ಬೀದಿ ನಾಯಿ ಹಾವಳಿ ತಡೆಗೆ ಸಜ್ಜಾದ ಜಿಲ್ಲಾಡಳಿತ

ಬೆಳಗಾವಿ: ಆಝಾದ್ ನಗರದಲ್ಲಿ ಭಾನುವಾರ ಎರಡು ವರ್ಷದ ಬಾಲಕನ ಮೇಲೆ ಬೀದಿ ನಾಯಿಗಳು ಮಾರಣಾಂತಿಕವಾಗಿ ದಾಳಿ ಮಾಡಿರುವ ಬಳಿಕ ಎಚ್ಚೆತ್ತುಕೊಂಡಿರುವ ಜಿಲ್ಲಾಡಳಿತ ಬೀದಿನಾಯಿಗಳಿಗೆ ಸಂಬಂಧಿಸಿದಂತೆ ಸುಪ್ರೀಂ ಕೋರ್ಟ್ ನೀಡಿರುವ ಆದೇಶದ ಪಾಲನೆ ಮಾಡುವುದಕ್ಕೆ ಮುಂದಾಗಿದ್ದು, ಜ.9ರಂದು ಜಿಪಂ ಸಭಾಭವನದಲ್ಲಿ ಜಿಲ್ಲಾಮಟ್ಟದ ಸಭೆ ಕರೆದಿದೆ.

ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಸೋಮವಾರ ಡಿಸಿ ಮೊಹಮ್ಮದ್ ರೋಷನ್ ಬೀದಿ ನಾಯಿ ಹಾವಳಿ, ದಾಳಿ ಮತು ಇವುಗಳಿಂದ ಆಗುತ್ತಿರುವ ತೊಮದರೆಗಳ ಕುರಿತು ವಿವಿಧ ಇಲಾಖೆ ಅಧಿಕಾರಿಗಳು, ಕೆಲ ಎನ್‌ಜಿಒಗಳ ಜತೆಗೆ ಸಭೆ ನಡೆಸಿದ ಬಳಿಕ ಕೈಗೊಳ್ಳಲಿರುವ ಕ್ರಮಗಳ ಬಗ್ಗೆ ಮಾಹಿತಿ ನೀಡಿದರು.

ಜಿಲ್ಲೆಯಲ್ಲಿ ಬೀದಿ ನಾಯಿಗಳ ಸಮಸ್ಯೆ ನಿವಾರಿಸಲು ಅಗತ್ಯ ಕ್ರಮಗಳನ್ನು ಕೈಗೊಳ್ಳಲು ಜಿಲ್ಲಾಡಳಿತ ಸನ್ನದ್ಧವಾಗಿದ್ದು, ಸುಪ್ರಿಂ ಕೋರ್ಟ್ ಆದೇಶನ್ವಯ ಜಿಲ್ಲೆಯಲ್ಲಿರುವ ಶಾಲೆ, ಕಾಲೇಜು, ಆಸ್ಪತ್ರೆ ಮುಂತಾದ ಸರ್ಕಾರಿ ಮತ್ತು ಖಾಸಗಿ ಸಂಸ್ಥೆಗಳ ವ್ಯಾಪ್ತಿಯಲ್ಲಿರುವ ರಸ್ತೆ ಬದಿಯ ಬೀದಿ ನಾಯಿಗಳ ಗಣತಿ ಮಾಡಬೇಕಿತ್ತು. ಈಗಾಗಲೇ ಆ ಕಾರ್ಯ ಮುಗಿದಿದ್ದು ಟ್ಟು 8,598 ಸಂಸ್ಥೆಗಳ ಆವರಣದಲ್ಲಿ 22,130 ಬೀದಿ ನಾಯಿಗಳಿರುವುದು ಪತ್ತೆಯಾಗಿದೆ. ಈಗಾಗಲೇ ಇವುಗಳನ್ನು ಶೆಲ್ಟರ್ ಹೌಸ್‌ಗೆ ಸ್ಥಳಾಂತರಿಸಲು ಯೋಜನೆ ರೂಪಿಸುತ್ತಿದ್ದೇವೆ ಎಂದು ಹೇಳಿದರು.

ಬೆಳಗಾವಿ ಪಾಲಿಕೆ ವ್ಯಾಪ್ತಿಯಲ್ಲಿ 539 ಸಂಸ್ಥೆಗಳ ಪೈಕಿ 2536 ನಾಯಿಗಳಿವೆ. ಹಿರೇಬಾಗೇವಾಡಿಯಲ್ಲಿ ಎರಡು ಎಕರೆಯಲ್ಲಿ ಶೆಲ್ಟರ್ ಹೌಸ್ ನಿರ್ಮಾಣವಾಗುತ್ತಿದ್ದು, ಅಲ್ಲಿಗೆ ಶಿಫ್ಟ್ ಮಾಡಲಾಗುವುದು. ಇಲ್ಲಿ ಒಂದು ಆಶ್ರಯ ತಾಣ ಮತ್ತು ಸಂತಾನಶಕ್ತಿ ಹರಣ(ಎಬಿಸಿ) ಚಿಕಿತ್ಸೆ ಕೇಂದ್ರವನ್ನು ನಿರ್ಮಿಸುವ ಕೆಲಸ ಆರಂಭಿಸಿದೆ. ಈ ಕೇಂದ್ರದಲ್ಲಿ ಸುಮಾರು 800 ನಾಯಿಗಳಿಗೆ ಆಶ್ರಯ ನೀಡಲು ಸಾಧ್ಯವಾಗುತ್ತದೆ. ಸದರಿ ನಾಯಿಗಳ ಪೈಕಿ 300 ನಾಯಿಗಳಿಗೆ ಎಬಿಸಿ ನೀಡಿ, ಸಂಬಂಧಿತ ಪ್ರದೇಶಗಳಿಗೆ ಬಿಡಲಾಗುವುದು. ಇದಲ್ಲದೆ 500 ನಾಯಿಗಳಿಗಾಗಿ ಅಲ್ಲಿ ವಿಶೇಷ ಯೋಜನೆಯನ್ನು ರೂಪಿಸಲಾಗುವುದು. ಇಂದು ನಾವು ಅನೇಕ ಶ್ವಾನ ಪ್ರೇಮಿಗಳು ಮತ್ತು ಸರ್ಕಾರೇತರ ಸಂಸ್ಥೆಗಳ ಪ್ರತಿನಿಧಿಗಳೊಂದಿಗೆ ಚರ್ಚಿಸಿದ್ದೇವೆ. ಇದಕ್ಕೆ ಸಂಬಂಧಿಸಿದಂತೆಯೇ ಜ.9ರಂದು ಮಹತ್ವದ ಸಭೆ ಕರೆದಿದ್ದೇವೆ ಎಂದರು.