ಬೆಂಗಳೂರು ನಗರ ವಿ.ವಿ. ಕ್ಯಾಂಪಸ್​ನಲ್ಲಿ ಡಿಜಿಟಲ್​ ಗ್ರಂಥಾಲಯ ಉದ್ಘಾಟನೆ

ಬೆಂಗಳೂರು: ಶೈಕ್ಷಣಿಕ ಪ್ರಗತಿಗೆ ಹಾಗೂ ಜ್ಞಾನ ಸಂಪಾದನೆಗೆ ನಿರಂತರ ಕಲಿಕೆ ಮುಖ್ಯ ಎಂದು ಉನ್ನತ ಶಿಕ್ಷಣ ಸಚಿವ ಡಾ.ಎಂ.ಸಿ.ಸುಧಾಕರ್​ ತಿಳಿಸಿದ್ದಾರೆ.

ಬೆಂಗಳೂರು ನಗರ ವಿಶ್ವವಿದ್ಯಾಲಯದ ಕ್ಯಾಂಪಸ್​ನಲ್ಲಿ 'ಬ್ರಿಟಿಷ್​ ಕೌನ್ಸಿಲ್​ ಡಿಜಿಟಲ್​ ಲೈಬ್ರರಿ ವಾಲ್​'ಅನ್ನು ಮಂಗಳವಾರ ಉದ್ಘಾಟಿಸಿ ಮಾತನಾಡಿದರು.

ತರಗತಿಯೊಳಗೆ ಸಂಪಾದಿಸುವ ಜ್ಞಾನದ ಜತೆಗೆ, ಅಧ್ಯಯನದ ಮೂಲಕ ಗಳಿಸುವ ಜ್ಞಾನದಿಂದ ಮಾತ್ರ ಸ್ಪರ್ಧಾತ್ಮಕ ಯುಗದಲ್ಲಿ ಯಶಸ್ವಿಯಾಗಲು ಸಾಧ್ಯ. ಆಗ ವಿವಿಧ ಕ್ಷೇತ್ರಗಳಲ್ಲಿ ಏನೇನು ಬದಲಾವಣೆಗಳಾಗುತ್ತಿವೆ ಎಂಬುದನ್ನು ತಿಳಿಯಲು ಸಾಧ್ಯವಾಗುತ್ತದೆ. ಇಂತಹ ಸಂದರ್ಭದಲ್ಲಿ ಡಿಜಿಟಲ್​ ಗ್ರಂಥಾಲಯದ ಮೂಲಕ ಸುಲಭವಾಗಿ ಅಧ್ಯಯನಕ್ಕೆ ಬೇಕಾದ ಅಂಶಗಳನ್ನು ಪಡೆದುಕೊಳ್ಳಬಹುದಾಗಿದೆ.

ಬ್ರಿಟಿಷ್​ ಕೌನ್ಸಿಲ್​ ರಾಜ್ಯ ಸರ್ಕಾರದೊಂದಿಗೆ ಒಡಂಬಡಿಕೆ ಮಾಡಿಕೊಂಡು ಡಿಜಿಟಲ್​ ಗ್ರಂಥಾಲಯ ಸೌಲಭ್ಯ ನೀಡಿದೆ. ಅಧ್ಯಯನ ನಿರತರಿಗೆ ಇದರಿಂದ ಉಚಿತವಾಗಿ ಮಾಹಿತಿ ಪಡೆದುಕೊಳ್ಳಲು ಅವಕಾಶವಿದೆ. ಇದು ಬೆಂಗಳೂರು ನಗರ ವಿಶ್ವವಿದ್ಯಾಲಯಕ್ಕೆ ಮಾತ್ರ ಸೀಮಿತವಾಗದೆ, ರಾಜ್ಯದ ಎಲ್ಲ ವಿದ್ಯಾರ್ಥಿಗಳು ಈ ಸೌಲಭ್ಯವನ್ನು ಪಡೆದುಕೊಳ್ಳಬಹುದು ಎಂದು ತಿಳಿಸಿದರು.

ಬ್ರಿಟಿಷ್​ ಕೌನ್ಸಿಲ್​ನ ರಾಷ್ಟ್ರೀಯ ನಿರ್ದೇಶಕಿ ಡಾ. ಆಲಿಸನ್​ ಬ್ಯಾರೆಟ್​ ಮಾತನಾಡಿ, ಯುವಜನರೊಂದಿಗೆ ಸಂಪರ್ಕ ಸಾಧಿಸಿದಾಗ ಜ್ಞಾನ ಹಾಗೂ ಸಂಸತಿಯನ್ನು ಹಂಚಿಕೊಳ್ಳಲು ಸಾಧ್ಯವಾಗುತ್ತದೆ. ಆಗ ಸ್ಪರ್ಧಾತ್ಮಕ ಯುಗದಲ್ಲಿರುವ ಸವಾಲುಗಳಿಗೆ ಪರಿಹಾರ ಕಂಡುಕೊಳ್ಳಬಹುದಾಗಿದೆ. ಈ ನಿಟ್ಟಿನಲ್ಲಿ ಡಿಜಿಟಲ್​ ಗ್ರಂಥಾಲಯ ಆರಂಭಿಸಿದ್ದೇವೆ. ಇದರಿಂದ ಕರ್ನಾಟಕದಲ್ಲಿರುವ ವಿವಿಧ ವಿಶ್ವವಿದ್ಯಾನಿಲಯಗಳ ವಿದ್ಯಾರ್ಥಿಗಳಿಗೆ ಉಚಿತವಾಗಿ ಕಲಿಕಾ ಸಂಪನ್ಮೂಲಗಳು ಲಭ್ಯವಾಗುತ್ತವೆ ಎಂದರು.

ಬೆಂಗಳೂರು ನಗರ ವಿ.ವಿ.ಕುಲಪತಿ ಪ್ರೊ.ಲಿಂಗರಾಜ ಗಾಂಧಿ, ಕುಲಸಚಿವ (ಆಡಳಿತ) ಟಿ.ಜವರೇಗೌಡ, ಬ್ರಿಟಿಷ್​ ಕೌನ್ಸಿಲ್​ ದಕ್ಷಿಣ ಭಾರತದ ನಿರ್ದೇಶಕ ಜನಕ ಪುಷ್ಪನಾಥನ್​ ಇತರರಿದ್ದರು.

https://www.vijayavani.net/bangalore-university-59th-convocation