ಭಾರಿ ವಾಹನ ಸಂಚಾರ ಅಪಾಯದಲ್ಲಿ ಬಾಂದಾರ

ರಟ್ಟಿಹಳ್ಳಿ: ಅಂತರ್ಜಲ ವೃದ್ಧಿ, ರೈತರ ಅನುಕೂಲಕ್ಕಾಗಿ ಸರ್ಕಾರ 3.82 ಕೋಟಿ ರೂ ವೆಚ್ಚದಲ್ಲಿ ನಿರ್ವಿುಸಿದ ಬಾಂದಾರ ಕಂ ಸೇತುವೆ ಭಾರಿ ವಾಹನಗಳ ಸಂಚಾರದಿಂದ ಅಪಾಯಕ್ಕೆ ಸಿಲುಕಿದೆ.

ತಾಲೂಕಿನ ತೋಟಗಂಟಿ ಮತ್ತು ರಟ್ಟಿಹಳ್ಳಿ ಪಟ್ಟಣದ ಮಧ್ಯೆ ಇರುವ ಕುಮದ್ವತಿ ನದಿಗೆ ಅಡ್ಡಲಾಗಿ 2023ರಲ್ಲಿ ಸಣ್ಣ ನೀರಾವರಿ ಇಲಾಖೆಯಿಂದ ಬಾಂದಾರ ಕಂ ಸೇತುವೆ ನಿರ್ಮಾಣ ಮಾಡಲಾಗಿತ್ತು. ಇದರಿಂದ ಪಟ್ಟಣದಿಂದ ಕೇವಲ 1 ಕಿ.ಮೀ. ಅಂತರದಲ್ಲಿ ತೋಟಗಂಟಿ ಸೇರಿದಂತೆ ಈ ಭಾಗದಲ್ಲಿನ ಪರ್ವತ ಸಿದ್ದಗೇರಿ, ಜೋಕನಾಳ, ಕಣವಿಸಿದ್ದಗೇರಿ, ಹಳ್ಳಿಯಾಳ, ತಡಕನಹಳ್ಳಿ ಸೇರಿದಂತೆ ಅನೇಕ ಗ್ರಾಮಗಳ ಗ್ರಾಮಸ್ಥರ ನಿತ್ಯ ಸಂಚಾರಕ್ಕೆ ಅನುಕೂಲವಾಗಿದೆ.

ಆದರೆ, ಇತ್ತೀಚಿನ ದಿನಗಳಲ್ಲಿ ಈ ಸೇತುವೆ ಮೇಲೆ ಪ್ರತಿನಿತ್ಯ ಭಾರಿ ಗಾತ್ರದ ವಾಹನಗಳ ಸಾಗಾಟ ಎಗ್ಗಿಲ್ಲದೆ ಸಾಗಿರುವುದು ಗ್ರಾಮಸ್ಥರಲ್ಲಿ ಆತಂಕ ಮೂಡಿಸಿದೆ.

ಈ ಬಾಂದರ ಕಿರಿದಾಗಿದ್ದು ಸೇತುವೆಯ ಸುರಕ್ಷತೆಯ ದೃಷ್ಟಿಯಿಂದ ಕೇವಲ ಪಾದಚಾರಿಗಳು ಮತ್ತು ಸಣ್ಣಪುಟ್ಟ ವಾಹನಗಳ ಸಂಚಾರಕ್ಕೆ ಮಾತ್ರ ಅನುಕೂಲಕರವಾಗಿದೆ. ಭಾರಿ ಗಾತ್ರಗಳ ವಾಹನಗಳ ಸಂಚಾರಕ್ಕೆ ಬೇರೆ ಮಾರ್ಗವಿದ್ದರೂ ಹತ್ತಿರವಾಗುತ್ತದೆ ಎಂಬ ಕಾರಣಕ್ಕೆ ಇದೇ ಮಾರ್ಗದಲ್ಲಿ ಭಾರಿ ವಾಹನಗಳು ಸಂಚರಿಸುತ್ತಿರುವುದು ಅಪಾಯಕ್ಕೆ ಅಹ್ವಾನ ನೀಡಿದಂತಾಗಿದೆ.

ಇದೇ ರಸ್ತೆ ಬಳಕೆ ಯಾಕೆ?:

ರಟ್ಟಿಹಳ್ಳಿ ಮತ್ತು ತೋಟಗಂಟಿ ಸೇರಿದಂತೆ ಉಳಿದ ಅನೇಕ ಗ್ರಾಮಗಳಿಂದ ಮರಳು, ಕಲ್ಲು, ಮಣ್ಣು ಗಳನ್ನು ಸಾಗಿಸುವ ಭಾರಿ ವಾಹನಗಳು ಮೊದಲು ಲೋಕೋಪಯೋಗಿ ಇಲಾಖೆಯಿಂದ ನಿರ್ವಣವಾದ ಹಳೆಯ ರಸ್ತೆಯಲ್ಲಿ ಸುಮಾರು 34 ಕಿ.ಮೀ. ಸುತ್ತುವರಿದು ಸಂಚಾರ ನಡೆಸುತ್ತಿದ್ದವು. ಆದರೆ, ಈಗ ಬಾಂದಾರ ಕಂ ಸೇತುವೆ ನಿರ್ವಣವಾಗಿರುವುದರಿಂದ ಈ ಹೆಚ್ಚುವರಿ ಸುತ್ತಾಟ ತಪ್ಪಿಸುವ ಸಲುವಾಗಿ ಇದೇ ರಸ್ತೆಯನ್ನು ಬಳಸುತ್ತಿದ್ದಾರೆ.

ತಡೆಗೋಡೆ ಇಲ್ಲ:

ಬಾಂದಾರ ಕಂ ಸೇತುವೆ ಕಿರಿದಾಗಿದ್ದು, ಇದಕ್ಕೆ ಯಾವುದೇ ರೀತಿಯ ತಡೆಗೋಡೆ ನಿರ್ವಿುಸಲಾಗಿಲ್ಲ. ಇದರಿಂದ ಇಲ್ಲಿ ಸಂಚರಿಸುವ ವಾಹನಗಳು ಸ್ವಲ್ಪ ಎಚ್ಚರ ತಪ್ಪಿದರೂ ಅಪಘಾತ ಉಂಟಾಗುವ ಸಾಧ್ಯತೆ ಇದೆ. ನಿತ್ಯ ಸಾರ್ವಜನಿಕರು, ಶಾಲೆ ಮಕ್ಕಳು ಸಂಚಾರ ಮಾಡುವ ಈ ಬಾಂದರದ ಮೇಲೆ ದೊಡ್ಡ ಗಾತ್ರದ ವಾಹನಗಳ ಸಂಚಾರವನ್ನು ನಿಷೇದಿಸಿ ಸುರಕ್ಷತೆಗೆ ಆದ್ಯತೆ ನೀಡಬೇಕು ಎಂಬುದು ಗ್ರಾಮಸ್ಥರ ಆಶಯವಾಗಿದೆ.

ಮುನ್ನಚರಿಕೆ ಕ್ರಮ ಕೈಗೊಳ್ಳಲಿ:

ಸೇತುವೆ ಪ್ರವೇಶ ಮಾರ್ಗದ ಬಳಿ ಭಾರಿ ವಾಹನಗಳನ್ನು ನಿರ್ಬಂಧಿಸುವ ಕಮಾನು ನಿರ್ವಣ, ಎಚ್ಚರಿಕೆ ಫಲಕ ಅಳವಡಿಕೆಯಂಥ ಕ್ರಮಕ್ಕೆ ಸಂಬಂಧಪಟ್ಟ ಇಲಾಖೆ ಮುಂದಾಗಬೇಕಿದೆ.