ಬೆಳಗ್ಗೆ ೫ ಗಂಟೆಗೆ ಸೇವಕರು ಅರ್ಚಕರೊಂದಿಗೆ ಸೇರಿ ದೇವಿ ಮೂರ್ತಿ ಪಲ್ಲಕ್ಕಿಯಲ್ಲಿಟ್ಟು ಮೆರವಣಿಗೆ ಮೂಲಕ ಜಗ ಹೊತ್ತು ಜೋಗುಳಬಾವಿ ಸತ್ಯವ್ವನ ದೇವಸ್ಥಾನಕ್ಕೆ ತೆರಳಿ ಅಭಿಷೇಕ, ವಿಶೇಷ ಪೂಜೆ ನೆರವೇರಿಸಿದರು. ಬಳಿಕ ದೇಸಾಯಿವಾಡೆಗೆ ಪಲ್ಲಕ್ಕಿ ಬಂದ ಬಳಿಕ ದೇಸಾಯಿ ಕುಟುಂಬಸ್ಥರು ಹಾಗೂ ಗ್ರಾಮಸ್ಥರಿಂದ ಪೂಜೆ ಹಾಗೂ ಉಡಿ ತುಂಬುವ ಕಾರ್ಯಕ್ರಮ ನಡೆಯಿತು. ನಂತರ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಸಕಲ ವಾದ್ಯಮೇಳ, ಚೌಡಕಿ, ಶಹನಾಯಿ ಕಲಾವಿದರೊಂದಿಗೆ ಮೆರವಣಿಗೆ ಮೂಲಕ ದೇವಿ ಜಗದ ಮನೆಗೆ ಬಂದು ಅರ್ಚಕ ಕುಟುಂಬಸ್ಥರಿಂದ ಪೂಜೆ ಸಲ್ಲಿಸಲಾಯಿತು. ಮರಳಿ ದೇವಸ್ಥಾನಕ್ಕೆ ಹೋಗಿ ದೇವಿಗೆ ಅಭಿಷೇಕ ಹಾಗೂ ವಿಶೇಷ ಪೂಜೆ ನೆರವೇರಿಸಲಾಯಿತು. ಅಗ್ನಿ ಪ್ರವೇಶಕ್ಕಾಗಿ ಕುಂಡಕ್ಕೆ ತೆರಳುವ ವೇಳೆ ರೇಣುಕಾ ಯಲ್ಲಮ್ಮದೇವಿ ಮಂಗಳಸೂತ್ರ ವಿಸರ್ಜನೆ ಮಾಡಿ ಉದ್ಭವಮೂರ್ತಿ ಹಸಿರು ಅರಿವೆಯಿಂದ ಮುಚ್ಚಿದ ಬಳಿಕ ದೇವಸ್ಥಾನದ ಬಾಗಿಲು ಮುಚ್ಚಲಾಯಿತು.
