ಬಂಟ್ವಾಳ ಜಂಕ್ಷನ್ ನಾಲ್ಕು ರಸ್ತೆಗಳು ಕೂಡುವ ಸ್ಥಳವಾಗಿದೆ. ಬಿ.ಸಿ.ರೋಡಿನಿಂದ ಪುಂಜಾಲಕಟ್ಟೆ, ಪುಂಜಾಲಕಟ್ಟೆಯಿಂದ ಬಿ.ಸಿ.ರೋಡು ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ ಮುಖ್ಯ ರಸ್ತೆಯಾದರೆ, ಮೂಡುಬಿದಿರೆಗೆ ಸಂಪರ್ಕ ಕಲ್ಪಿಸುವ ರಾಜ್ಯ ಹೆದ್ದಾರಿ ಹಾಗೂ ಬಂಟ್ವಾಳ ಪೇಟೆಗೆ ಸಂರ್ಕಿಸುವ ರಸ್ತೆಯೂ ಇಲ್ಲೆ ಸಂಧಿಸುತ್ತದೆ. ಮೂಡುಬಿದಿರೆ ರಸ್ತೆಯಿಂದ ಬರುವ ವಾಹನಗಳು ಬಿ.ಸಿ.ರೋಡು ಕಡೆಗೆ ಅಥವಾ ಬಂಟ್ವಾಳ ಪೇಟೆಗೆ ಬರಬೇಕಾದರೆ, ಬಿ.ಸಿ.ರೋಡು ಕಡೆಯಿಂದ ಬರುವ ವಾಹನಗಳು ಬಂಟ್ವಾಳ ಪೇಟೆಗೆ ಹೋಗಬೇಕಾದರೆ ರಾ.ಹೆದ್ದಾರಿ ಮಧ್ಯ ಇರುವ ಮುಖ್ಯ ವೃತ್ತದಲ್ಲಿ ತಿರುವು ಪಡೆದುಕೊಳ್ಳಬೇಕು. ಬಂಟ್ವಾಳ ಪೇಟೆಯಿಂದ ಮೂಡುಬಿದಿರೆ ರಸ್ತೆಗೆ ಬರುವ ವಾಹನಗಳು ಚತುಷ್ಪಥ ಹೆದ್ದಾರಿಯನ್ನು ದಾಟಿ ಮುಂದುವರಿಯಬೇಕು. ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚರಿಸುವ ವಾಹನಗಳು ನಿಯಂತ್ರಣವಿಲ್ಲದೆ ಶರವೇಗದಲ್ಲಿ ಸಂಚರಿಸುವುದರಿಂದ ಇಲ್ಲಿ ಆಗಾಗ ಅಪಘಾತಗಳು ನಡೆಯುತ್ತಿರುತ್ತವೆ. ಹೆಚ್ಚಾಗಿ ದ್ವಿಚಕ್ರ ವಾಹನಗಳೇ ಅಪಘಾತಕ್ಕೀಡಾಗುತ್ತಿರುತ್ತವೆ. ರಿಫ್ಲೆಕ್ಟರ್, ಹಂಪ್ ಅಳವಡಿಸಿದರೂ ಅಪಘಾತಗಳಿಗೆ ಕಡಿವಾಣ ಬಿದ್ದಿಲ್ಲ. ರಸ್ತೆ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವುದರ ಜತೆಗೆ ಈ ಸ್ಥಳಕ್ಕೆ ಬರುವಾಗ ಪ್ರತಿಯೊಬ್ಬ ವಾಹನ ಚಾಲಕರಲ್ಲಿ ಹೆಚ್ಚಿನ ತಾಳ್ಮೆ ಅತ್ಯಗತ್ಯ. ಸ್ವಲ್ಪ ತಾಳ್ಮೆ ತಪ್ಪಿದರೂ ಅನಾಹುತ ತಪ್ಪಿದ್ದಲ್ಲ.
