ಬಿಸಿಲಿನ ಧಗೆ ಹೆಚ್ಚಳ ಮತ್ತು ಮಳೆ ಕೊರತೆಯ ನೇರ ಪರಿಣಾಮ ಜಿಲ್ಲೆಯ ಪ್ರಮುಖ ವಾಣಿಜ್ಯ ಬೆಳೆ ಕಾಫಿ ಮೇಲೆ ತಟ್ಟಿದೆ. ಸಕಾಲದಲ್ಲಿ ಒಂದು ಉತ್ತಮ ಮಳೆ ಸಿಕ್ಕಿದವರು, ತುಂತುರು ನೀರಾವರಿ ವ್ಯವಸ್ಥೆ ಮಾಡಿಕೊಂಡು ತೋಟದಲ್ಲಿ ಕಾಫಿ ಹೂವು ಅರಳಿಸಿದ್ದವರೆಲ್ಲಾ ಈಗ ಮತ್ತೊಂದು ಮಳೆಯ ನಿರೀಕ್ಷೆಯಲ್ಲಿ ಇದ್ದಾರೆ. ’ಈಗ ’ಬ್ಯಾಕಿಂಗ್’ ಸಿಕ್ಕಿದರೆ ಮಾತ್ರ ಫಸಲು ಉಳಿಯುತ್ತದೆ. ಇಲ್ಲದಿದ್ದರೆ ಮುಂದಿನ ವರ್ಷ ಕಾಫಿ ತೋಟಕ್ಕೆ ಕೊಯ್ಲು ಕೆಲಸಕ್ಕೆ ಹೋಗುವ ಅಗತ್ಯವೇ ಇಲ್ಲ, ಎನ್ನುತ್ತಿದ್ದಾರೆ ಬೆಳೆಗಾರರು. ನದಿ, ತೊರೆ, ಕೊಳವೆಬಾವಿಗಳಿಂದ ನೀರಾವರಿ ವ್ಯವಸ್ಥೆ ಮಾಡಿಕೊಳ್ಳೋಣ ಎಂದರೆ ಈಗ ಅಲ್ಲಿಯೂ ನೀರು ಬತ್ತಿದೆ.
ಮಳೆಯನ್ನೇ ನಂಬಿದವರು ಫಸಲು ಉಳಿಸಿಕೊಳ್ಳುವುದಿರಲಿ ಮಕ್ಕಳಂತೆ ಸಲುಹಿಕೊಂಡು ಬಂದಿರುವ ಕಾಫಿ ಗಿಡಗಳನ್ನೇ ಕಾಪಾಡಿಕೊಳ್ಳುವುದು ಹೇಗೆ ಎನ್ನುವ ಚಿಂತೆಯಲ್ಲಿದ್ದಾರೆ. ಜಿಲ್ಲೆಯಲ್ಲೇ ಹೆಚ್ಚು ಮಳೆಯಾಗುವ ಪ್ರದೇಶಗಳಲ್ಲಿ ಒಂದಾಗಿರುವ ಮಡಿಕೇರಿ ತಾಲೂಕಿನ ಚೇಲಾವರ ಭಾಗದಲ್ಲಿಯೇ ಕಾಫಿ ಗಿಡಗಳು ಒಣಗಿ ನಿಂತಿದೆ. ಪೊನ್ನಂಪೇಟೆ ತಾಲೂಕಿನ ಕುಟ್ಟ ಮತ್ತಿತರ ಭಾಗಗಳಲ್ಲೂ ಇದೇ ಪರಿಸ್ಥಿತಿ ಕಂಡುಬರುತ್ತಿದೆ. ಜಿಲ್ಲೆಯ ಬಹುತೇಕ ಭಾಗಗಳಲ್ಲೂ ಕಾಫಿ ಗಿಡಗಳು ಬಾಡುತ್ತಿದ್ದು, ಸದ್ಯದಲ್ಲಿ ಮಳೆ ಬಾರದಿದ್ದರೆ ಇವು ಕೂಡ ಒಣಗುವುದು ಖಚಿತ ಎನ್ನುತ್ತಾರೆ ಬೆಳೆಗಾರರು.
