ಬಂಗಾರಪೇಟೆ ಕೆರೆ ಕೋಡಿ ಹರಿವು

ಬಂಗಾರಪೇಟೆ: ಸತತವಾಗಿ 3 ದಿನಗಳಿಂದ ರಾತ್ರಿ ವೇಳೆ ಭಾರಿ ಮಳೆ ಸುರಿಯುತ್ತಿರುವುದರಿಂದ ಪಟ್ಟಣದ ಕೆರೆ ಭಾನುವಾರ ರಾತ್ರಿ ಕೋಡಿ ಬಿದ್ದಿದೆ. ಸತತವಾಗಿ ಎದುರಾದ ಬರಗಾಲದಲ್ಲೂ ಈ ಕೆರೆ ಜನರಿಗೆ ಕುಡಿಯುವ ನೀರು ಒದಗಿಸುತ್ತಿತ್ತು. ಉತ್ತಮ ಮಳೆಯಾಗಿ ಕೆರೆ ತುಂಬಿದ್ದರಿಂದ ಅಂತರ್ಜಲ ವೃದ್ಧಿಯಾಗಿದೆ.

ಪ್ರಥಮ ಬಾರಿಗೆ ಕೆಸಿ ವ್ಯಾಲಿಯ ನೀರನ್ನು ಕೆರೆಗಳಿಗೆ ತುಂಬಿಸುವ ಕೆಲಸ ಮಾಡಿದ್ದರೂ, ಬಂಗಾರಪೇಟೆ ಕೆರೆಗೆ ನೀರು ತರಲು ಸಾಧ್ಯವಾಗಿರಲಿಲ್ಲ. 3 ವರ್ಷಗಳ ಹಿಂದೆ 1 ಸಾವಿರ ಅಡಿ ಆಳ ಕೊರೆದರೂ ನೀರು ಸಿಗುತ್ತಿರಲಿಲ್ಲ. ಈಗ ಸ್ವಲ್ಪಮಟ್ಟಿಗೆ ಸುಧಾರಣೆಯಾಗಿದೆ. ಹಿಂದೆ ತುಂಗಭದ್ರಾ ಡ್ಯಾಂನಿಂದ ರೈಲ್ವೆ ವ್ಯಾಗನ್​ನಲ್ಲಿ ನೀರು ತುಂಬಿಸಿ ಜನತೆಗೆ ಪೂರೈಕೆ ಮಾಡಲಾಗಿತ್ತು. ಎಸ್​.ಎನ್​.ನಾರಾಯಣಸ್ವಾಮಿ ಶಾಸಕರಾದ ಮೇಲೆ ಮುತುವರ್ಜಿವಹಿಸಿ ಕುಂಟಿತಗೊಂಡಿದ್ದ ಯರಗೋಳ್​ ಯೋಜನೆಗೆ ವೇಗ ಹೆಚ್ಚಿಸಿ ನೀರು ಪೂರೈಕೆಗೆ ಕ್ರಮ ವಹಿಸಿದ್ದರು.