ಅಕ್ರಮ ಜಾಹೀರಾತು ಅಬ್ಬರ!

ಬೆಳಗಾವಿ ಮಹಾನಗರ ಪಾಲಿಕೆ, ನಗರಸಭೆ, ಪುರಸಭೆ ಹಾಗೂ ಪಟ್ಟಣ ಪಂಚಾಯಿತಿ ಆಡಳಿತ ಮಂಡಳಿ ಆದಾಯ ಮೂಲಗಳಲ್ಲಿ ಜಾಹೀರಾತು ವಿಭಾಗ ಪ್ರಮುಖವಾಗಿದೆ. ಆದರೆ, ಪರವಾನಗಿ ಇಲ್ಲದೆ ಜಾಹೀರಾತು ಫಲಕಗಳು ಹಾಗೂ ಅಕ್ರಮ ಹೋರ್ಡಿಂಗ್‌ಗಳ ಅಳವಡಿಕೆ ಮತ್ತು ತೆರಿಗೆ ವಸೂಲಾತಿ ನಿರ್ಲಕ್ಷ್ಯಗಳಿಂದ ತೆರಿಗೆ ನಷ್ಟ ಉಂಟಾಗುತ್ತಿದೆ.

ಜಿಲ್ಲೆಯಲ್ಲಿರುವ ಒಟ್ಟು 38 ನಗರ ಸ್ಥಳೀಯ ಆಡಳಿತ ಮಂಡಳಿ ಸಂಸ್ಥೆಗಳ ವ್ಯಾಪ್ತಿಯಲ್ಲಿ ಜಾಹೀರಾತು ಪ್ರದರ್ಶಿಸಲು ಮಾರುಕಟ್ಟೆ ಪ್ರದೇಶ, ವೃತ್ತಗಳು, ಕೈಗಾರಿಕೆ ಪ್ರದೇಶ, ಮುಖ್ಯ ರಸ್ತೆ, ಉದ್ಯಾನಗಳು ಸೇರಿದಂತೆ 430ಕ್ಕೂ ಹೆಚ್ಚು ಜಾಗಗಳನ್ನು ಅಧಿಕೃತವಾಗಿ ಗುರುತಿಸಲಾಗಿದೆ. ಆದರೆ, ವಾಸ್ತವವಾಗಿ ಜಿಲ್ಲೆಯಲ್ಲಿನ ಒಂದೊಂದು ನಗರ ಸ್ಥಳೀಯ ಸಂಸ್ಥೆ ವ್ಯಾಪ್ತಿಯಲ್ಲಿ 50ರಿಂದ 150ಕ್ಕೂ ಹೆಚ್ಚು ಜಾಹೀರಾತು ಫಲಕಗಳನ್ನು ಅನಧಿಕೃತವಾಗಿ ಅಳವಡಿಸಲಾಗಿದೆ. ಇದರಿಂದ ವಾರ್ಷಿಕ ಕೋಟ್ಯಂತರ ರೂ. ಜಾಹೀರಾತು ತೆರಿಗೆ ನಷ್ಟವಾಗುತ್ತಿದೆ.

ಮಹಾನಗರ ಪಾಲಿಕೆ, ನಗರಸಭೆ, ಪುರಸಭೆ ಬಜೆಟ್ ಪ್ರಕಾರ ಜಾಹೀರಾತುಗಳ ಮೂಲಕ ಅಂದಾಜು 15ರಿಂದ 20 ಕೋಟಿ ರೂ. ಆದಾಯ ನಿರೀಕ್ಷಿಸಲಾಗಿದೆ. ಆದರೆ, ಜಾಹೀರಾತು ಫಲಕಗಳ ನಿಖರ ಸಂಖ್ಯೆ ಮತ್ತು ಅವುಗಳ ಮಾಲೀಕರ ಬಗ್ಗೆ ಸಮರ್ಪಕ ಮಾಹಿತಿ ಕೊರತೆ, ಹಳೆಯ ತೆರಿಗೆ ಬಾಕಿ ವಸೂಲಿ ಮಾಡುವಲ್ಲಿ ಹಿನ್ನಡೆ ಹಾಗೂ ಜಾಹೀರಾತು ಏಜೆನ್ಸಿಗಳ ಮೋಸದ ಪರಿಣಾಮ ವಾರ್ಷಿಕ 2ರಿಂದ 4 ಕೋಟಿ ರೂ. ತೆರಿಗೆ ನಷ್ಟವಾಗುತ್ತಿದೆ.

ಸರ್ಕಾರಿ ಆಸ್ತಿಗಳಲ್ಲಿ ಜಾಹೀರಾತು ಪ್ರದರ್ಶನಕ್ಕೆ ಗುತ್ತಿಗೆದಾರರು 3ರಿಂದ 5 ವರ್ಷಗಳವರೆಗೆ ಸ್ಥಳ ಗುತ್ತಿಗೆ ಪಡೆದಿರುತ್ತಾರೆ. ಆದರೆ, ಕೆಲ ಗುತ್ತಿಗೆದಾರರು ಕೋರ್ಟ್‌ಗೆ ಹೋಗಿದ್ದು, ಅವರಿಂದ ಆದಾಯ ಬರುತ್ತಿಲ್ಲ ಎಂಬುದು ಸ್ಥಳೀಯ ಆಡಳಿತ ಸಂಸ್ಥೆಗಳ ದೂರಾಗಿದೆ.