ಕೃಷಿ ವಿವಿಯ ಸಸ್ಯರೋಗಶಾಸ್ತ್ರ ವಿಭಾಗವು ಸುಸಜ್ಜಿತ ಬೀಜ ಆರೋಗ್ಯ ಪರೀಕ್ಷಾ ಪ್ರಯೋಗಾಲಯ, ಮಾನ್ಯತೆ ಪಡೆದ ಅಂಗಾಂಶ ಕೃಷಿ ಬೆಳೆಗಳ ಪ್ರಮಾಣೀಕರಣ ಮತ್ತು ಮಾನ್ಯತೆ ಪಡೆದ ಸಸ್ಯರೋಗ ನಿರ್ಣಯ ಪ್ರಯೋಗಾಲಯ, ಎಲ್ಲ ಬೆಳೆಗಳ ಬೀಜ ಮತ್ತು ಸಸ್ಯ ಆರೋಗ್ಯ ಪರೀಕ್ಷಾ ಸೇವೆಗಳನ್ನು ಸಾರ್ವಜನಿಕ ಮತ್ತು ಖಾಸಗಿ ಬೀಜಗಳ ಉತ್ಪಾದನಾ ಉದ್ಯಮಗಳಿಗೆ ಮತ್ತು ಸಂಸ್ಥೆಗಳಿಗೆ ನೀಡಲು ಪ್ರಾರಂಭಿಸುತ್ತಿದೆ. ಕೃಷಿ ವಿವಿ ನೀಡುವ ಬೀಜ ಆರೋಗ್ಯ ಪರೀಕ್ಷಾ ವರದಿ ದೃಢಿಕರಣ ಪತ್ರ ಪಡೆದ ಖಾಸಗಿ ಸಂಸ್ಥೆಗಳು ಹೊರದೇಶಗಳಾದ ಥೈಲ್ಯಾಂಡ್, ಚೀನಾ, ನೆದರ್ಲ್ಯಾಂಡ್ ಮತ್ತು ಸ್ಪೇನ್ ದೇಶಗಳಿಗೆ ರಫ್ತು ಮಾಡಬಹುದಾಗಿದೆ. ಅಲ್ಲದೆ ಬೆಂಗಳೂರು, ಮುಂಬೈ, ಗುಜರಾತ್, ನವದೆಹಲಿಯಲ್ಲಿನ ಪ್ರಾದೇಶಿಕ ಸಸ್ಯ ಸಂಪರ್ಕ ತಡೆ ಕೇಂದ್ರಗಳಿಂದ ಸಲ್ಲಿಸಲಾದ 140 ವಿವಿಧ ಬೀಜಗಳನ್ನು ಆರೋಗ್ಯ ಪರೀಕ್ಷೆಗೆ ಒಳಪಡಿಸಿ ಬೀಜ ಆರೋಗ್ಯ ವರದಿ ನೀಡಿರುತ್ತದೆ. ಬೀಜ ಪರೀಕ್ಷೆಯ ಲ್ಯಾಬ್ನಲ್ಲಿರುವ ಆಧುನಿಕ ತಂತ್ರಜ್ಞಾನವು ರೈತರ ಮತ್ತು ಉದ್ಯಮದ ವೃತ್ತಿಪರರಿಗೆ ತ್ವರಿತ ರೀತಿಯಲ್ಲಿ ಸೇವೆಯನ್ನು ನೀಡುವುದರ ಜತೆಗೆ ಜ್ಞಾನವನ್ನು ಹೆಚ್ಚಿಸುವುದರಲ್ಲಿ ಸಹಾಯಕವಾಗಲಿದೆ ಎಂದು ಡಾ. ಎಸ್.ವಿ.ಸುರೇಶ್ ವಿವರಿಸಿದರು.
