ಮಂಗಳೂರು: ನಗರದ ಕದ್ರಿ ಎಸ್ಬಿಐ ಎಟಿಎಂ ಕೊಠಡಿಯಲ್ಲಿ ಕುಸಿದು ಬಿದ್ದ ಪರಿಣಾಮ ಕೇರಳದ ವ್ಯಕ್ತಿಯೋರ್ವರು ಮಂಗಳವಾರ ಸಂಜೆ ಮೃತಪಟ್ಟಿದ್ದಾರೆ.
ಕಾಂಞಂಗಾಡ್ ನಿವಾಸಿ ಬಾಲಕೃಷ್ಣ ಎಚ್. (53) ಮೃತಪಟ್ಟವರು. ಹಣ ಡ್ರಾ ಮಾಡಲೆಂದು ಬೆಳಗ್ಗೆ ಎಟಿಎಂಗೆ ಹೋಗಿದ್ದ ಅವರು ಅಲ್ಲಿಯೇ ಕುಸಿದು ಬಿದ್ದಿದ್ದರು. ಬೀಳುವ ಸಂದರ್ಭ ಎಟಿಎಂ ಗಾಜು ಅವರ ದೇಹಕ್ಕೆ ತಾಗಿ ರಕ್ತಸ್ರಾವವಾಗಿತ್ತು. ಸ್ಥಳೀಯರು ಅವರನ್ನು ಆಸ್ಪತ್ರೆಗೆ ಕೊಂಡೊಯ್ದು ದಾಖಲಿಸಿದ್ದರು. ಆದರೆ ಸಂಜೆಯ ವೇಳೆಗೆ ಅವರು ಮೃತಪಟ್ಟಿದ್ದಾರೆ. ಹೃದಯಾಘಾತದಿಂದ ಮೃತಪಟ್ಟಿರುವುದಾಗಿ ವೈದ್ಯಕೀಯ ವರದಿ ತಿಳಿಸಿದ್ದು, ಈ ಕಾರಣದಿಂದಲೇ ಅವರು ಕುಸಿದು ಬಿದ್ದಿರಬೇಕು ಎಂದು ಕದ್ರಿ ಪೊಲೀಸರು ತಿಳಿಸಿದ್ದಾರೆ.
ಮೃತರು ಪತ್ನಿ, ಪುತ್ರಿ ಹಾಗೂ ಕುಟುಂಬಸ್ಥರನ್ನು ಅಗಲಿದ್ದಾರೆ. ಬಾಲಕೃಷ್ಣ ಅವರು ದಕ್ಷಿಣ ಕನ್ನಡ ಜಿಲ್ಲಾ ಕೇಂದ್ರ ಸಹಕಾರಿ ಬ್ಯಾಂಕ್ನ ಉದ್ಯೋಗಿಯಾಗಿದ್ದರು. ಪತ್ನಿ ಮಕ್ಕಳು ಊರಲ್ಲೇ ವಾಸವಿದ್ದು, ಕದ್ರಿಯಲ್ಲಿ ಅವರು ಒಬ್ಬರೇ ವಾಸವಿದ್ದರು. ಈ ಬಗ್ಗೆ ಕದ್ರಿ ಪೊಲೀಸ್ ಠಾಣೆಯಲ್ಲಿ ಅಸಹಜ ಸಾವು ಪ್ರಕರಣ ದಾಖಲಾಗಿದೆ.
