ಬನ್ನೂರು: ಹಸಿರು ಟವಲ್ ಹಾಕಿಕೊಂಡು, ರೈತ ಪರವಾಗಿ ನಿಂತಿದ್ದೇವೆ ಎಂದು ಫೋಸು ಕೊಡುವ ನಾಯಕರಿಗೆ ಕೃಷಿಕಪರ ಕಾಳಜಿ ಇಲ್ಲವಾಗಿದೆ ಎಂದು ಕರ್ನಾಟಕ ರಾಜ್ಯ ರೈತ ಸಂಘ(ಮೂಲ ಸಂಘಟನೆ) ಜಿಲ್ಲಾಧ್ಯಕ್ಷ ಬನ್ನೂರು ನಾರಾಯಣ್ ಹೇಳಿದರು. ಅವರು ಪಟ್ಟಣದ ಎಪಿಎಂಸಿ ಆವರಣದಲ್ಲಿ ಬುಧವಾರ ಹಮ್ಮಿಕೊಂಡಿದ್ದ ವಿಶ್ವ ರೈತ ದಿನಾಚರಣೆಯ ಕಾರ್ಯಕ್ರಮದಲ್ಲಿ ಮಾತನಾಡಿದರು. ಒಬ್ಬ ಕೃಷಿ ಸಚಿವರಾಗಿ, ರೈತನ ಅಭಿವೃದ್ಧಿಗೆ ಪೂರಕವಾದ ಕಾರ್ಯಕ್ರಮವನ್ನು ರೂಪಿಸಿ, ಬಡ ರೈತರ ಅಭಿವೃದ್ಧಿಗೆ ಆಶಾಕಿರಣವಾಗಿದ್ದ ಚೌಧರಿ ಚರಣ್ಸಿಂಗ್ ಅವರನ್ನು ಪ್ರತಿಯೋಬ್ಬ ರೈತರೂ ಸ್ಮರಿಸಿಕೊಳ್ಳಬೇಕು ಎಂದರು. ಇಂದಿನ ರಾಜಕೀಯ ನಾಯಕರಿಗೆ, ಕೃಷಿ ಸಚಿವರಿಗೆ ಚೌಧರಿ ಚರಣ್ ಸಿಂಗ್ ಅವರ ನಡೆ-ನುಡಿ ಮತ್ತು ಕಾರ್ಯಕ್ಷಮತೆ ಮಾದರಿ ಆಗಬೇಕು. ಅವರು ಹಾಕಿಕೊಟ್ಟ ಮಾರ್ಗದಲ್ಲಿಯೇ ರಾಜಕೀಯ ನೇತಾರರು, ಕೃಷಿ ಸಚಿವರುಗಳು ಸಾಗಿದ್ದರೆ ಇಂದು ಸಾವಿರಾರು ರೈತರ ಬದುಕು ಹಸನಾಗಿರುತ್ತಿತ್ತು ಎಂದರು.
