರೀಕರಿಸಿಕೊಂಡಿದ್ದರು. ವಿಡಿಯೋ ಪೊಲೀಸರು ಮಾತ್ರವಲ್ಲದೇ ಕೈಗಾರಿಕಾ ಭದ್ರತಾ ಸಿಬ್ಬಂದಿ, ಕಾರಾಗೃಹ ಸಿಬ್ಬಂದಿ ಬಳಿಯೂ ಇತ್ತು. ಈ ಮೂವರಲ್ಲಿ ವೈರಲ್ ಮಾಡಿದ್ದು ಯಾರು ಎಂಬ ಪ್ರಶ್ನೆ ಈಗ ಉದ್ಭವಿಸಿದ್ದು, ತನಿಖೆ ಆರಂಭಗೊಂಡಿದೆ.

ಹಿಂಡಲಗಾ ಕೇಂದ್ರ ಕಾರಾಗೃಹದಲ್ಲಿ ಬುಧವಾರ ತಡರಾತ್ರಿ ನಡೆಸಲಾದ ತಪಾಸಣೆಯಲ್ಲಿ ವಿವಿಧ ಕಂಪನಿಗಳ ಐದು ಮೊಬೈಲ್, ನಾಲ್ಕು ಸಿಮ್ ಕಾರ್ಡ್, ಎರಡು ಯುಎಸ್‌ಬಿ ಕೇಬಲ್ ಪತ್ತೆಯಾಗಿವೆ. ಇದಕ್ಕೆ ಸಂಬಂಧಿಸಿದಂತೆ ಬೆಳಗಾವಿ ಗ್ರಾಮೀಣ ಠಾಣೆಯಲ್ಲಿ ದೂರು ದಾಖಲಿಸಲಾಗಿದೆ. ಈವರೆಗೆ ನಡೆಸಲಾದ ತಪಾಸಣೆಗಳಲ್ಲಿ ಡಿ.17ರಂದು 366 ಗ್ರಾಂ ಗಾಂಜಾ, ಡಿ.16ರಂದು 4 ಮೊಬೈಲ್, 1 ಯುಸ್‌ಬಿ ಕೇಬಲ್, ಡಿ.23ರಂದು 2 ಮೊಬೈಲ್, 1 ಚಾರ್ಜರ್, 3 ಯುಎಸ್‌ಬಿ ಕೇಬಲ್, ಡಿ.23ರಂದು 2 ಮೊಬೈಲ್, 1 ಚಾರ್ಜರ್ ಪತ್ತೆಯಾಗಿವೆ ಎಂದು ಕಾರಾಗೃಹದ ಮುಖ್ಯ ಅಧೀಕ್ಷಕ ವಿ.ಕೃಷ್ಣಮೂರ್ತಿ ತಿಳಿಸಿದ್ದಾರೆ.