ಎಸ್.ವೆಂಕಟೇಶಪ್ಪ ಅವರು ತಾಲೂಕಿಗೆ ತಹಸೀಲ್ದಾರ್ ಆಗಿ ಬಂದು ಕೇವಲ ನಾಲ್ಕು ತಿಂಗಳು ಕಳೆದಿದೆ. ಈಗ ಶಾಸಕ ಎಸ್.ಎನ್ ನಾರಾಯಣಸ್ವಾಮಿ ಮತ್ತು ತಹಸೀಲ್ದಾರ್ ನಡುವೆ ಕೆಲ ವಿಷಯದಲ್ಲಿ ಹೊಂದಾಣಿಕೆ ಕೊರತೆ ಕಂಡು ಬಂದಿದ್ದು, ಕಾಣದ ಕೈಗಳು ತಹಸೀಲ್ದಾರ್ ವರ್ಗಾವಣೆ ಮಾಡಿಸಲು ಮುಂದಾಗಿರುವ ವಿಚಾರ ಚರ್ಚೆಗೆ ಗ್ರಾಸವಾಗಿದೆ. ಈ ಹಿಂದೆ ತಹಸೀಲ್ದಾರ್ ಆಗಿ ಕಾರ್ಯನಿರ್ವಹಿಸಿದ್ದ ದಯಾನಂದ್ ಹಾಗೂ ಶಾಸಕರ ನಡವೆ ಸಹ ಹೊಂದಾಣಿಕೆ ಕೊರತೆ ಎದುರಾಗಿ, ಕೆಲ ವೇದಿಕೆಗಳಲ್ಲಿ ಬಹಿರಂಗವಾಗಿ ಶಾಸಕರು ತಹಸೀಲ್ದಾರ್ ದಯಾನಂದ್ ಅವರನ್ನು ಟೀಕಿಸಿದ್ದರು. ಜತೆಗೆ ತಾಲೂಕಿನಿಂದ ಎತ್ತಂಗಡಿ ಮಾಡಲು ಯತ್ನಿಸಿದ್ದರು. ಆದರೆ ಎತ್ತಂಗಡಿಯಾದ ಮರುದಿನವೇ ತಹಸೀಲ್ದಾರ್ ಮತ್ತೆ ತಾಲೂಕಿಗೆ ವರ್ಗಾವಣೆಗೊಂಡು ಬಂದು ಶಾಸಕರಿಗೆ ಟಾಂಗ್ ನೀಡಿದ್ದರು. ಕೊನೆಗೆ ರಾಜ್ಯದಲ್ಲಿ ಬಿಜೆಪಿ ಸರ್ಕಾರದ ನಂತರ ಬಂದ ಕಾಂಗ್ರೆಸ್ ಸರ್ಕಾರ ದಯಾನಂದ್ ಅವರನ್ನು ಎತ್ತಂಗಡಿ ಮಾಡಿತು.
