ಜಿಲ್ಲೆ ವಿಭಜನೆ ಮತ್ತೆ ಮುನ್ನೆಲೆಗೆ

map

Published on:

10 Dec 2025, 12:29 pm

ಬೆಳಗಾವಿ: ಗಡಿಭಾಗದ ಜನರ ಅನುಕೂಲ, ಆಡಳಿತಾತ್ಮಕ ದೃಷ್ಟಿಯಿಂದ ಬೆಳಗಾವಿ ಜಿಲ್ಲೆಯನ್ನು ವಿಭಜಿಸಿ ಎರಡು ಅಥವಾ ಮೂರು ಜಿಲ್ಲೆ ರಚಿಸಬೇಕೆಂಬುದು ಮೂರು ದಶಕಗಳ ಬೇಡಿಕೆಯಾಗಿದೆ. ಚಿಕ್ಕೋಡಿ, ಗೋಕಾಕ, ಬೈಲಹೊಂಗಲ ಹಾಗೂ ಅಥಣಿಗಳನ್ನು ಜಿಲ್ಲೆ ಕೇಂದ್ರಗಳನ್ನಾಗಿ ೋಷಿಸಬೇಕೆಂಬ ಹೋರಾಟ ಆಯಾ

ಭಾಗಗಳಲ್ಲಿ ತೀವ್ರಗೊಂಡ ಹಿನ್ನೆಲೆ ಹೊಸ ಜಿಲ್ಲೆ ರಚನೆ ಮುನ್ನೆಲೆಗೆ ಬಂದಿದೆ.

ಜಿಲ್ಲಾ ಕೇಂದ್ರದ ಬೇಡಿಕೆ ಈಡೇರಿಕೆಗಾಗಿ ಚಿಕ್ಕೋಡಿ, ಬೈಲಹೊಂಗಲ, ಗೋಕಾಕ, ಅಥಣಿ ಭಾಗದ ಜನರು ವಿವಿಧ ಮಠಾಧೀಶರು, ಜನಪ್ರತಿನಿಧಿಗಳ ನೇತೃತ್ವದಲ್ಲಿ ಹೋರಾಟ ನಡೆಸುತ್ತ ಬರುತ್ತಿದ್ದಾರೆ. ಸುಪ್ರೀಂಕೋರ್ಟ್‌ನಲ್ಲಿ ಬೆಳಗಾವಿ ಗಡಿ ವಿಷಯ ವಿಚಾರಣೆ ಹಂತದಲ್ಲಿರುವ ಕಾರಣ ಸರ್ಕಾರ ಜಿಲ್ಲೆ ವಿಭಜನೆ ವಿಷಯದಲ್ಲಿ ನಿರ್ಣಯ ಕೈಗೊಳ್ಳಲು ವಿಳಂಬ ಮಾಡಿತ್ತು. ಆದರೆ, ಇದೀಗ ಹೋರಾಟ ತೀವ್ರ ಸ್ವರೂಪ ಪಡೆದುಕೊಂಡ ಹಿನ್ನೆಲೆಯಲ್ಲಿ ಪೂರಕ ಮಾಹಿತಿ ಸಂಗ್ರಹಣೆಗೆ ಸರ್ಕಾರ ಕ್ರಮವಹಿಸಿದೆ.

ಬೆಳಗಾವಿ ಜಿಲ್ಲೆಯನ್ನು ವಿಭಜಿಸಿ ಎರಡು ಅಥವಾ ಮೂರು ಜಿಲ್ಲೆಗಳನ್ನಾಗಿ ಮಾಡಬೇಕು ಎಂದು ಆಗ್ರಹಿಸಿ 1997ರಿಂದ ಹೋರಾಟಗಳು ನಡೆಯುತ್ತ ಬಂದಿದೆ. ವಾಸುದೇವ ರಾವ್ ಹುಂಡೇಕರ್ ಮತ್ತು ಪಿ.ಸಿ.ಗದ್ದಿಗೌಡರ ಸಮಿತಿಗಳು 1997ರಲ್ಲಿ ಚಿಕ್ಕೋಡಿ, ಗೋಕಾಕ ಹೊಸ ಜಿಲ್ಲೆಯಾಗಿಸಿ ಹಾಗೂ ಹೊಸ ತಾಲೂಕು ರಚಿಸಲು ಶಿಾರಸು ಮಾಡಿತ್ತು. ಆದರೆ, ಆಗ ಕನ್ನಡಪರ ಸಂಘಟನೆಗಳ ಭಾರಿ ವಿರೋಧದ ಹಿನ್ನೆಲೆ ಅಂದಿನ ಮುಖ್ಯಮಂತ್ರಿ ಜೆ.ಎಚ್.ಪಟೇಲ್ ಹೊಸ ಜಿಲ್ಲೆ ೋಷಣೆ ನಿರ್ಧಾರದಿಂದ ಹಿಂದೆ ಸರಿದಿದ್ದರು.

ತದನಂತರ ಅಧಿಕಾರಕ್ಕೆ ಬಂದ ಪಕ್ಷಗಳು ಜಿಲ್ಲೆ ವಿಭಜನೆ ವಿಷಯಕ್ಕೆ ಕೈಹಾಕಲಿಲ್ಲ. ಪರಿಣಾಮ ಬೆಳಗಾವಿ ಕೇಂದ್ರ ಸ್ಥಾನದಿಂದ 180ರಿಂದ 200 ಕಿಮೀ ದೂರದಲ್ಲಿರುವ ಹಳ್ಳಿಗಳ ಜನಸಾಮಾನ್ಯರು ಸರ್ಕಾರಿ ಸೌಲಭ್ಯಗಳಿಂದ ವಂಚಿತರಾಗಿದ್ದಾರೆ.

ಬೆಳಗಾವಿ ವಿಭಜಿಸಿದರೆ ಬೆಳಗಾವಿ ಭಾಗದಲ್ಲಿ ಮರಾಠಿಗರ ಪ್ರಾಬಲ್ಯ ಹೆಚ್ಚಾಗುತ್ತದೆ. ರಾಜ್ಯದ ರಾಜಕಾರಣಿಗಳು ಕೂಡ ಮರಾಠಿಗರ ಓಲೈಕೆಗಾಗಿ ಕನ್ನಡವನ್ನು ನಿರ್ಲಕ್ಷಿಸುವ ಹಂತಕ್ಕೆ ಬರುತ್ತಾರೆ. ಹೀಗಾಗಿ, ಆಡಳಿತ ವಿಷಯವಾಗಿ ಅಲ್ಲಲ್ಲಿ ಕಚೇರಿಗಳನ್ನು ಆರಂಭಿಸಿ ಜನರ ಸಮಸ್ಯೆಗಳನ್ನು ಪರಿಹರಿಸಬೇಕು. ಜತೆಗೆ ಹೆಚ್ಚುವರಿ ಅನುದಾನ ಬಿಡುಗಡೆ ಮಾಡಿದರೆ ವಿಭಜನೆ ಪ್ರಶ್ನೆಯೇ ಬರುವುದಿಲ್ಲ ಎಂಬುದು ಕನ್ನಡಪರ ಸಂಘಟನೆಗಳು, ಸಾಹಿತಿಗಳ ವಾದವಾಗಿದೆ.

ಈಗಾಗಲೇ ಜಿಲ್ಲೆ ವಿಭಜನೆ, ಹೊಸ ತಾಲೂಕುಗಳ ರಚನೆ ಕುರಿತು ವಿವಿಧ ಸಂಘಟನೆಗಳು, ಸಲ್ಲಿಸಿರುವ ಮನವಿಗಳನ್ನು ಪುರಸ್ಕರಿಸಿರುವ ಸರ್ಕಾರ ಇದೀಗ ಹೊಸ ಜಿಲ್ಲೆ, ತಾಲೂಕು ಸೃಜನೆ, ಮೂಲ ಸೌಕರ್ಯ, ಭೌಗೋಳಿಕ ವಿಸ್ತೀರ್ಣ, ಆಡಳಿತಾತ್ಮಕ ಅಗತ್ಯ, ನಗರ ಮತ್ತು ಗ್ರಾಮಗಳ ನಡುವಿನ ದೂರ ಸೇರಿ ಸಮಗ್ರ ಮಾಹಿತಿ ಕುರಿತು ಬೆಳಗಾವಿ ಪ್ರಾದೇಶಿಕ ಆಯುಕ್ತರಿಂದ ಮಾಹಿತಿ ಪಡೆದುಕೊಂಡಿದೆ. ಒಟ್ಟಾರೆ ಜಿಲ್ಲೆ ವಿಭಜನೆಯ ವಿಷಯದಲ್ಲಿ ಸರ್ಕಾರ ಏನು ನಿರ್ಧಾರ ಕೈಗೊಳ್ಳಲಿದೆ ಎಂಬುದು ಕುತೂಹಲದ ವಿಷಯವಾಗಿದೆ.

challenge