ನಗರ ಬೆಳೆದಂತೆಲ್ಲ ಪ್ರಾಣಿಗಳ ಸಾವು ಸಂಖ್ಯೆಯೂ ಹೆಚ್ಚುತ್ತಿದೆ. ಸಹಜ ಸಾವಿನ ಜತೆಗೆ ರಸ್ತೆ ಅಪಘಾತಗಳಲ್ಲಿ ನಾಯಿ, ಹಸು ಸಹಿತ ಇತರ ಜಾನುವಾರುಗಳು ಸಾವನ್ನಪ್ಪುತ್ತಿವೆ. ಸಾಕು ಪ್ರಾಣಿಗಳು ಸತ್ತಲ್ಲಿ ಹೊರವಲಯಕ್ಕೆ ಒಯ್ದು ಖಾಲಿ ಜಾಗದಲ್ಲಿ ಮಣ್ಣು ಮಾಡಲಾಗುತ್ತದೆ. ಆದರೆ, ಬೀದಿ ನಾಯಿ ಅಥವಾ ರಸ್ತೆ ಅಪಘಾತದಲ್ಲಿ ಸತ್ತರೆ ಅಲ್ಲಿಯೇ ಕಳೇಬರ ಬಿಡಲಾಗುತ್ತಿದೆ. ಕೆಲವನ್ನು ಸಮಿಪದ ರಾಜಕಾಲುವೆಗೆ ಎಸೆಯುವ ಪರಿಪಾಠ ಬೆಳೆದಿದೆ. ಈ ಸಮಸ್ಯೆಗೆ ಪರಿಹಾರ ಕಂಡುಕೊಳ್ಳಲು ಕೆಲ ವರ್ಷಗಳ ಹಿಂದೆಯೇ ರಿಂಗ್ ರಸ್ತೆಯ ಸುಮನಹಳ್ಳಿ ಬಳಿ ಸಣ್ಣ ಪ್ರಮಾಣದಲ್ಲಿ ಪ್ರಾಣಿ ಚಿತಾಗಾರ ಕಾರ್ಯಾರಂಭ ಮಾಡಿದೆ. ಸದ್ಯ ಈ ಘಟಕ ದುರಸ್ತಿಯಲ್ಲಿದ್ದು, ಈ ವರ್ಷಾಂತ್ಯಕ್ಕೆ ಪುನಾರಂಭವಾಗುವ ನಿರೀಕ್ಷೆ ಇದೆ.
