ಬೆಂಗಳೂರು: ತ್ಯಾಜ್ಯ ನಿಯಮ ಉಲ್ಲಂಘನೆ ಮಾಡುವವರಿಗೆ ದುಬಾರಿ ದಂಡ ಪ್ರಯೋಗ ಮಾಡಲು ‘ಬಿಬಿಎಂಪಿ ಘನತ್ಯಾಜ್ಯ ನಿರ್ವಹಣೆ ಉಪ ನಿಯಮ 2020’ಕ್ಕೆ ಸರ್ಕಾರ ಗೆಜೆಟ್ ಹೊರಡಿಸಿದೆ. ಪ್ರತಿಯೊಬ್ಬ ನಾಗರಿಕ ಬಿಬಿಎಂಪಿ ವ್ಯಾಪ್ತಿಯಲ್ಲಿ ಜೀವನ ಮಾಡುತ್ತಿದ್ದಲ್ಲಿ ತ್ಯಾಜ್ಯ ನಿರ್ವಹಣೆ ಕರದಿಂದ ತಪ್ಪಿಸಿಕೊಳ್ಳಲು ಸಾಧ್ಯ ವಿಲ್ಲ. ಪ್ರತಿಯೊಂದು ಮನೆ, ಆಸ್ತಿ, ಕೈಗಾರಿಕೆ, ಹೋಟೆಲ್, ಮಾಲ್, ರೆಸ್ಟೋರೆಂಟ್, ಸಮುದಾಯ ಭವನಗಳು, ಕಲ್ಯಾಣ ಮಂಟಪಗಳು, ಉದ್ಯಮ ಆಧಾರಿತ ಕಟ್ಟಡಗಳು ಹಾಗೂ ಸಾರ್ವಜನಿಕ ಸ್ಥಳದ ಬಳಕೆಯಿಂದ ಉತ್ಪಾದನೆಯಾಗುವ ಕಸಕ್ಕೂ ಹಣ ಪಾವತಿಸಬೇಕಿದೆ. ವಾಸ ಸ್ಥಳ ಹಾಗೂ ಉದ್ಯಮ ಸಂಬಂಧಿತ ಕಟ್ಟಡಗಳಿಗೆ ವಿಸ್ತೀರ್ಣ ಹಾಗೂ ಅಲ್ಲಿ ಸೇರುವ ಜನಸಂಖ್ಯೆ ಆಧಾರದಲ್ಲಿ ಕರ ವಸೂಲಿ ಮಾಡಲಾಗುತ್ತದೆ.
