ಭಾರಿ ಗಾಳಿ-ಮಳೆಗೆ ನೆಲಕಚ್ಚಿದ ಬಾಳೆ

ಮುಂಡರಗಿ: ಪಟ್ಟಣ ಸೇರಿ ಹಲವೆಡೆ ಶನಿವಾರ ಬಿರುಸಾದ ಗಾಳಿಯೊಂದಿಗೆ ಸುರಿದ ಮಳೆಯಿಂದಾಗಿ ಹೊರವಲಯದ ತೋಟದಲ್ಲಿನ ಬಾಳೆ ಬೆಳೆ ನೆಲಕಚ್ಚಿದೆ.

ರೈತ ಎಸ್.ವಿ. ಪಾಟೀಲ ಅವರ ಎಂಟು ಎಕರೆ ಜಮೀನಿನಲ್ಲಿರುವ ಬಾಳೆ ಗಿಡ ನೆಲಕಚ್ಚಿವೆ. ಕೆಲವೊಂದಿಷ್ಟು ನಿಂತಿರುವ ಗಿಡಗಳು ರಭಸದ ಗಾಳಿಗೆ ಸಂಪೂರ್ಣವಾಗಿ ಬೆಂಡಾಗಿವೆ. 8 ಎಕರೆಯಲ್ಲಿ 12 ಸಾವಿರ ಬಾಳೆ ಸಸಿ ನೆಟ್ಟು 10 ತಿಂಗಳಿಂದ ಪಾಲನೆ, ಪೋಷಣೆ ಮಾಡಿ ಉತ್ತಮ ರೀತಿ ಬೆಳೆಸಿದ್ದರು. ಈಗಾಗಲೆ ಬಾಳೆಗಿಡ ಗೊನೆ ಬಿಡುವುದಕ್ಕೆ ಪ್ರಾರಂಭಿಸಿದ್ದವು. ಸಸಿ, ಗೊಬ್ಬರ, ಕೂಲಿ, ನಿರ್ವಹಣೆ ಸೇರಿ ಪ್ರತಿ ಎಕರೆಗೆ 1 ಲಕ್ಷ ರೂ.ನಂತೆ ಸುಮಾರು 8 ಲಕ್ಷ ರೂ. ವರೆಗೂ ಖರ್ಚು ಮಾಡಿದ್ದರು. ಉತ್ತಮ ಲಾಭದ ನಿರೀಕ್ಷೆ ಹೊಂದಿದ್ದರು. ಆದರೆ, ಈಗ ಬಿರುಸಾದ ಗಾಳಿ, ವರುಣನ ಆರ್ಭಟಕ್ಕೆ ಕಂಗಾಲಾಗಿದ್ದಾರೆ.