ಸಂಚಾರ ನಿಯಮ ಉಲ್ಲಂಘಿಸುವ ಬಸ್

ಗಾಂಧಿ ನಗರ ರಸ್ತೆ ಮೂಲಕ ದೊಡ್ಡ ವಾಹನಗಳು ಬೈಪಾಸ್‌ನತ್ತ ಸಾಗುವುದನ್ನು ತಡೆದು ವರ್ಷಗಳೇ ಕಳೆದಿವೆ. ಕಾರು ಮತ್ತು ಬೈಕ್‌ಗಳ ಅನುಕೂಲಕ್ಕಾಗಿ ಖಾಸಗಿ ಆಸ್ಪತ್ರೆ ಎದುರು ಯೂ-ಟರ್ನ್‌ಗೆ ಅವಕಾಶ ನೀಡಲಾಗಿದೆ. ಸಾಂಬ್ರಾ ಮಾರ್ಗವಾಗಿ ಸಂಚರಿಸುವ ಹಾಗೂ ಬೈಪಾಸ್ ಸೇರಿ, ಹಿರೇಬಾಗೇವಾಡಿಯತ್ತ ಹೋಗುವ ಬಸ್ ಮತ್ತಿತರ ದೊಡ್ಡ ವಾಹನಗಳು ಮಹಾಂತೇಶ ನಗರದ ಮೇಲ್ಸೇತುವೆ ಮೂಲಕವೇ ಸಾಗಬೇಕು. ಈ ಕುರಿತು ಸ್ಪಷ್ಟ ನಿಯಮವಿದ್ದರೂ ಸರ್ಕಾರಿ ಸಾರಿಗೆ ಸಂಸ್ಥೆ ಬಸ್‌ಗಳು ಮಾತ್ರ ಈ ನಿಯಮ ಗಾಳಿಗೆ ತೂರುತ್ತಿವೆ.

ಖಾಸಗಿ ಆಸ್ಪತ್ರೆ ಎದುರು ಬಸ್‌ಗಳು ತಿರುವು ತೆಗೆದುಕೊಳ್ಳುವಾಗ ಇಡೀ ರಸ್ತೆಗೆ ಅಡ್ಡಲಾಗಿ ನಿಲ್ಲುತ್ತಿವೆ. ಎರಡು ಬದಿಯ ರಸ್ತೆಯಲ್ಲಿ ವಾಹನಗಳು ಸಾಲುಗಟ್ಟಿ ನಿಲ್ಲುವಂತಾಗುತ್ತಿದೆ. ಇಲ್ಲಿ ಆಸ್ಪತ್ರೆಯಿರುವುದರಿಂದ ಆಂಬುಲೆನ್ಸ್ ಹಾಗೂ ತುರ್ತು ಚಿಕಿತ್ಸೆಗೆ ಬರುವ ರೋಗಿಗಳಿಗೆ ಈ ಸಂಚಾರ ಸಿಕ್ಕು ಶಾಪವಾಗಿ ಪರಿಣಮಿಸಿದೆ. ಕಣಬರ್ಗಿ-ಮಹಾಂತೇಶ ನಗರ ಕಡೆಯಿಂದ ಬರುವ ವಾಹನಗಳಿಗೂ ಅಡ್ಡಿಯಾಗುತ್ತಿದೆ. ಬಸ್‌ಗಳನ್ನು ನೋಡಿ ಉಳಿದ ದೊಡ್ಡ ವಾಹನದವರೂ ಇದನ್ನೇ ಅನುಸರಿಸುತ್ತಿದ್ದಾರೆ.

ಮೊದಲು ಅಶೋಕ ವೃತ್ತದ ಬಳಿ ತಿರುವು ತೆಗೆದುಕೊಳ್ಳುವುದನ್ನು ನಿರ್ಬಂಧಿಸಿದ ಕ್ರಮಕ್ಕೆ ಶ್ಲಾಘನೆ ವ್ಯಕ್ತವಾಗಿದ್ದು, ಇದರಿಂದ ವೃತ್ತದಲ್ಲಿ ಆಗುತ್ತಿದ್ದ ಸಂಚಾರ ಸಿಕ್ಕು ಕಡಿಮೆಯಾಗಿದೆ. ಆದರೆ, ಸುಗಮ ಸಂಚಾರದ ನಿಯಮಗಳನ್ನು ಪಾಲಿಸದವರಿಂದ ಸಮಸ್ಯೆಯಾಗುತ್ತಿದ್ದು, ನಿಯಮ ಉಲ್ಲಂಘಿಸುವವರಿಗೆ ಬಿಸಿ ಮುಟ್ಟಿಸುವ ಕೆಲಸವಾಗಬೇಕಿದೆ ಎಂಬುದು ಸಾರ್ವಜನಿಕರ ಆಗ್ರಹವಾಗಿದೆ.