ಮಾರುಕಟ್ಟೆಗಳಲ್ಲಿ ವಹಿವಾಟು ಡಲ್: ಗಣೇಶ ಚತುರ್ಥಿಗೆ ಕ್ಷಣಗಣನೆ ಆರಂಭವಾಗಿದೆ, ನಗರ ಪಟ್ಟಣ ಪ್ರದೇಶಗಳಲ್ಲಿ ಲೋಡ್ಗಟ್ಟಲೆ ಬಾಳೆಕಂಬ, ಕುಂಬಳಕಾಯಿ, ಗರಿಕೆ, ಮಾವಿನ ಸೊಪ್ಪು ಬಂದು ಬಿದ್ದಿವೆ. ಹೂ ಮಾರುಕಟ್ಟೆಗಳಲ್ಲಿ ತರಹೇವಾರಿ ಹೂಮಾಲೆಗಳು ಸಿದ್ಧಗೊಂಡು ಗ್ರಾಹಕರ ಸ್ವಾಗತಕ್ಕೆ ಕಾದಿವೆ. ಆದರೆ ಮಳೆರಾಯನ ಆರ್ಭಟದಿಂದ ಗ್ರಾಹಕರು ಮಾರುಕಟ್ಟೆಗಳತ್ತ ಸುಳಿಯುತ್ತಿಲ್ಲ. ದಾಸ್ತಾನು ಮಾಡಿರುವ ಬಾಳೆಕಂಬ, ಮಾವಿನಸೊಪ್ಪು ಮತ್ತಿತರ ವಸ್ತುಗಳು ಮಳೆಗೆ ಹಾನಿಯಾಗುತ್ತಿವೆ. ಅವುಗಳನ್ನು ಸಂರಕ್ಷಣೆ ಮಾಡುವುದೇ ದೊಡ್ಡ ಸಾಹಸವಾಗಿದೆ. ಬೆಳಗ್ಗೆ ಹಾಗೂ ಸಂಜೆ ವೇಳೆಯೇ ಧಾರಾಕಾರ ಮಳೆ ಸುರಿಯುತ್ತಿರುವುದರಿಂದ ವ್ಯಾಪಾರ ವಹಿವಾಟಿಗೆ ದೊಡ್ಡಪೆಟ್ಟು ಬಿದ್ದಂತಾಗಿದೆ.
